Атрады брыгады, штаб якой дыслакаваўся каля Гомеля, дзейнічалі на акупіраванай тэрыторыі Ветрынскага, Пліскага, Полацкага, Ушацкага раёнаў. Партызаны наносілі ўдары па чыгунцы Полацк — Маладзечна, шашэйных і грунтавых дарогах, па варожых гарнізонах, удзельнічалі ў знакамітым «Прарыве», вялі жорсткія баі за ўтрыманне раёна дыслакацыі да злучэння з Чырвонай Арміяй 1 ліпеня 1944 года.

Мемарыял, узведзены ў 1977 годзе ў памяць аб 580 загінулых партызанах брыгады імя К. Я. Варашылава, час не пашкадаваў. Устарэлі помнікі з інфармацыяй аб партызанскіх атрадах «Бальшавік», імя М. Ф. Гастэлы, «За Радзіму», «Мсціўца», «КІМ», «Смерць фашызму». Раскрышылася пліта, якая адлюстроўвае карту размяшчэння атрадаў, а таксама стэла і мемарыяльныя пліты з напісанымі на іх імёнамі загінулых герояў.

Ініцыятыва адрамантаваць, рэстаўраваць і добраўпарадкаваць комплекс зыходзіла ад УП «Віцебскаблводаканал». За сродкі і сіламі прадпрыемствы тут замянілі тратуарную плітку, абліцавалі элементы мемарыяла гранітам, устанавілі сучаснае асвятленне, выканалі іншыя работы.

— Палітыка нашага прадпрыемства накіравана ў ліку іншага на падтрыманне патрыятычных настрояў, захаванне гістарычнай памяці сярод членаў калектыву, — адзначыў генеральны дырэктар УП «Віцебскаблводаканал» Аляксей Хвалько. — У нас створана пошукавая група, якая ўстанаўлівае імёны невядомых загінулых салдат, шукае іх сваякоў. Рэканструкцыя комплексу ў Гомелі — ужо трэці праект, увасоблены намі ў жыццё. У папярэднія гады мы правялі аналагічныя работы ў вёсках Пышнякі і Рудакі Віцебскага раёна, узялі гэтыя месцы памяці на абслугоўванне. Лічым гэта сваім маральным і грамадзянскім абавязкам.

Ва ўрачыстым мітынгу прынялі ўдзел памочнік Прэзідэнта — інспектар па Віцебскай вобласці Уладзімір Юргевіч, кіраўніцтва Віцебшчыны і Полаччыны, прадстаўнікі прадпрыемстваў, грамадскіх арганізацый, вайскоўцы, школьнікі, мясцовыя жыхары.

Яны ўшанавалі памяць загінулых хвілінай маўчання, усклалі вянкі і кветкі. Устаноўлены тут QR-код дазволіць азнаёміцца з гістарычнай даведкай аб дзейнасці партызанскай брыгады ім. К. Я. Варашылава.

Дарэчы, у ваколіцах Гомеля знаходзіцца гісторыка-культурны комплекс «Поле ратнай славы», адкрыты ў 2006 годзе. Тут захаваўся арыгінальны дот, аднавілі сістэму абарончых збудаванняў (траншэі, супрацьтанкавыя загароджы) Полацкага ўмацаванага раёна — аднаго з нямногіх, якія выканалі баявую задачу летам 1941 года.

Святлана ЯКАЎЛЕВА,

фота з адкрытых крыніц.

Чытайце таксама: «Гэта месца павінны наведаць усе». Што ўразіла замежных журналістаў у «Хатыні»