Вясковыя жыхары не хавалі свайго захаплення, атрымаўшы магчымасць упершыню пабываць у сучасным, прыгожым і ўтульным будынку аховы здароўя.
Паводле слоў загадчыцы амбулаторыі, урача агульнай практыкі Вікторыі Нічуновай, абслугоўвае ўстанова аховы здароўя амаль 1,8 тысячы чалавек, з іх 273 — дзеці, уключаючы дзесяць дзяцей да года. Раней амбулаторыя размяшчалася ў прыстасаваным будынку, размешчаным у вёсцы Гаёк, дзе пражывае ўсяго 20 чалавек. У распараджэнні ўстановы было восем кабінетаў, дзе ў кожным магло адначасова працаваць некалькі спецыялістаў. «Хацелася змяніць гэтыя сціснутыя ўмовы на больш камфортныя, сучасныя. Але з увядзеннем новага аб’екта змяніліся не толькі ўмовы працы медперсаналу, якасць дапамогі пацыентам значна вырасла. Бо асноўная частка насельніцтва, уключаючы дзяцей, сканцэнтраваная менавіта ў аграгарадку. Цяпер мамам з дзецьмі не прыйдзецца пераадольваць пешшу некалькі кіламетраў на візіт да ўрача», — адзначыла Вікторыя Ігараўна.
У распараджэнні калектыву — 38 кабінетаў, у тым ліку дзённы стацыянар на два ложкі. У амбулаторыі працуе ўласная лабараторыя, дзе вядзецца забор крыві і аналізуюцца атрыманыя даныя. Прыём вядуць акушэр, стаматолаг, ёсць набор абсталявання для правядзення працэдур фізіятэрапіі. Усё даступна, зручна, у межах аднаго будынка — цяпер людзям не прыйдзецца ездзіць па першасную або экстранную дапамогу за дзясяткі кіламетраў.
На ўрачыстым адкрыцці амбулаторыі старшыня Мінскага райвыканкама Дзяніс Колесень не толькі павіншаваў мясцовых жыхароў з доўгачаканай падзеяй, але і адзначыў ініцыятыўнасць грамадзян, якія дэманструюць прыклад неабыякавага стаўлення да сваёй малой радзімы, добраўпарадкавання.
«Адкрыццё амбулаторыі — гэта яшчэ адзін яскравы прыклад клопату дзяржавы пра здароўе грамадзян. І я хачу, каб мы з вамі не спыняліся на дасягнутым, а новыя планы станавіліся рэальнасцю, садзейнічаючы камфортнаму пражыванню ў населеных пунктах раёна», — адзначыў старшыня Мінскага райвыканкама.
Першы намеснік начальніка галоўнага ўпраўлення па ахове здароўя Мінскага аблвыканкама Ірына Лобах падкрэсліла, што адкрыццё такіх аб’ектаў — гэта чарговая ступень развіцця аховы здароўя вобласці.
«Амбулаторыя — не проста аб’ект, у першую чаргу гэта людзі, якія любяць сваю прафесію, і іх пацыенты, якія маюць патрэбу ў медыцынскай дапамозе, падтрымцы. Сістэма аховы здароўя і далей будзе развівацца, а якасць дапамогі і яе даступнасць — расці», — адзначыла Ірына Лобах.
Галоўны ўрач Мінскай раённай клінічнай бальніцы Гарык Барсамян расказаў, што сёння ў Мінскім раёне пражывае больш за 270 тысяч чалавек і патрэба ў медыцынскіх паслугах пастаянна расце.
«Раён імкліва развіваецца, толькі за апошнія дзесяць гадоў колькасць жыхароў павялічылася на 100 тысяч чалавек. Таму і аб’ектаў мы будуем шмат. Так, з 2018 года ўведзены ў строй Хацежынская, Прылуцкая амбулаторыі, тэрапеўтычны і паліклінічны карпусы райбальніцы ў Бараўлянах, паліклінікі ў Копішчы і Азярцы. Мы ўзводзім паліклініку ў Заслаўі. Акрамя гэтага, вырашаем пытанні будаўніцтва жылля для медыкаў», — адзначыў Гарык Барсамян.
Яна ВАЛАСАЧ
Фота pristalica.by
