У апошнія гады зімы не надта цешаць нас моцнымі маразамі і шчыльным снежным покрывам, а прырода найчасцей малюе шэрыя пейзажы. Але нават калі падлёдная рыбалка страчвае актуальнасць, водныя аб’екты працягваюць знаходзіцца пад пільнай увагай супрацоўнікаў Дзяржінспекіцыі аховы жывёльнага і расліннага свету пры Прэзідэнце Рэспублікі Беларусь. Бесперапынна кантраляваць абстаноўку дазваляе эфектыўна арганізаванае ўзаемадзеянне з праваахоўнымі і прыродаахоўнымі ведамствамі, карыстальнікамі паляўнічых і рыбалоўных угоддзяў.
Так, дзякуючы цеснаму ўзаемадзеянню з АУС Гомельскага райвыканкама выяўлены факт незаконнай здабычы рыбы ў Хойніцкім раёне. У ходзе разбору ўстаноўлена, што незаконную лоўлю рыбы на возеры Ізбынь ажыццявілі два жыхары Гомельскай вобласці пры дапамозе забароненых прылад рыбалоўства — рыбалоўнымі сеткамі.
Пры іх выяўлена 77 асобін азёрна-рачной рыбы, у тым ліку 64 асобіны таўсталобіка пярэстага, 8 асобін амура белага і 5 асобін карпа звычайнага, агульнай вагой 615 кг. Шкода, прычыненая навакольнаму асяроддзю, склала 246 базавых велічынь.
У адносінах парушальнікаў прыродаахоўнага заканадаўства ўзбуджана крымінальная справа па ч. 2 арт. 281 КК Беларусі.
Яшчэ адзін абуральны факт выяўлены ва Ушацкім раёне на возеры Паўазер’е, дзе Віцебскай абласной інспекцыяй затрыманы злосны парушальнік прыродаахоўнага заканадаўства, які з выкарыстаннем лодкі ажыццявіў здабычу рыбы забароненымі прыладамі рыбалоўства (14-цю рыбалоўнымі сеткамі агульнай даўжынёй больш за 880 м). Ён незаконна здабыў 181 асобіну плоткі, 43 асобіны акуня, 35 асобін шчупака, 32 асобіны ляшча, па адной асобіне ліня, і карася сярэбранага агульнай вагой больш за 125 кг. Памер шкоды, прычыненай навакольнаму асяроддзю, склаў 439 базавых велічынь.
Следча-аператыўнай групай Ушацкага РАУС канфіскаваны забароненыя прылады рыбалоўства, незаконна здабытая рыба, лодка і рыбалоўныя санкі-валакушы.
Тут таксама ўзбуджана крымінальная справа па названым вышэй артыкуле.
Пайшлі ў ход браканьерскія сеткі і ў Лунінецкім раёне, што не схавалася ад пільнага погляду Мікашэвіцкай міжраённай інспекцыі. З выкарыстаннем самаробнай лодкі і трох рыбалоўных сетак (агульнай даўжынёй больш за 150 м) мясцовы жыхар у пойменным вадаёме ракі Прыпяць незаконна здабыў 163 асобіны азёрна-рачной рыбы агульнай вагой 42 кг. Шкода, прычыненая навакольнаму асяроддзю, склала 301 базавую велічыню.
Следча-аператыўнай групай Лунінецкага РАУС канфіскаваны забароненыя прылады рыбалоўства — 4 рыбалоўныя сеткі, агульнай даўжынёй больш за 195 метраў, драўляная лодка і 42 кг азёрна-рачной рыбы. Па месцы жыхарства парушальніка знойдзены дзве сеткі.
У дачыненні да грамадзяніна ўзбуджана крымінальная справа па ч. 4 арт. 281 КК.
Падчас правядзення палявога мерапрыемства супрацоўнікамі Столінскай міжраённай інспекцыі выяўлены факт незаконнай здабычы рыбы забароненым спосабам, у забароненым месцы і ў забаронены час.
Двое жыхароў Давыд-Гарадка з выкарыстаннем лодкі на ўчастку ракі Гарынь у Столінскім раёне, дзе лоўля рыбы забаронена з 1 кастрычніка па 15 красавіка, з выкарыстаннем спінінгаў забароненым спосабам багрэння, незаконна здабылі 11 асобін сама агульнай вагой 19,53 кг. Шкода склала 132 базавыя велічыні.
Там жа мужчыны ўстанавілі 7 экран-тэлевізараў, што перавышае дазволеную колькасць, і незаконна здабылі 7 асобін плоткі, 6 асобін ляшча і 1 асобіну чэхані, чым прычынілі навакольнаму асяроддзю шкоду ў памеры 93 базавых велічынь.
Агульны памер шкоды, прычыненай навакольнаму асяроддзю ў выніку незаконнай лоўлі азёрна-рачной рыбы, склаў 225 базавых велічынь.
Следча-аператыўнай групай Столінскага РАУС канфіскаваны 7 экран-тэлевізараў, 3 спінінгі, каробка з рыбалоўнымі прыстасаваннямі, азёрна-рачная рыба — 25 асобін агульнай вагой больш за 21 кг, маторна-грабная лодка. На аўтамабіль накладзены арышт.
Дзяржаўная інспекцыя нагадвае, што багрэнне — адзін з самых жорсткіх і разбуральных спосабаў рыбнай лоўлі, які не толькі забаронены заканадаўствам, але і наносіць непапраўную шкоду прыродзе. Гэты метад заключаецца ў выкарыстанні кручковых снасцяў, якія чапляюць рыбу за любыя часткі цела (бруха, хвост, плаўнікі), што прыводзіць да гібелі падводных насельнікаў. Пры багрэнні рыба атрымлівае глыбокія раны, часта несумяшчальныя з жыццём. Нават сарваўшыся з кручка, яна гіне ад інфекцый ці становіцца лёгкай здабычай драпежнікаў. Агульная колькасць пацярпелых асобін значна перавышае ўлоў багрыльшчыкаў. Часцей за ўсё парушальнікі выкарыстоўваюць гэты варварскі спосаб у месцах скаплення рыбы, такіх як зімавальныя ямы, дзе падводныя насельнікі ўразлівыя з-за нізкай рухомасці. Багрэнне прыводзіць да скарачэння колькасці каштоўных відаў, такіх як шчупак або судак, што ставіць пад пагрозу біяразнастайнасць нашых вадаёмаў.
Нават у непагадзь, калі здаецца, што прырода спіць, жыццё вадаёмаў працягваецца. І пакуль ёсць тыя, хто гатовы яе разбураць, будуць і тыя, хто ўстае на яе абарону.
Фота:gosinspekciya.gov.by
