Рэйтынг беларускіх ВНУ, які абапіраецца на вынікі прыёмнай кампаніі 2013 года, упершыню склалі ў Міністэрстве адукацыі.
Як расказалі ў прэс-службе галоўнага адукацыйнага ведамства, мэта гэтага рэйтынгу — ацаніць патэнцыял студэнтаў першага курса. Пры стварэнні рэйтынгу браліся пад увагу як колькасныя, так і якасныя паказчыкі.
У формулу разліку ўвайшлі наступныя значэнні: сума балаў, набраных студэнтамі-першакурснікамі па ўсіх спецыяльнасцях, з улікам выканання кантрольных лічбаў прыёму; колькасць абітурыентаў, прынятых на бюджэт па пэўнай спецыяльнасці; колькасць абітурыентаў, прынятых на умовах аплаты па пэўнай спецыяльнасці; прахадны бал па пэўнай спецыяльнасці для абітурыентаў, прынятых за кошт сродкаў бюджэту і на ўмовах аплаты; колькасць абітурыентаў, залічаных без уступных экзаменаў (пераможцаў міжнародных і рэспубліканскіх алімпіяд, творчых конкурсаў і фестываляў, лаўрэатаў спецыяльных фондаў Прэзідэнта Рэспублікі Беларусь); колькасць залічаных замежных грамадзян; працэнт выканання кантрольных лічбаў прыёму.
Першае месца ў рэйтынгу заняў Беларускі дзяржаўны ўніверсітэт, што і не дзіўна: ні па колькасці пераможцаў алімпіяд, якія выбіраюць далейшым месцам навучання менавіта Белдзяржуніверсітэт, ні па прахадных балах, ні па колькасці замежных грамадзян, якія паступаюць у БДУ, канкурэнтаў у галоўнага нацыянальнага ўніверсітэта няма.
Другая пазіцыя ў рэйтынгу належыць Беларускаму нацыянальнаму тэхнічнаму ўніверсітэту, а трэцяя — Беларускаму дзяржаўнаму ўніверсітэту інфарматыкі і радыёэлектронікі. У першую пяцёрку таксама ўвайшлі Беларускі дзяржаўны эканамічны ўніверсітэт і Мінскі дзяржаўны лінгвістычны ўніверсітэт.
Як патлумачылі ў Мінадукацыі, установы вышэйшай адукацыі так званых «сілавых ведамстваў» — МНС, МУС і Міністэрства абароны — у рэйтынгу не ўдзельнічалі.
Надзея НІКАЛАЕВА.
0102
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.