Днямі ў сталічным Ліцэі БДУ гучалі віншаванні з традыцыйным кітайскім святам Юаньсяоцзе. Гэтае свята ліхтароў сімвалізуе завяршэнне навагодніх урачыстасцяў і пераход да плённых будных дзён.
Добры сімвал. Тым больш што культурныя і эканамічныя адносіны паміж Рэспублікай Беларусь і Кітаем няспынна мацнеюць і прыносяць добры плён. Такімі словамі можна коратка перадаць тэму выступленняў ганаровых гасцей свята — пасла Кітая ў Беларусі Цуй Ціміна і прарэктара па навуковай рабоце Белдзяржуніверсітэта, акадэміка Алега Івашкевіча. Іх прамовы перад удзельнікамі святкавання суправаджаліся яскравым слайд-шоу: на вялікім экране ажывалі знакавыя падзеі сучаснай гісторыі Кітая, хроніка развіцця нашых узаемаадносін.
Юаньсяоцзе мае старажытныя карані: гэтае свята адзначалі яшчэ за сотні гадоў да нашай эры. Прычым за мінулыя тысячагоддзі змянілася шмат яго атрыбутаў. Нязменнай засталася абавязковая прысутнасць каляровых ліхтароў — сімвалаў святла і дабрыні. Менавіта такімі ліхтарамі была ўпрыгожана сцэна Ліцэя БДУ. Пра канцэртную праграму паклапаціліся ліцэісты, студэнты мінскіх ВНУ і галоўныя носьбіты свята — кітайскія юнакі і дзяўчаты, якія вучацца ў Мінску. Песні і танцы, фальклорныя сцэнічныя эцюды выканалі маладыя мінчане, якія вывучаюць кітайскую мову.
Яўген ПЯСЕЦКІ. Фота аўтара.
Сумесныя праекты ядзерных тэхналогій.