Хто вырашыць лёс участкаў, якія пустуюць у сельскай мясцовасці?
Сёння, напэўна, няма такой вёскі, дзе б гэта праблема не існавала. Сучасная моладзь аддае перавагу гарадам, а бацькоўскія хаты стаяць толькі да тых часоў, пакуль у іх цепліцца жыццё. Потым паціху разбураюцца, іх зносяць, а пустыя зямельныя пляцоўкі на агульным фоне, як бяльмо на воку. Ахвотных пачаць там новае жыццё знайсці няпроста. Аб тым, з якімі цяжкасцямі прыходзіцца сутыкацца на практыцы, падзяліўся з карэспандэнтам «МС» Аляксандр Крыванос, старшыня Патоцкага сельскага Савета Клічаўскага раёна, што на Магілёўшчыне.
— Калі весці размову пра зямлю, якая знаходзіцца на ўскрайку населенага пункта, яе можна лёгка ўключыць у севазварот, — канстатуе ён. — А вось калі побач няма сельгасугоддзяў ці нейкіх фермерскіх гаспадарак, узнікаюць складанасці. Гэта ў горадзе заўсёды знойдзецца купец на любы кавалак зямлі, а калі гэта вёска ды яшчэ неперспектыўная, ніхто не спяшаецца будаваць там сабе жытло.
На балансе сельвыканкама — 41 населены пункт, і практычна ўсюды ёсць некалькі пустуючых участкаў па 15-25 сотак. За апошнія 4 гады толькі два з іх — абодва ў вёсцы Дзмітраўка — былі ўзяты пад будаўніцтва. Адна справа — прывесці закінутую тэрыторыю ў парадак і перадаць у чыесьці клапатлівыя рукі. І зусім іншая, калі гэтых гаспадарлівых рук няма, а страты на добраўпарадкаванне безнаглядных зямель вымушаны несці сельсавет. А яны, страты, не такія ўжо і маленькія. Трэба час ад часу абкошваць там траву, выкарчоўваць хмызнякі, вывозіць смецце, наглядаць за тым, каб гэтыя тэрыторыі не станавіліся месцамі стыхійных звалак... Між тым, колькасць праблемных «аб'ектаў» не змяншаецца. Вось і сёлета ў Клічаўскім раёне закрываюцца 2 малакамплектныя школы, а гэта значыць, што нехта зменіць месца прапіскі, каб жыць бліжэй да работы ці вучобы.
...Некалі густанаселеныя клічаўскія вёсачкі пусцеюць літаральна на вачах. Едзеш па такой і здзіўляешся: быццам бы і дамоў шмат, а людзей на вуліцы амаль няма. Аляксандр Сцяпанавіч пералічвае: гэта пустуючы дом, тут адзінокі стары жыве, а сюды ўсяго некалькі разоў у год прыязджаюць.
— Гадоў 20 таму так званыя дачнікі яшчэ працавалі на зямлі і нешта вырошчвалі, а цяпер наведваюцца толькі, каб сабраць у лесе ягады і грыбы ці шашлык прыгатаваць, — уздыхае старшыня. — Цывілізацыя вёску згубіла. Кінуўся народ у гарады шукаць шчасця, а зямля без чалавека дзічэе.
Цяпер у вёсках набірае папулярнасць аграэкатурызм. Чаму б для гэтага не выкарыстоўваць пустуючыя землі? Клічаўскія мясціны, знакамітыя сваімі ляснымі масівамі, могуць прывабіць аматараў прыроды і палявання. Тым больш, што землі тут не так атручаны Чарнобылем, як у іншых раёнах. Нядаўна да старшыні сельскага Савета звярнуўся мясцовы жыхар, які пажадаў узяць участак безгаспадарчай зямлі ў роднай вёсцы Ваевічы, каб зрабіць на ім прывабны для турыстаў куточак з альтанкамі. Аляксандр Крыванос гатовы падтрымаць гэту ідэю абедзвюма рукамі. Ведае, што Сяргей Ільін — чалавек майстравіты, і ў тым, што ён можа стварыць для адпачывальнікаў усе ўмовы, не сумняваецца. Вось толькі яшчэ невядома, з'явіцца нарэшце ў населеным пункце гэты прывабны аб'ект ці не.
Тэарэтычна ўзяць зямлю можна — але толькі пад будаўніцтва дома ці пад агародніцтва. Для гэтага сельвыканкам не патрабуе ніякіх дакументаў, акрамя заявы. Бяры, калі ласка, і карыстайся, было б жаданне. Адзіная ўмова — не адкладваць справу ў доўгую скрыню. Калі будаўніцтва на працягу года не пачалося, «шчасліваму» ўладальніку нагадаюць: трэба хутчэй рабіць справу. А калі яшчэ праз 2 гады не будзе відаць зрухаў, то зямля можа сысці, як і прыйшла. Тое ж самае можа адбыцца і з участкам пад агародніцтва.
Сяргею Ільіну зямля спатрэбілася для крыху іншых мэт. Дом у прадпрымальніка ўжо ёсць, а рабіць градкі для прыхільнікаў аграэкатурызму неяк няёмка — ці яны зразумеюць гумар гаспадара.
Прадпрымальнік нават пайшоў на тое, каб распачаць будаўніцтва, і паспрабаваў узяць у банку льготны крэдыт пад развіццё аграэкатурызму. Паверыў рэкламе, якая абяцае, што гэта можна зрабіць без лішніх цяжкасцяў. Але... хутка засумняваўся. У банку патлумачылі, што трэба спачатку сабраць вялікі пакет дакументаў і зрабіць праект. Дзе на яго ўзяць грошы, не падказалі. Але на гэтым праблемы не заканчваюцца. Наперадзе чакае візіт на месца камісіі з удзелам прадстаўнікоў раённай улады і «прысуд»: адпавядае зроблены праект неабходным патрабаванням ці не. Тэарэтычна могуць і адмовіць у крэдыце, калі што не так. Вось Сяргей Ільін і думае: а ці патрэбны яму такія складанасці? Смяецца, што прасцей купіць домік, чым аформіць у сваю ўласнасць пустуючую зямлю. Аляксандр Крыванос вельмі хацеў бы дапамагчы земляку. Але чым? Калі ў Сяргея Ільіна хопіць цярпення давесці пачатую справу да канца, а ў Аляксандра Крываноса — красамоўства для пераканання прадпрымальніка ў тым, што яму гэта патрэбна, то яшчэ адным пустуючым участкам стане ў раёне менш. На думку Аляксандра Крываноса, справа пайшла б хутчэй, калі б банкаўскую працэдуру для вяскоўцаў спрасцілі.
Каментарый у тэму
Старшыня Клічаўскага раённага Савета дэпутатаў Уладзімір Кніга:
— Мы праводзім вялікую работу па зносе старых дамоў, выкарчоўваем дрэвы, добраўпарадкоўваем тэрыторыю — але перадаць яе, як правіла, няма каму. Асабліва, калі гэты ўчастак знаходзіцца паміж іншымі дамамі ці паблізу ад балот. У нас землі не так запатрабаваны, як у тым жа Мінскім раёне. Тым больш, людзі з'язджаюць з сяла, а тая моладзь, што застаецца, не прывыкла працаваць так, як іх дзяды і прадзеды. Пустуючую зямлю можна было б узяць пад сенакос, але ж цяпер мала хто трымае дамашнюю жывёлу. У нашых сілах знесці дом, надаць тэрыторыі эстэтычны від. Але што далей? Перадалі на баланс землеўпарадкавальнай службы, размясцілі аб'явы — бярыце, карыстайцеся! А вынік нулявы. Праз некаторы час зноў прыходзіцца ўбіраць там бур'ян, касіць траву. Шкада траціць на гэта дзяржаўныя грошы.
Складанасць заключаецца яшчэ ў тым, што ў вёсках кінутыя землі перамяжоўваюцца з участкамі, якія апрацоўваюцца. А для таго, каб сельскагаспадарчая тэхніка змагла заехаць на пэўную тэрыторыю, патрэбна так званая контурнасць поля. Інакш немагчыма нешта зрабіць. Прыходзіцца чакаць, калі суседнія ўчасткі таксама вызваляцца.
Вельмі дапамагло б нашай працы, калі б ва Указ № 667 ад 27 снежня 2007 года, які зацвярджае палажэнне аб парадку выключэння зямельных участкаў, былі ўнесены пэўныя змены. І цяпер землеўпарадкавальныя службы афармляюць дакументы і перадаюць пустуючыя землі бясплатна толькі сельгасвытворцам. Летась мы такім чынам перадалі 40 гектараў, сёлета — ужо 20. Справа пайшла б хутчэй, калі б для лясгасаў таксама існавалі такія ж прэферэнцыі, як і для сельгасвытворцаў. Пакуль жа працэдура афармлення для іх платная.
Нэлі ЗІГУЛЯ.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.