Нацыянальная зборная па футболе ў рэйтынгу ФІФА апусцілася на 17 пазіцый і цяпер займае 106-е месца. За час, які прайшоў пасля складання папярэдняга рэйтынг-ліста ФІФА, зборная Беларусі правяла два афіцыйныя адборачныя матчы чэмпіянату Еўропы-2016, у якіх пацярпела хатнія паражэнні ад зборных Украіны (0:2) і Славакіі (1:3).
Сапернікі беларусаў у групе С еўракваліфікацыі займаюць наступныя пазіцыі: 10 — Іспанія, 19 — Украіна, 24 — Славакія, 99 — Македонія, 126 — Люксембург. Наступны адборачны матч Еўра-2016 беларусы правядуць 15 лістапада ў гасцях у іспанцаў. Заключным акордам футбольнага года для каманды Беларусі стане таварыскі матч са зборнай Мексікі, які адбудзецца 18 лістапада ў Барысаве.
Дададзім, што самую нізкую пазіцыю ў рэйтынгу зборная Беларусі займала ў жніўні 1994-га — 142-е месца, калі зборнай кіраваў Міхаіл Вергіенка. А лепшая пазіцыя ў нашай каманды была пры Бернду Штанге: у лютым 2011-га беларусы размяшчаліся на 36-м радку.
Дарына ЗАПОЛЬСКАЯ
Сумесныя праекты ядзерных тэхналогій.