Аўдыторыя імя акадэміка Пічэты з'явілася на гістарычным факультэце Беларускага дзяржаўнага ўніверсітэта. Першы рэктар БДУ ў будынку гістфака не толькі працаваў — амаль жыў. Не выключана, што менавіта ў гэтым пакоі вядомы гісторык пісаў свае выбітныя навуковыя працы.
Адкрыццё імяннога пакоя адбылося ў межах святкавання 80-годдзя гістарычнага факультэта. Каб павіншаваць сваіх калег, у Мінск з'ехаліся гісторыкі і навукоўцы з Масквы, Кіева, Кракава, Вроцлава, Шанхая, Пскова, беларускіх гарадоў. Многія з іх вучыліся па творах нашага даследчыка.
За сваё жыццё Уладзімір Пічэта напісаў больш за 500 кніг, рэцэнзій, артыкулаў, многія з якіх, дарэчы, друкаваліся ў «Звяздзе». Пераважная большасць яго прац датычылася гісторыі Беларусі, Расіі, Украіны, Польшчы, іншых славянскіх краін і народаў. Пічэта стаяў ля вытокаў беларускай навукова-гістарычнай школы, быў адным з арганізатараў вышэйшай адукацыі ў нашай краіне. Невыпадкова гісторык актыўна ўдзельнічаў у стварэнні Беларускага дзяржаўнага ўніверсітэта, за што быў прызначаны яго першым рэктарам.
Стварыўшы ўніверсітэт літаральна на пустым месцы, Уладзімір Пічэта пакінуў яго ў складзе чатырох факультэтаў. Пакінуў не па сваім жаданні: як і многія таленты таго часу, не «ўпісаўся» ў сталінскі рэжым. Пад ціскам ілжывых абвінавачванняў ён быў арыштаваны. Нягледзячы на гэта, стаўленне да Пічэты з боку аднадумцаў і простых людзей не змянілася. Ён да канца свайго жыцця заставаўся выбітным гісторыкам, таленавітым навукоўцам і сапраўдным беларусам, хоць нарадзіўся ва Украіне.
Вераніка КАНЮТА.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.