Штогод з абласнога бюджэту ў бюджэты пярвічнага ўзроўню ўлады пералічваюцца сумы на «прэміяльныя» для старэйшын. Калі ў вёсцы да 20 двароў, старэйшына атрымае 1 базавую велічыню ў месяц (сёння гэта 150 тысяч рублёў), ад 21 да 50 двароў — 1,5 базавай велічыні, ад 51 да 100 двароў — 2, больш за 100 — 2,5 базавай велічыні па выніках ацэнкі сваёй дзейнасці. Грошы, пагадзіцеся, невялікія, улічваючы нагрузку і высокую адказнасць перад землякамі. Некаторыя з'яўляюцца старэйшынамі адначасова некалькіх маленькіх населеных пунктаў. Як дзейнічае «алгарытм» стымулявання ў асобна ўзятым раёне, ці спраўляюцца старэйшыны з тым, што павінны рабіць, ці карыстаюцца аўтарытэтам? Каб адказаць на гэтыя і іншыя пытанні, наш карэспандэнт адправіўся на Шуміліншчыну.
Не прызначаюць, а выбіраюць
— У нашым раёне 148 старэйшын. Вядома, ім прыемна, што ўлада, няхай невялікімі выплатамі, але ж заахвочвае іх за грамадскую дзейнасць. А робяць яны многае. У ліку іншага, напрыклад, сочаць за тым, каб у вёсках было светла ўвечар, каб своечасова прыязджалі аўтакрама, аўтаклуб, бібліятэка на колах, каб не было праблем з паштовай сувяззю… Яны таксама бяруць удзел у арганізацыі закупу лішкаў сельскагаспадарчай прадукцыі. А яшчэ — працуюць у складзе камісій па пажарнай бяспецы, саветаў грамадскіх пунктаў аховы правапарадку і гэтак далей. Іх можна назваць «вачамі, вушамі і «рупарам» вёсак», бо ведаюць пра ўсё, што адбываецца, і аператыўна паведамляюць, калі што не так. А падчас стасункаў з кіраўнікамі раённага ўзроўню яны адстойваюць правы і інтарэсы сваіх аднавяскоўцаў. Усе без выключэння старэйшыны вылучаюцца актыўнай жыццёвай пазіцыяй і добрымі арганізатарскімі здольнасцямі, — расказвае Ірына Новікава, старшыня Шумілінскага райсавета.
Старэйшын нельга назваць «прызначэнцамі», бо іх выбіраюць на сходах. Калі чалавек, як той казаў, не на сваім месцы, у наступны раз людзі могуць і не аказаць давер. Ды і «зарплату» старэйшына можа не атрымаць, калі недапрацаваў, калі яго аднавяскоўцы скардзяцца на тое, што паабяцаў, але не вырашае пытанне…
— Для ацэнкі дзейнасці старэйшын, згодна з распараджэннямі старшынь сельскіх Саветаў, створаны камісіі, пасяджэнні якіх праводзяцца кожны квартал. Але, паверце, на старэйшын скардзяцца рэдка. Я нават і не ўзгадаю, калі такое было. Тым больш што папулістаў сярод гэтых людзей няма. Калі нешта паабяцаў — выконвай: на вёсцы не схаваешся ад суседзяў, — кажа Ірына Новікава.
У многіх старэйшын ёсць кірункі працы, у якіх яны дабіліся вялікага поспеху, могуць падзяліцца напрацаваным вопытам. Напрыклад, з удзелам старэйшыны вёскі Мікалаева Марыі Кралько наведзены парадак на могілках. Старэйшына вёскі Мішневічы Святлана Зуева актыўна прапагандуе здаровы лад жыцця, займаецца прафілактыкай парушэнняў правапарадку. Ну а Марыя Лялюга пастаралася, каб яе маленькая вёсачка Лялюгі (з насельніцтвам каля дваццаці чалавек) была, як «з карцінкі». А яшчэ яна — майстрыха ладзіць святы.
Сама сабе «прадзюсар»…
— Пра кожнага магу сказаць шмат добрага. З 22 старэйшын толькі 6 мужчын. Ёсць адказныя адразу за некалькі вёсак, калі яны маланаселеныя. Вядома, большасць «мэраў» — пенсіянеры, але ёсць і працоўныя, у прыватнасці, тры работнікі сферы культуры. Яны і так увесь час з людзьмі і паралельна — старэйшыны. Усе яны без выключэння — нашы надзейныя памочнікі, без іх мы не маглі б нармальна працаваць, бо ў сельвыканкаме ўсяго тры спецыялісты, — гаворыць Ірына Шалахава, старшыня Дабейскага сельскага Савета.
Паводле яе слоў, старэйшыны ў ліку іншага вельмі добра навучыліся агітаваць людзей «скінуцца» на нешта карыснае. І вяскоўцаў ужо не трэба доўга пераконваць у неабходнасці сабраць гуртам неабходную суму.
— Напрыклад, вырашылі на сходзе, што трэба могілкі ў парадак прывесці — уносяць сваю долю грашыма. А мы з бюджэту таксама выдзяляем грошы. І такім фінансавым партнёрствам людзі задаволены. Тым больш што самі вырашаюць, колькі могуць сабраць: ці па 20, ці па 50 тысяч рублёў — і гэта з двара. Пагадзіцеся, у наш час не такія ўжо і вялікія ўзносы, — працягвае Ірына Шалахава.
Разам прыехалі ў вёску Лялюгі, дзе старэйшынай Марыя Цімафееўна Лялюга. Акрамя яе, там жывуць яшчэ тры чалавекі з такімі прозвішчамі, але яны ёй не сваякі. Старэйшына аказалася вельмі энергічным чалавекам. Расказала, што да выхаду на пенсію працавала ў клубе.
— Культурай загадвала. Дарэчы, у клубе і з будучым мужам пазнаёмілася. Ён і на гармоніку іграў, і на баяне. А я ж тады ўжо ў Віцебск перабралася, на фабрыцы «Сцяг індустрыялізацыі» працавала. Закахаліся — і зноў «вясковай» стала. Старэйшынай мяне выбралі ў 2011 годзе. Да мяне ім быў Уладзімір Іванавіч Скірман, цяпер яму 77 гадоў. Шмат добрага ён зрабіў для нас, а я, можна сказаць, проста прыняла эстафету. Ці цяжка быць старэйшынай? Ну, не кароў жа даіць (шчыра смяецца. — Аўт.). З людзьмі трэба пагаварыць, высветліць, што хвалюе, што трэба для вёскі зрабіць, можа дапамога патрэбна камусьці. Мы ж — дружныя! Ну і ўказанні мясцовай улады выконваць трэба. На кантролі ў мяне стан дарогі і вулічнае асвятленне… Адзін дом без гаспадароў застаўся, дык знайшла новых, каб не пуставаў. Ён звонку адрозніваецца ад астатніх тым, што яшчэ не пафарбаваны, але ж часу няшмат прайшло, як купілі жыллё, — распавядае старэйшына.
Цікава, што яна дапамагла і дакументы аформіць, каб толькі той дом не прапаў.
Адказны за Машу
— Мы святкуем не толькі Дзень вёскі ці дзяржаўныя святы, але і юбілеі жыхароў. Я каго толькі з артыстаў самадзейных ні запрашала — прыязджалі і спявалі нам! І выстаўкі тут арганізуем — дароў агарода, кветак, вырабаў нашых умельцаў. Дзякуй кіраўніцтву ААТ «Прыазёрны свет» за тое, што збожжа нам па сімвалічнай цане даюць, тэхніку на поле агульнага севазвароту своечасова адпраўляюць. Дарэчы, і кабыла ў нас ёсць, адна на ўсіх, — працягвае Марыя Цімафееўна.
Паказала тую кабылу па мянушцы Маша, якая задарма была перададзена гаспадаркай. І ёсць, аказваецца, адказны за яе. Анатоль Мікалаевіч Ганушчанка зарэгістраваны па месцы жыхарства ў Віцебску, але ў вёсцы бывае вельмі часта. Да пенсіі ён таксама працаваў на фабрыцы «Сцяг індустрыялізацыі», дзе адказваў за гаспадарчыя справы. Мужчына прыемна здзівіў добрым веданнем гісторыі вёскі. Расказаў, што калісьці яна належала польскаму пану.
— Да 1947 года наша вёска мела назву Бісёркі. Я і свой фамільны радавод вывучыў па просьбе ўнучкі. Так, захапляюся краязнаўствам — для душы, — гаворыць Анатоль Мікалаевіч.
Калі нехта просіць «узяць у арэнду» кабылу, ён падкажа, як правільна яе карміць, калі трэба напаіць… Расказаў, што ў Машы ёсць дах — былая стайня. Салому бясплатна дае гаспадарка, сена ж — па прымальнай цане.
Такія, як Анатоль Мікалаевіч, — памагатыя старэйшын. З іх удзелам у кожнай вёсцы праводзіцца праца ў розных кірунках: па добраўпарадкаванні, выхаванні п'яніц і гультаёў… Калі ёсць праблема, «сігналізуюць» у сельвыканкам, у райсавет. Наколькі я зразумеў, такія людзі, як і старэйшыны, працуюць не для «птушачкі», тым больш не для грошай. А падзяку за сваю дзейнасць, у тым ліку і грашовую, лічаць знакам павагі, сімвалічнай ацэнкай эфектыўнасці працы.
Аляксандр ПУКШАНСКі
Шумілінскі раён.
Сумесныя праекты ядзерных тэхналогій.