Карэспандэнты «Звязды» разам з сябрамі Студэнцкага этнаграфічнага таварыства павіншавалі з зімовымі святамі Ядвігу Пастарнак, адну з нешматлікіх жыхарак вёскі Муляры з маляўнічай Вілейшчыны.
Наша даведка
Ядвіга Пастарнак — першая з беларусаў, хто атрымаў ліст ад Папы Рымскага. Да 100-годдзя Вілейскага касцёла яна падрыхтавала прамову, у якой распавяла пра жыццё вернікаў, храм, маленні... Прамова спадабалася апостальскаму нунцыю Клаўдыя Гуджароці, якую ён перадаў Папе Францішку. 22 снежня 2013 года нунцый прывёз ліст ад Папы ў Вілейку і ўручыў нашай гераіні.
Кот Барсік і яго гаспадыня
Ідэя для напісання гэтага тэкста насамрэч узнікла спантанна. Падчас абмеркавання святочнага нумара нехта падкінуў тэму напісаць аб тым, як святкуюць Новы год у глыбінцы, а заадно павіншаваць са святам адзінокіх людзей. Зразумела, ніхто не хацеў рабіць з гэтага рэкламную акцыю, ствараць штучнае, пафаснае свята. Наадварот, хацелася зрабіць маленькі сюрпрыз. Бо, пагадзіцеся, у якім бы ты ўзросце ні быў, але заўжды чакаеш невялічкага цуду ад Раства ці Новага года. Звязаліся з хлопцамі са Студэнцкага этнаграфічнага таварыства, якім, магчыма, таксама было б цікава з'ездзіць у глыбінку, паслухаць, запісаць расповед цікавага і адметнага чалавека. І калі Сяргей Лісіца, сябра таварыства, пасля некалькіх дзён роздумаў прапанаваў у тым ліку наведацца ў Муляры, на Вілейшчыну, мы безагаворачна пагадзіліся.
Муляры — звычайная вёска. Яшчэ год таму пра яе ведалі хіба толькі прадстаўнікі мясцовай улады, даследчык Першай сусветнай вайны (каля вёскі пахаваны нямецкія салдаты) ці апантаны вандроўнік. Вядомасць у вёску, можна сказаць, прыйшла нечакана. Год таму мясцовая жыхарка Ядвіга Пастарнак стала першай беларускай, якая атрымала ліст ад Папы Рымскага Францішка. Адданая, сціплая верніца, якая ўсё жыццё адпрацавала краўцом, адразу трапіла на старонкі як рэлігійных, так і свецкіх выданняў. Падрабязна пісала аб ёй і «Звязда». Праўда, гэтым разам мы не планавалі вялікага інтэрв'ю, а прыехалі з невялічкімі падарункамі (упрыгожылі елку святочнымі цацкамі), каб павіншаваць з зімовымі святамі спадарыню Ядвігу, якая жыве разам з прыгожым сытым коцікам па мянушцы Барсік. Праўда, не ўстрымаліся, задалі некалькі пытанняў аб тым, як раней адзначалі Новы год, і даведаліся, навошта дзяўчаты ў святочную ноч абдымалі плот, адмервалі ў хаце крокі ботам, а хлопцы — пасыпалі сцежкі попелам.
— Новы год раней адзначалі так, як і зараз, — трымаючы ў руках кубачак з гарбатай, — узгадвае спадарыня Ядвіга. — У нас заўжды ў хатах праводзіліся вечарынкі, на якіх музыкі ігралі на гармоніку, цымбалах. На танцы збіралася ўся вёска. Дзяўчаты апраналіся ў самае прыгожае. Танцавалі польку, «Каробачку», «Кракавяк», «Падэспань», «Лявоніху», якую называлі рускім танцам. Новы год не быў выключэннем. Праўда, спачатку дзяўчаты варажылі, а пасля ўжо выпраўляліся на танцы.
Варажылі ў гэтым кутку Вілейшчыны таксама цікавым чынам. Дзяўчаты, напрыклад, абдымалі плот і лічылі, колькі схапілі штыкецін. Калі ў абдымках кожная штыкеціна мела пару, выйдзеш замуж, а калі не, тады, магчыма, і не выйдзеш. Часам, каб даведацца, ці будзе ў цябе муж, у хаце ботам адмервалі крокі ад покуці да дзвярэй. Калі носам уторкнешся, чакаць табе нарачонага, а калі пяткай траплялі, для дзяўчат гэта была надта непрыемная прыкмета. У вёсцы ў свой час любілі варажыць таксама з дапамогай воску. Растопленае рэчыва вылівалі ў халодную ваду (воск хутка застываў), а пасля ўсе глядзелі, які цень яно адкідвае на сцяну. Да адной мясцовай дзяўчыны адначасова сваталіся два хлопцы. Адзін зімой хадзіў у летняй шапцы, другі — у зімовай. І калі дзяўчаты паглядзелі на цень, заўважылі, што ён нагадвае якраз зімовую шапку. Мясцовыя пасля жартавалі, што выйдзеш за гэтага хлопца. Кажуць, усё так і адбылося.
Вось які парадокс: усё жыццё спадарыня Ядвіга шыла шлюбныя сукенкі дзяўчатам, а сама апынулася ў якасці маладой толькі ў 58-гадовым узросце. Прапанову ёй зрабіў Баляслаў Смаленскі, удавец. «Ён быў добрым, веруючым чалавекам. Мы адно аднаго паважалі. Разам пражылі 9 гадоў...», — расказвала ў адным са сваіх інтэрв'ю Ядвіга Пастарнак.
«Сячкарню зацягнулі на самы дах»
Як аказваецца, хлопцы таксама жартавалі адмыслова.
— Яны попелам высыпалі дарожкі ад двара жаніха да двара нявесты, — дзеліцца ўспамінамі суразмоўніца. — Бывала, што комін каму-небудзь дошкай уначы прыкрыюць. Назаўтра гаспадар у печы паліць і не разумее, чаму дым не ідзе. А ў нейкай чужой вёсцы хлопцы зацягнулі на самы дах... жалезную сячкарню. Што рабіць, і яе прыходзілася неяк здымаць.
Пра сваё сучаснае жыццё ў Мулярах Ядвіга Пастарнак кажа: «Устану, у печы запалю і адседжваюся. Абавязкова памалюся. Цікавы часопіс пачытаю, калі ёсць, а пасля ўжо і спаць кладуся». Людзей тут жыве мала, а таму ў госці цяпер амаль ніхто не заходзіць. Праўда, колькі разоў на тыдзень да Ядвігі Пастарнак прыходзіць сацыяльны работнік. Пастаянна прыязджае ў вёску і аўталаўка. У нядзелю спадарыня Ядвіга па добрым звычаі выпраўляецца ў вілейскі касцёл на імшу. Між іншым, Новы год яна таксама збіраецца сустрэць у храме, падчас набажэнства.
— Ведаеце, мне сумна ніколі не бывае, — на развітанне з усмешкай прызнаецца жыхарка амаль пустой вёскі. — Справы ў мяне насамрэч заўжды знойдуцца.
Тарас ШЧЫРЫ.
Фота Надзеі Бужан.
Вілейскі раён.
P.S. Сяргей Лісіца і Максім Гінтаў, сябры Студэнцкага этнаграфічнага таварыства, таксама падрыхтавалі для спадарыні Ядвігі падарунак і выканалі некалькі народных песень. Расчуленая гаспадыня не вытрымала і... сама праспявала баладу «Чатыры мілі ад Варшавы» і сіроцкую песню «Адна я адна, як вішанька ў полі».
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?