А за выдаванне пэўнай iнфармацыi можа быць сур'ёзная адказнасць
Адмiнiстрацыя Прэзiдэнта Беларусi зацiкавiлася агучанай падчас размовы кiраўнiка дзяржавы Аляксандра Лукашэнкi з журналiстамi iнфармацыяй аб карупцыi. Пра гэта паведамiў намеснiк кiраўнiка Адмiнiстрацыi Прэзiдэнта Валерый Мiцкевiч.
Кiраўнiк Адмiнiстрацыi Аляксандр Косiнец учора правёў гутарку з галоўным рэдактарам i дырэктарам партала дзелавой iнфармацыi «Ежедневник» Сяргеем Сацуком. Па словах Валерыя Мiцкевiча, Сяргеем Сацуком не было прадастаўлена канкрэтных фактаў карупцыйных злачынстваў i праяў нi ў вусным, нi ў пiсьмовым выглядзе. «Ён абяцаў даць iнфармацыю, на аснове якой мы, вядома, будзем праводзiць адпаведную праверку ва ўстаноўленым законам парадку. Калi такая iнфармацыя будзе», — адзначыў намеснiк кiраўнiка Адмiнiстрацыi.
«Што тычыцца прэтэнзiй з нагоды забароны стасункаў з прэсай, то iнфармацыя i сёння прадастаўляецца журналiстам прэс-службай Следчага камiтэта, роўна як i прэс-службамi iншых праваахоўных органаў, — сказаў Валерый Мiцкевiч. — Што да прадастаўлення iнфармацыi напрамую следчым, то ёсць норма, якая забараняе выдаваць таямнiцу следства». Аднак з гэтай нормы ёсць выключэнне, калi следчы можа вызначыць аб'ём iнфармацыi, якую можна распаўсюдзiць, але пры гэтым яна не павiнна парушаць чыiхсьцi законных правоў i iнтарэсаў. У той жа час Валерый Мiцкевiч акцэнтаваў увагу на тым, што на стадыi папярэдняга следства складана вызначыць, хто i наколькi вiнаваты, таму любая iнфармацыя можа нанесцi шкоду той цi iншай асобе. «Адпаведна забаронаў нiякiх няма, але ёсць абмежаванне, прадугледжанае законам. I за выдаванне iнфармацыi прадугледжана крымiнальная адказнасць. Гэта значыць тыя асобы, якiя раней напрамую неафiцыйна давалi iнфармацыю, парушалi закон i павiнны былi несцi адказнасць», — растлумачыў намеснiк кiраўнiка Адмiнiстрацыi.
Паводле яго слоў, у дачыненні да звестак аператыўна-вышуковай дзейнасцi ўсё яшчэ стражэй, бо любая канфiдэнцыйная iнфармацыя, якую атрымлiваюць у рамках гэтай дзейнасцi, таксама абараняецца законам i не падлягае выдаванню. «I тут таксама прадугледжана крымiнальная адказнасць тых супрацоўнiкаў, якiя такую iнфармацыю выдаюць», — адзначыў Валерый Мiцкевiч. «Таму правiльна, што забаранiлi перадаваць па гэтым канале адпаведную iнфармацыю», — дадаў ён.
Уладзiслаў КУЛЕЦКI.
Сумесныя праекты ядзерных тэхналогій.