Валянціна ПУХ, дырэктар Брэсцкага філіяла РУП «Белпошта», сказала, што адным з галоўных набыткаў гэтага года стала адкрыццё чатырох новых аддзяленняў паштовай сувязі: у Кобрыне, Бярозе, Іванаве і Баранавічах.
— Сёмае аддзяленне адкрыта ў новым мікрараёне Кобрына, — гаворыць Валянціна Мікалаеўна. — І, як заўважыў на яго адкрыцці старшыня Кобрынскага гарвыканкама Аляксандр Зазуля, новая пошта адразу ж стала запатрабаваным сацыяльным аб'ектам. У сакавіку мы адсвяткавалі таксама адкрыццё аддзялення паштовай сувязі ў Бярозе. Менавіта адсвяткавалі, бо новыя аб'екты сведчаць аб тым, што паштовая галіна можа працаваць эфектыўна, адшукваючы магчымасці для свайго развіцця, для пашырэння спектра паслуг і павышэння якасці абслугоўвання.
Адкрыццё яшчэ аднаго паштовага аб'екта ў Іванаве атрымалася асабліва ўрачыстым, бо фактычна супала са святам абласных «Дажынак». У горад, які значна абнавіўся і памаладзеў да фестывалю, аддзяленне пад нумарам 1 упісалася даволі арганічна. І не толькі вонкавы выгляд будынка адпавядае сучасным патрабаванням, новая пошта абсталявана па апошнім слове тэхнікі. Кліенты маюць магчымасць адпраўляць паскораную пошту ЕМS, «Камфорт», «1 клас», а таксама атрымліваць грашовыя пераводы, пенсіі і дапамогі, ажыццяўляць самыя розныя плацяжы. Новы пункт паштовай сувязі з'явіўся не так даўно і ў Баранавічах.
— Брэст пражыў год у статусе культурнай сталіцы Беларусі, — працягвае Валянціна Пух. — На гэту падзею «Белпошта» адгукнулася выпускам канверта з арыгінальнай маркай «Брэст — культурная сталіца Беларусі 2015» накладам 40 тысяч экзэмпляраў. Першае спецыяльнае гашэнне канверта мы правялі 1 жніўня падчас святкавання Дня горада. Тады ж прайшла філатэлістычная выстава, прысвечаная культурнай сталіцы краіны.
Дваццаты, юбілейны фестываль тэатральнага мастацтва «Белая вежа» мы таксама адзначылі выпускам паштовай прадукцыі. Марка з серыі «Тэатры Беларусі» выйшла з надпісам «Брэсцкі акадэмічны тэатр драмы». На марцы адлюстравана сцэна са спектакля «Прымакі», пастаўленага брэсцкім тэатрам. Гашэнне адбылося на цырымоніі адкрыцця міжнароднага фестывалю.
У верасні споўнілася 150 гадоў дня заснавання Свята-Сімяонаўскага кафедральнага сабора ў Брэсце. Прыемна, што да падзеі духоўнага жыцця спрычынілася і пошта. Картка з маркай, прысвечанай названаму сабору, выйшла ў абарачэнне менавіта да юбілею, які шырока адзначалі ў горадзе над Бугам. І зусім нядаўна наша ведамства прэзентавала паштоўку з нагоды 350-годдзя манетнага двара ў Брэсце. Так што ў гэтым годзе мы ўвесь час знаходзіліся ў гушчы падзей свайго рэгіёна.
Святлана ЯСКЕВІЧ
yackevich@zviazda.by
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
