Лічба 13 ліпеньскага календара, як і трапічны лівень, не перашкодзілі моладзі здзівіць фестывальны Віцебск крэатывам, гатоўнасцю навучыць карысна бавіць час... Менавіта 13 ліпеня ў рамках афіцыйнай праграмы міжнароднага фестывалю "Славянскі базар у Віцебску" адбыўся традыцыйны Дзень моладзі.
Нават рэпарцёры, якія пабачылі ўжо шмат што, былі прыемна здзіўлены крэатыву маладых. Юнакі ў форме Вялікай Айчыннай, захопленыя гісторыяй ваеннага часу, веласіпедысты, якія паказвалі фантастычнае майстэрства валодання веласіпедам, байкеры — і ўсё гэта каля будынка дырэкцыі "базару" і ўнутры... Такое ўбачыш не кожны дзень.
— Гісторыя Дня моладзі на віцебскім "базары" пачынаецца з 2004 года, — нагадаў Ігар Бузоўскі, першы сакратар ЦК грамадскага аб'яднання "Беларускі рэспубліканскі саюз моладзі". — Мы пастараліся зрабіць усё магчымае, каб прадэманстраваць, што з кожным годам наша праграма становіцца ўсё больш маштабнай і крэатыўнай.
Сёлета гэта пацвердзіў парад моладзевых субкультур, у якім бралі ўдзел прадстаўнікі творчай і спартыўнай моладзі з усіх рэгіёнаў краіны.
Тут можна было ўбачыць бітбаксёраў, мастакоў графіці і бодзі-арту, велатрэалістаў, скейтбардыстаў, ролераў, прадстаўнікоў рыцарскіх клубаў, удзельнікаў моладзевых духавых і інструментальных аркестраў, аўтараў і выканаўцаў бардаўскай песні, поп і рок-гуртоў...
А падчас традыцыйнай патрыятычнай акцыі "Мы памятаем і ганарымся!" усе ўдзельнікі парада ўсклалі кветкі да мемарыяльнага комплексу на плошчы Перамогі і ўшанавалі памяць загінулых хвілінай маўчання.
А стартаваў Дзень моладзі увечары 12 ліпеня. Пад дэвізам "Сустракаем Дзень моладзі" на плошчы Перамогі адбылася музычная бітва дыджэяў "DJ NІGHT". Удзельнікі грандыёзнай танцавальнай моладзевай вечарынкі — лепшыя DJ Беларусі — пераможцы рэгіянальных адборачных тураў, якія праходзілі ва ўсіх рэгіёнах краіны і Мінску ў маі-чэрвені гэтага года, а таксама спецыяльныя госці мерапрыемства — папулярныя DJ'S з Расіі і Бельгіі.
Аляксандр ПУКШАНСКІ.
Фота Надзеі БУЖАН.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».