Медаль «За адвагу» гвардыі сяржанта Івана Самусенкі ўручылі яго сваякам.
У Гомельскім райвыканкаме расказалі, што ўзнагароду знайшлі мінулай восенню ў Новасакольніцкім раёне Пскоўскай вобласці члены пошукавага атрада «Вышыня». Па нумары на рэверсе валанцёры праз архіў Мінабароны Расіі вызначылі ўладальніка, жыхара Гомельшчыны Івана Пятровіча Самусенку.
Ён быў прызваны на фронт у 1941 годзе. У 1942-м сувязіста мінамётнага палка ўзнагародзілі медалём «За адвагу». Дажыць да Перамогі Івану не давялося: у 1944-м ён загінуў і быў пахаваны ў брацкай магіле каля вёскі Лукіно Новасакольніцкага раёна. Гомельскія калегі расійскіх пошукавікаў з ваенна-патрыятычнага клуба «Гонар» пазаштатнага цэнтра патрыятычнага выхавання і занятасці моладзі пры в/ч 5525 дапамаглі знайсці сваякоў Івана Самусенкі. Медаль уручылі стрыечнай сястры чырвонаармейца Галіне Уладынцавай падчас мітынгу, што адбыўся ў вёсцы Клімаўка Прыбыткаўскага сельсавета — каля мемарыяла жыхарам, якія загінулі ў гады Вялікай Айчыннай вайны. Зямлю з месца пахавання героя падсыпалі ў магілу яго бацькоў. Потым была адслужана паніхіда. А медаль «За адвагу» з гэтага часу будзе захоўвацца ў музеі Клімаўскай сярэдняй школы.
Ірына АСТАШКЕВІЧ.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?