Дэвіз сёлетняй кампаніі — «Бяспечная кроў для ратавання маці». Сусветная арганізацыя аховы здароўя ўказвае такім чынам на своечасовы доступ да бяспечнай крыві для папярэджвання мацярынскай смяротнасці. У свеце яшчэ застаюцца выпадкі гібелі жанчын ад ускладненняў цяжарнасці і родаў. Асноўная прычына — цяжкая страта крыві. Амаль усе гэтыя выпадкі адбываюцца ў Паўднёвай Афрыцы і Паўднёвай Азіі.
Штогод прыкладна 160 тысячам пацыентаў бальнічных арганізацый аховы здароўя нашай краіны пераліваюць донарскую кроў. Забяспечыць неабходныя запасы можна толькі пры ўмове рэгулярнай здачы крыві добраахвотнымі неаплатнымі донарамі.
— Нашы арганізацыі аховы здароўя ў поўным аб'ёме забяспечаны неабходнымі кампанентамі крыві і лекавымі сродкамі, якія атрымліваюць з плазмы крыві, уключаючы забеспячэнне гематрансфузійнага (з пераліваннем крыві) суправаджэння высокатэхналагічных аператыўных умяшанняў, — паведамляе дырэктар Рэспубліканскага навукова-практычнага цэнтра трансфузіялогіі і медыцынскіх біятэхналогій Генадзь ХУЛУП. — Летась упершыню за 80 гадоў існавання служба крыві перавысіла нарыхтоўку плазмы. Наогул удалося перавыканаць усе паказчыкі дзейнасці.
Летась у краіне пачалася актыўная работа па развіцці бязвыплатнага донарства. Арганізатарамі такога донарства з'яўляюцца ўсе медработнікі, грамадскія арганізацыі і аб'яднанні. Усяго ў бязвыплатным донарстве ў 2013 годзе ўзялі ўдзел 3600 чалавек.
Кроў і прадукты крыві лічаць унікальным рэсурсам, які можна атрымаць толькі ад людзей, якія здаюць кроў або яе кампаненты. Самымі бяспечнымі лічацца донары-добраахвотнікі — альтруісты, якія адчуваюць маральны доўг і сацыяльную адказнасць. У іх няма падстаў утойваць інфармацыю пра свой лад жыцця ці медыцынскі стан, які робіць здачу крыві немагчымай. Адзінай узнагародай тут становяцца самапавага і гонар. СААЗ заклікала ўсе краіны да 2020 года перайсці на сістэму рэгулярнага бязвыплатнага добраахвотнага донарства крыві.
Сярод асноўных прынцыпаў нацыянальнай палітыкі забеспячэння донарства крыві і яе кампанентаў — поўнае самазабеспячэнне краіны якаснымі кампанентамі і лекавымі сродкамі з плазмы крыві, стварэнне дастатковага запасу. Асаблівая ўвага надаецца бяспецы ў акушэрскай і педыятрычнай практыцы. Створаны запасы плазмы, усіх груп крыві, уключаючы рэзус-адмоўную, выкарыстоўваецца тэхналогія атрымання «дзіцячых доз» кампанентаў крыві.
У межах пілотнага праекта ствараецца электронная база даных донараў крыві і яе кампанентаў, штрых-кадзіраванне донарскай дакументацыі прадуктаў крыві.
Назіранні за донарамі, якія здаюць кроў на працягу многіх гадоў, не выявілі ў гэтых людзей ніякіх адхіленняў, звязаных з кровадачамі. Спецыялісты заклікаюць грамадства паразважаць над тым, што нават калі чалавек па стане здароўя не можа быць донарам, ён павінен далучыцца да донарскага руху ў якасці прапагандыста.
— Паводле статыстыкі, адна данацыя можа выратаваць да 3 жыццяў, — тлумачыць загадчыца лабараторыі 11-й гарадской паліклінікі г. Мінска Ала РАДЗЮК. — Патраціўшы трэць гадзіны ў пункце здачы крыві, вы можаце падарыць жыццё некалькім людзям. У сярэднім мужчыны могуць здаваць кроў 5 разоў на год, жанчыны — 4. Па сутнасці, за год донар можа выратаваць 12 чалавек! Кроў донара з'яўляецца ўнікальным і незаменным лекавым сродкам. Нават самыя дарагія прэпараты могуць аказацца бессэнсоўнымі, калі жыццё чалавека залежыць толькі ад своечасова пералітай крыві.
Донарства плюс... фрыстайл
У 6-й гарадской клінічнай бальніцы г. Мінска да донарства далучыліся і беларусы, чые імёны на слыху: Святлана Грышына (мастацкая гімнастыка), Дзмітрый Дашчынскі (фрыстайл), Андрэй Стась і Дзмітрый Мільчакоў (хакейны клуб «Дынама-Мінск»), Вадзім Дзевятоўскі (кідальнік молата), Ірына Бойцік (дызайнер), Яна Станкевіч (прадзюсар), Юлія Кур'ян (ПУП «Промафільм»).
Дарэчы, адным з самых вядомых донараў з'яўляецца аўстраліец Джэйм Харысан, якога донарская кроў выратавала ў 13-гадовым узросце. У 18-ць ён сам свядома стаў донарам. За сваё жыццё гэты чалавек здаў кроў амаль 1000 разоў, і яго рэдкая група крыві дапамагла выжыць немаўлятам з цяжкай формай анеміі. Гэта неверагодна, але яго кроў выратавала, паводле прыблізных падлікаў, 2 млн нованароджаных!
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?