Супрацоўнікі КДК Магілёўскай вобласці прапанавалі сваё выйсце з праблемнай сітуацыі
Падчас работы працоўнай групы па праблемных пытаннях у сістэме ЖКГ высветлілася, што ў Магілёўскай вобласці 1188 жылых дамоў маюць патрэбу ў капрамонце. Не ўсё ідэальна і на астатніх 8,5 тысячы будынках. На кожным чацвёртым — значна зношаныя асобныя элементы канструкцыі. Каб аднавіць састарэлы жыллёвы фонд, трэба больш за 12 трыльёнаў рублёў. Але дзе іх узяць? Тых сродкаў, якія насельніцтва адлічвае на гэтыя мэты, недастаткова. Пры існуючых аб'ёмах і тэмпах фінансавання спатрэбіцца больш за 18 гадоў, каб вырашыць праблему. Але ж за гэты час з'явяцца іншыя дамы, якія таксама трэба будзе аднавіць. Атрымліваецца замкнёнае кола. Магілёўскія кантралёры ўнеслі свае прапановы, як выйсці з яго.
Фінансы спяваюць рамансы
Кантралёры прыйшлі да высновы, што сістэма адлічэння сродкаў на капрамонт, як і іх размеркаванне, сёння недасканалыя.
— Гэты тарыф для насельніцтва нічым не абгрунтаваны, — тлумачыць начальнік аддзела КДК Магілёўскай вобласці Людміла Непапушава. — Сёння ён роўны штомесячнаму плацяжу за тэхнічнае абслугоўванне і складае не больш за пятую частку ад агульнага памеру камунальных плацяжоў грамадзян.
Пры гэтым не ўлічваюцца тып жылога дома, тэрмін эксплуатацыі яго канструкцыйных элементаў, інжынернага абсталявання, іншых істотных фактараў. Такім чынам, чым больш у нас становіцца старога жылога фонду, тым менш шанцаў у асобна ўзятага дома трапіць у спіс на капрамонт.
Не на карысць справе і тое, што гэтыя грошы акумулююцца на рахунках жыллёва-эксплуатацыйных арганізацый, дзе нават колькасць старога і новага жылфонду розная. Напрыклад, на балансе ЖРЭУ Кастрычніцкага раёна 681 дом, 619 з якіх маюць патрэбу ў рамонце канструкцыйных элементаў і інжынернага абсталявання. А ў магілёўскага ГАА «ЖылЭкспА» 59 дамоў і толькі на 5 з іх скончыліся нарматыўныя тэрміны эксплуатацыі дахаў. Сёлета ў ЖРЭУ плануюць на сабраныя сродкі адрамантаваць 8 дамоў — на больш проста не хапае грошай. А вось «ЖылЭкспА», наадварот, мае магчымасць вольна распараджацца гэтымі фінансамі, прычым не заўсёды па прызначэнні. За мінулыя 2 гады яно выдаткавала больш за 500 мільёнаў рублёў на абсталяванне дваравых тэрыторый сістэмамі відэаназірання, што ніяк не адносіцца да капітальнага рамонту жылля. А летась змясціла 1,7 мільярда рублёў на банкаўскі дэпазіт, што таксама недапушчальна.
Без даху над галавой
Жыльцы збіраюць грошы на капрамонт, а яго якасць вымушае жадаць лепшага. На «гарачую» тэлефонную лінію, якая праводзілася Дзяжкантролем, паступіла 25 нараканняў менавіта на капрамонт. Найбольш незадаволенымі засталіся жыхары Магілёва, Бабруйска, Магілёўскага і Клімавіцкага раёнаў.
— Іх скаргі датычыліся затаплення кватэр атмасфернымі асадкамі непасрэдна пры правядзенні капрамонту дахаў, — адзначае Людміла Непапушава. — Як высветлілася, ахоўныя мерапрыемствы пры правядзенні такіх работ наогул не прадугледжаны праектнай дакументацыяй. У выніку жыхарам наносіцца значная шкода, якая патрабуе дадатковых выдаткаў для кампенсацыі. Чаму б Мінжылкамгасу сумесна з Мінбудархітэктуры не ўключыць у праектна-каштарысную дакументацыю рашэнне па стварэнні ахоўных канструкцый даху?
Дапамагло б сэканоміць дзяржаўныя сродкі і прымяненне тыпавых праектных рашэнняў для канкрэтных відаў работ у дамах, пабудаваных па аднолькавай схеме — па рамонце дахаў, парапетаў, ганкаў, лоджый, пандусаў для інвалідаў-калясачнікаў… Толькі на гэтым ЖРЭУ Кастрычніцкага раёна магло сэканоміць за мінулыя 2 гады каля 130 мільёнаў рублёў.
Хто адказны за тэрміны і якасць?
Калісьці Міхаіл Жванецкі пажартаваў: маўляў, рамонт нельга закончыць, яго можна толькі пачаць. У Магілёве быў выпадак, калі пачаты яшчэ ў 2010 годзе рамонт жылога дома пры нарматыўных тэрмінах ад 4 да 6 месяцаў працягваўся аж 3 гады. Тэрміны зацягнуліся не без удзелу жыхароў, якія адмаўляліся ад прадугледжаных праектам змяненняў і ставілі свае ўмовы. Напрыклад, патрабавалі замест капрамонту фасада правесці яго цеплавую мадэрнізацыю.
— Так быць не павінна, — упэўнена Людміла Непапушава. — Гэтыя пытанні трэба вырашаць на пачатковым этапе, яшчэ пры даследаванні спецыялістамі дома, каб потым не ўносіць змяненні ў праектна-каштарысную дакументацыю. Выклікае нараканні нізкі прафесійны ўзровень майстроў і прарабаў, якія не могуць належным чынам арганізаваць працу. Гэта адбіваецца на тэрмінах выканання рамонту і яго якасці. Каб такога не адбывалася, мы прапануем на дзяржаўным узроўні прапрацаваць магчымасць падрыхтоўкі навучальнымі ўстановамі краіны адпаведных спецыялістаў.
На думку кантралёраў, іх заўвагі дапамогуць скараціць тэрміны правядзення капрамонту і больш рацыянальна выкарыстоўваць сродкі на яго. Дадатковымі ж крыніцамі фінансавання маглі б стаць спецыяльныя доўгатэрміновыя льготныя крэдыты для арганізацый ЖКГ і ўвядзенне на дзяржаўным узроўні абавязковага страхавання памяшканняў у шматкватэрных жылых дамах. Заў-
вагі супрацоўнікаў КДК Магілёўскай вобласці былі прапанаваны для ўнясення ў праект указа аб мерах па ўдасканаленні працы ў сістэме ЖКГ. Як тут мяркуюць, гэта будзе мець свой плён.
Нэлі ЗІГУЛЯ.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?