Зборная Германіі чацвёрты раз у гісторыі стала чэмпіёнам свету па футболе
Усё ж такі футболам кіруе не толькі фартуна, але і вялікая логіка разам са справядлівасцю. Сум і расчараванне аргенцінскіх балельшчыкаў, якія да апошняга верылі ў вікторыю сваіх хлопцаў, патанулі ў моры нямецкага шчасця. Усё па справе. «Бундэсманшафт» правяла бразільскі чэмпіянат на адным подыху і яшчэ на групавым этапе лічылася адным з фаварытаў першынства. Іх імкненне да перамогі было заўважна ў кожным паядынку, а паўфінал з Бразіліяй стаў наогул фестывалем галявой разнастайнасці. 7:1 — яшчэ ніколі бразільцы не саступалі з такой розніцай. Тым больш на сваім стадыёне.
З кожным матчам нямецкая хада станавілася больш упэўненай, а шанцы на перамогу — амаль матэрыяльнымі. У апошняй сустрэчы мары немцаў ажыццявіліся толькі на апошніх хвілінах дадатковага часу, калі 22-гадовы Марыа Гётцэ выдатна злавіў мяч, а пасля «забойнай» левай нагой адправіў яго ў супрацьлеглы ад сябе кут. У гутаперчывага Серхіа Рамера проста не было шанцаў. 1:0 — чэмпіёнскі кубак едзе ў Германію. Між іншым, гэта першая буйная перамога аб'яднанай Германіі на мундзіялі. Сваё мінулае сусветнае «золата» немцы бралі яшчэ пад абрэвіятурай ФРГ у 1990 годзе, за некалькі месяцаў да гістарычнага злучэння з ГДР. А што з Аргенцінай, спытаеце вы? Падапечныя Алехандра Сабельі на гэтым чэмпіянаце прадэманстравалі найперш настойлівасць, мэтанакіраванасць і ледзь не датрывалі да серыі пасляматчавых пенальці ў фінальнай сустрэчы. Але тут на авансцэну выйшаў Марыа Гётцэ...
Ёахім Лёў, галоўны трэнер зборнай Германіі:
— Мы пачалі гэты праект 10 гадоў таму, і тое, што адбылося сёння, — вынік шматгадовай працы, якую распачаў Юрген Клінсман. Мы пастаянна прагрэсіравалі, верылі ў гэты праект, упарта працавалі. І калі хто заслугоўваў поспех, дык гэта наша каманда. Мы заўжды паказвалі добры футбол, і, я мяркую, што на працягу ўсяго турніру, ва ўсіх сямі матчах, менавіта мы дэманстравалі лепшую гульню.
Алехандра Сабелья, галоўны трэнер зборнай Аргенціны:
— Гэта быў вельмі ўпарты матч. І калі вы робіце памылку ў такім паядынку, яе вельмі цяжка выправіць. Але ў цэлым я ганаруся сваімі футбалістамі, якія правялі вельмі добры Кубак свету. Яны аддалі ўсё за краіну. Яны могуць паглядзець у люстэрка і шчыра сказаць, што зрабілі ўсё, што маглі. Віншую ўсіх футбалістаў, якія выканалі неверагодную працу.
Марыа Гётцэ, паўабаронца зборнай Германіі:
— У тым моманце я проста прабіў па варотах і не ведаў, чаго ад гэтага чакаць. Я і дагэтуль не магу паверыць, што здолеў адзначыцца голам. Наша мара здзейснілася! Кожны член нашай каманды заслугоўвае, каб яго імя было адлюстравана на гэтым трафеі. Мы ганарымся тым, што здолелі яго заваяваць.
Луі ван Гал, галоўны трэнер зборнай Галандыі, бронзавага прызёра чэмпіянату:
— У мяне была мара папрацаваць на першынстве свету і перамагчы. Яна не ажыццявілася, але тое, як мы гулялі і як прайгралі, выклікае прыемныя пачуцці. Няхай мы сталі толькі трэцімі, аднак, калі турнір завяршаецца перамогай, настрой паляпшаецца. Я ў апошні раз трэніраваў зборную Галандыі і заваяваў медаль. Усе футбалісты выканалі мае патрабаванні, а гэта лепшае, што можа атрымаць трэнер. Усе 23 гульцы назаўжды будуць у маім сэрцы.
Тарас ШЧЫРЫ.
Фота REUTERS i FIFA via Getty images.
Сумесныя праекты ядзерных тэхналогій.