Ліпеньскі зарад літаратурнага задавальнення

На падыходзе чарговая, сёмая «Маладосць»

А значыць, аматары часопіса зноў маюць нядрэнны шанц атрымаць зарад літаратурнага задавальнення. Што ж мы знойдзем пад вокладкай ліпеньскага нумара? Пройдземся звыклым маладосцеўскім маршрутам паэзія-проза-крытыка-публіцыстыка.

Пагаворым пра паэзію. Тут прадстаўлены Алесь Круткін і Юрка Буйнюк — маладыя аўтары маладой і дзёрзкай паэзіі. Чарговай партыяй сваіх дасціпных вершаў вас пацешаць сталы ўжо маладосцевец Віктар Лупасін, а таксама паэт Дзмітрый Пятровіч.

З празаікаў сёмага нумара «Маладосці» найбольш адметны аўтар-«навічок» Андрэй З-і з надзвычай спецыфічнай навелай-эпапеяй «Рака», якая будзе сапраўднай «цукерачкай» для аматараў паблукаць па лабірынтах і неадназначных вобразах. Чытайце ў нумары таксама працяг аповесці Віталіі Багун «Гігантык», касмічна-фантастычнай версіі славутага «Тытаніка», ды новы твор Валерыя Гапеева «Неадпраўленая аповесць».

Сярод крытычных матэрыялаў вы знойдзеце глыбокі аналіз матываў Гётэ ў творчасці Уладзіміра Караткевіча, праведзены даследчыцай літаратуры Евай Лявонавай. Фігура Караткевіча, дарэчы, стаіць «у цэнтры» ліпеньскага нумара, бо менавіта на гэты месяц прыпадае дзень адыходу пісьменніка ў лепшы свет. Уладзіміру Сямёнавічу прысвечана традыцыйная маладосцеўская апытанка, дзе чытачы часопіса дзеляцца асацыяцыямі і ўражаннямі адносна пісьменніка і яго твораў.

У рубрыцы «Эпісталярый» вы знойдзеце сапраўды эксклюзіўны матэрыял — ліст Караткевіча да жонкі, напісаны падчас адпачынку ў Друскеніках. Прачытаўшы яго, вы ўбачыце пісьменніка з нефармальнага боку, што ў выпадку з Караткевічам асабліва каштоўна, бо ён быў неверагодна магутнай і прыгожай асобай, чалавекам, якім можна ганарыцца і захапляцца. Акрамя таго, вы зможаце ацаніць здольнасці Караткевіча-мастака.

Працягвае нас радаваць рубрыка «ГістфакТ», дзе па-ранейшаму вахту нясе Полацкі дзяржаўны ўніверсітэт. Чытайце працяг захапляльных мемуараў філарэта Эдварда Тамаша Масальскага, сучасніка і аднадумцы славутых Адама Міцкевіча, Яна Чачота і Тамаша Зана. Дар'я Палынская, студэнтка гістфака таго самага Полацкага ўніверсітэта, вырашыла падзяліцца даволі інтымным матэрыялам — дзённікам сваёй этнаграфічнай практыкі. Гэты дзённік пагрузіць вас у бесклапотную, творчую, поўную энергіі і энтузіязму атмасферу студэнцтва і не раз прымусіць усміхнуцца.

Публіцыстыка сёмага нумара «Маладосці» — гэта інтэрв'ю з цікавымі маладымі асобамі ў рубрыках «Выбітныя» і «Без вышэйшай адукацыі», артыкул псіхолага Святланы Сітнік пра цэласнасць быцця і многае іншае... Чытайце «Маладосць» і не дазваляйце лету быць сумным!