Вы тут

Гісторыя маёй сям'і


У фае Магілёўскай мытні адкрылася незвычайная выстава

Усе яе экспанаты прынеслі са сваіх сямейных архіваў супрацоўнікі гэтай установы. Сярод іх — копіі фатаграфій дзядоў і прадзедаў, удзельнікаў вайны, узнагародныя і пахавальныя лісты, даведкі, паведамленні аб зніклых без вестак...

— Выстава прысвечана 70-годдзю вызвалення Беларусі ад нямецка-фашысцкіх захопнікаў, — кажа намеснік начальніка аддзела кадраў і ідэалагічнай работы Эла Чарнова. — Мы вырашылі паказаць, што кожны з нас мае дачыненне да той Перамогі.

OLYMPUS DIGITAL CAMERA

Сярод фота ёсць і сапраўды рарытэтныя. На здымку 69-гадовай даўніны чацвёра бравых салдат сядзяць за сталом з келіхамі піва. Ды не абы-дзе, а ў Германіі. Вайна скончылася, і зусім хутка яны вернуцца дадому. Аж не верыцца, што ім пашчасціла ўцалець у той мясарубцы. «Гэта Дзмітрый Іванавіч Ігнаценка — дзед нашага галоўнага інспектара Таццяны Галанчанкі, — удакладняе Эла Іосіфаўна. — Ён быў прызваны на фронт у першыя дні вайны. Але эшалон трапіў пад бамбёжку. Шмат людзей загінула, а дзед нашай супрацоўніцы і яшчэ адзін яго аднавясковец не ведалі, што рабіць, і вярнуліся дахаты. Іх забралі зноў і адправілі ўжо на перадавую. Дзмітрый Іванавіч быў некалькі разоў паранены, але яму пашчасціла дайсці да Берліна. Там ён і сустрэў Перамогу. На здымку ён з таварышамі якраз яе і адзначае. Родныя, на жаль, не ведаюць, дзе дакладна знаходзілася гэтая кавярня, але дзед казаў, што каля рэйхстага».

А вось начальнік аддзела мытных расследаванняў Ігар Балук дзякуючы выставе нават знайшоў новыя звесткі пра свайго дзеда — Мікалая Мікалаевіча Казлова. Да нядаўняга часу, акрамя фатаграфіі свайго 28-гадовага продка, ён нічога не меў. Пасля вайны родныя шукалі яго, але з ваенкамата прыйшоў толькі невялічкі адказ: прапаў без вестак у маі 1945-га. Яго старэйшы сын, калі служыў у Германіі, нават хадзіў па савецкіх мемарыялах у спадзяванні, што знойдзе роднае прозвішча. Безвынікова. Шукалі звесткі і ў архівах, і праз перадачу «Чакай мяне»... «Калі я прынёс гэтае фота на нашу выставу, мне падказалі адрас сайта «Подзвіг народа», дзе я знайшоў 2 загады, — распавёў Ігар Мікалаевіч. — З іх я даведаўся, што ў дзеда было 2 медалі «За адвагу». Адзін ён атрымаў у канцы 1944 года, а другі — у самым пачатку 1945-га. Ён быў старшым тэлефаністам і вызначыўся, калі пад моцным агнём праціўніка забяспечваў бесперапынную сувязь назіральнага пункта з батарэяй. У інтэрнэце я прасачыў баявы шлях дывізіі, дзе ён ваяваў. Яна была сфарміравана ў Новарасійску, вызваляла Крым, Чарнігаў, Брэст, Польшчу, а свой шлях завяршыла на Эльбе. Калі я прыйшоў да маці з гэтымі ўзнагароднымі лістамі, яна ўзяла іх у рукі, села і заплакала...»

Прыкладаў мужнасці і самаахвярнасці, аб якіх сведчыць выстава, вельмі шмат. У старшага інспектара Вольгі Канічэнкі ваявалі і дзед, і прадзед. Прадзед Пётр Васільевіч Дракаў узначальваў падпольную арганізацыю Магілёўскай чыгункі, якая забяспечвала інфармацыяй партызан і праводзіла дыверсіі. Летам 1943-га ўсе 16 чалавек гэтай арганізацыі былі арыштаваны і пакараны смерцю. Пётр Дракаў пасмяротна ўзнагароджаны ордэнам Айчыннай вайны І ступені. Яго прозвішча пазначана на мемарыяльнай дошцы на будынку чыгуначнага вакзала.

Кожная гісторыя заслугоўвае таго, каб трапіць у летапіс памяці. Дарэчы, як запэўніла Эла Іосіфаўна, адкрыццё экспазіцыі — гэта толькі пачатак вялікай акцыі. Яна яшчэ будзе папаўняцца. А вынікам стане выданне кнігі памяці ў наступным годзе.

Нэлі ЗІГУЛЯ.

Фота аўтара

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».