Прычынай пажару можа стаць і трэшчына на коміне, і пакінутая "зарадка" ад тэлефона
Пачатак ацяпляльнага сезона ў Беларусі не за гарамі. І ўжо цяпер паўстае пытанне: як не толькі правільна падрыхтаваць сваё жытло да халоднага перыяду, але і правесці гэты час без бяды? Расказаць пра гэта карэспандэнт "Звязды" папрасіў начальніка аддзела арганізацыі прафілактычнай работы Міністэрства па надзвычайных сітуацыях Руслана ЛІХАМАНАВА.
Праверце печ цяпер
"У прыватным доме, як правіла, асноўная крыніца цяпла — гэта печ. І ўжо цяпер, на пачатку восені, трэба праводзіць яе тэхнічнае абслугоўванне. Праверце, ці няма на ёй расколінн, ці шчыльна зачыняюцца дзверцы, прачысціце дымаход. Трэба абавязкова пабяліць печ. Гэта робіцца для таго, каб падчас прапальвання высветліліся магчымыя слабыя месцы. — напрыклад, незаўважныя вокам шчыліны або выкрышаныя швы.
Побач з топачнай дзверцай на падлозе мусіць быць прыбіты металічны ліст памерам 50 на 75 сантыметраў. Гэтая мера перасцярогі патрэбна для таго, каб пажар не пачаўся ад вугольчыка, які можа выпадкова выпасці. Не распальвайце агонь з дапамогай лёгкаўзгаральных вадкасцяў і не кладзіце ў топку дровы, з-за даўжыні якіх дзверцы не могуць зачыніцца. Паліце ў печы самі, не дазваляйце рабіць гэта дзецям. За дзве гадзіны да таго, як пакінуць хату або легчы спаць, спыняйце паленне. І ні ў якім разе не дапускайце магчымасці перагравання печы. Яно можа адбыцца не толькі тады, калі топка будзе працягвацца гадзінамі без перапынку, але і калі печ працуе не на тым відзе паліва, для якога яна прызначана.
А парушэнне гэтых няхітрых правіл можа каштаваць вельмі дорага. Сёлета ў студзені ратаўнікоў выклікалі жыхары вёскі Вербеж Чэрыкаўскага раёна Магілёўскай вобласці. Гарэў прыватны дом. Яшчэ да прыбыцця спецыялістаў суседзі дапамаглі выйсці на вуліцу кабеце і яе мужу. Прычынай пажару стала трэшчына на коміне печы. На шчасце, тут абышлося без загінулых. Аднак агулам жа толькі з-за няправільнай эксплуатацыі пячнога абсталявання сёлета ў краіне адбылося 676 пажараў. За памылкі заплацілі жыццём 29 чалавек... "
Падводны камень "рэжыму чакання"
"Сезонная прычына, па якой узнікаюць пажары ў халодны час году, — гэта парушэнне правіл карыстання электрапрыборамі. Светлавы дзень робіцца зусім маленькім, адпаведна, электрычныя сеткі эксплуатуюцца больш інтэнсіўна. Дадайце да гэтага карыстанне абагравальнікамі, якія энергазберагальнымі назваць не выпадае. І аднойчы сетка акажацца перагружанай. Да таго ж трэба карыстацца толькі тым абагравальнікам, які выраблены прамысловым спосабам, сертыфікаваны на тэрыторыі Беларусі і мае інструкцыю па эксплуатацыі. Калі ж тэрмін службы абагравальніка скончыўся — лепш аднясіце яго на сметніцу і набудзьце новы. З гэтым прыборам жартаваць нельга. Бо наступствы могуць быць і самымі цяжкімі...
Напрыканцы студзеня ў адным з інтэрнатаў у Мінску адкрытым полымем гарэў пакой на чацвёртым паверсе. Гаспадыня паспела выйсці з пекла яшчэ да таго, як на месца падзей прыехалі ратаўнікі, якія эвакуявалі дваццаць чалавек. На шчасце, пажар ніводнага жыцця не забраў. Усё скончылася пашкоджанай маёмасцю і закураным калідорам чацвёртага паверха. Як пасля высветлілася, пакой загарэўся з-за кароткага замыкання. Адначасова працавала шмат электрапрыбораў, у тым ліку і абагравальнік. І сетка не вытрымала...
Амаль ва ўсіх сучасных электрапрыборах ёсць функцыя рэжыму чакання. На першы погляд, гэта даволі зручна — не трэба кожны раз падключаць той жа тэлевізар, мікрахвалевую печ або музычны цэнтр. Пакідаюць людзі ў разетках і зарадныя прылады ад мабільных тэлефонаў. Матыў гэтага ўчынку просты — навошта кожны раз шукаць прыладу, якая лёгка губляецца? Аднак калі вы выходзіце з хаты, дзе ў такім рэжыме працуюць электрапрыборы, то вы аўтаматычна пакідаеце іх без назірання. І аднойчы гэта можа скончыцца дрэннымі наступствамі.
Так, у інтэрнаце прадпрыемства "Магілёўхімвалакно" загарэўся пакой. Ратаўнікі прыбылі на месца аператыўна, полымя вялікай бяды нарабіць не паспела. Прычынай пажару стаў пакінуты ў рэжыме чакання тэлевізар..."
Зберажы сябе сам
"Каб наша праца была больш эфектыўнай, да яе падключаюцца ў тым ліку ў залежнасці ад абставін органы мясцовай выканаўчай улады, унутраных спраў і адукацыі. Акцэнт мы робім на тых грамадзянах, якія адносяцца да групы рызыкі. Гэта адзінокія людзі, якія часта з-за стану здароўя або недахопу фінансаў не могуць самастойна адрамантаваць печ або электраправодку; шматдзетныя сем'і і асобы, якія злоўжываюць спіртнымі напоямі.
У Беларусі рэалізуюцца тры дзяржаўныя праграмы, скіраваныя на рэсурснае забеспячэнне супрацьпажарных мерапрыемстваў па рамонце печаў і электраправодкі, а таксама ўсталявання аўтаномных пажарных апавяшчальнікаў з магчымасцю вываду сігналу на фасад будынка. І гэтае тэхнічнае рашэнне можна назваць вельмі эфектыўным. Прыгадваецца выпадак, які адбыўся ў Брэсцкай вобласці. Загарэўся прыватны дом, у якім быў аўтаномны пажарны апавяшчальнік. Там знаходзіліся п'яны бацька і малое дзіця. Сігнал апавяшчальніка быў выведзены на фасад будынка. Адлік часу ішоў на секунды. Усё магло б скончыцца трагічна, але на дапамогу паспеў прыйсці сусед, які пачуў сігнал трывогі. Ён выбіў шыбу і паспеў выцягнуць адтуль людзей".
Агульнарэспубліканскую акцыю па папярэджанні пажараў і гібелі ад іх людзей у жыллёвым фондзе падчас асенне-зімовага пажаранебяспечнага перыяду ратаўнікі будуць праводзіць на працягу ўсяго кастрычніка. А далучыцца да яе можа кожны чалавек. Дастаткова толькі мець або усталяваць у сваім жытле аўтаномны пажарны апавяшчальнік. Каштуе апарат не так і дорага: каля ста тысяч рублёў. Аднак толькі за сем месяцаў сёлета гэтыя прыборы ўратавалі 57 чалавечых жыццяў...
На пачатак верасня ў краіне адбылося 4505 пажараў, у якіх загінулі 420 чалавек.
Валяр'ян ШКЛЕННІК.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.