Пракуратура Мінскай вобласці санкцыянавала заключэнне пад варту былога спецыяліста філіяла ААТ «Белаграпрамбанк» аднаго з райцэнтраў краіны.
Жанчына на працягу 2010 і 2011 гадоў, не маючы права на аўтарызацыю правядзення аперацый з банкаўскімі рахункамі, уводзіла ад імя ўкладчыкаў у камп'ютарную сістэму заведама лжывую інфармацыю аб тым, што ўклады выкарыстоўваюцца іх утрымальнікамі. Такім чынам яна ўкрала больш як
35 млн рублёў, па абменным курсе на той час — 10 тыс. долараў ЗША. Затым, каб скрыць свае дзеянні, уносіла фіктыўныя звесткі ў расходна-касавыя ордэры, падрабляючы подпісы ўкладчыкаў, кантралёра, адказнага выканаўцы і касіра.
Як адзначыў намеснік пракурора Мінскай вобласці Аляксандр Беліцкі, гэтае злачынства атрымала вялікі грамадскі рэзананс. Перш за ўсё таму, што пацярпелымі з'яўляюцца 10 выхаванцаў дапаможнай школы-інтэрната для сірот і дзяцей, якія засталіся без апекі бацькоў.
Былой ужо работніцы банка прад'яўлена абвінавачванне ў крадзяжы маёмасці з выкарыстаннем камп'ютарнай тэхнікі ў асабліва буйным памеры, а таксама ў службовым падлозе. Такія дзеянні цягнуць за сабой пазбаўленне волі тэрмінам ад 3 да 10 гадоў з канфіскацыяй маёмасці.
Таццяна ЛАЗОЎСКАЯ.
Сумесныя праекты ядзерных тэхналогій.