Аршанскі, Дубровенскі, Талачынскі раёны, на думку старшыні Віцебскага аблвыканкама Мікалая Шарстнёва, павінны стаць «лакаматывамі» для вывядзення на новы ўзровень сельскагаспадарчай галіны вобласці. Яны маюць перавагу па кліматычных і іншых умовах.
Менавіта таму на планёрцы ў Мікалая Мікалаевіча ў цэнтры ўвагі была Аршаншчына. Ён ужо не першы раз асабіста азнаёміўся са станам спраў у родным для яго рэгіёне. І паўночная частка, вельмі недагледжаная, непрыемна ўразіла Мікалая Шарстнёва. У прыватнасці, у філіяле «Цяплічны» прадпрыемства «Віцебскэнерга» палі не ідуць ні ў якае параўнанне з пасевамі ў іншых гаспадарках... А ўсё таму, што не навялі парадак, не забяспечылі тэхналагічную дысцыпліну. Адпаведныя даручэнні былі дадзены яшчэ восенню. Кіраўнік вобласці канстатаваў, што праблема ў слабасці агранамічнай службы. Гэта і прыводзіць да адсутнасці культуры земляробства, парушэнняў пры апрацоўцы глебы.
На планёрцы былі агучаны і крытычныя заўвагі наконт стану жывёлагадоўлі, агародніцтва ў гаспадарцы. Кіраўнікі павінны павялічваць пагалоўе жывёлы, прааналізаваць сабекошт агародніннай прадукцыі. Бадай, нагодай для фельетонаў можа быць наступны факт. Аказваецца, кошт уласнай электраэнергіі ў сабекошце вырошчвання памідораў каля 60%. А выручка на працоўнага ў «Цяплічным» у чатыры разы ніжэйшая, чым у іншай гаспадарцы раёна.
— Гэта сведчыць пра слабы прафесійны ўзровень спецыялістаў. Усе гаспадаркі, інтэграваныя з інвестарамі, павінны быць прыбытковымі. Неабходна пралічваць эфектыўнасць фінансавых укладанняў. А пакуль інвестары працуюць пераважна як «фінансавыя пажарныя». Па прынцыпе: «Патрэбны калгасу грошы? Дадзім!» Так быць не павінна і не будзе... Вызначаем перспектывы развіцця філіяла «Цяплічны», дзейнасць — на жорсткі кантроль, — сказаў Мікалай Шарстнёў.
Ёсць абгрунтаваныя прэтэнзіі і да дзейнасці гаспадарак «Межава», «Маяк Высокае». Дарэчы, дадзена негатыўная ацэнка працы чыноўнікаў райвыканкама, якія слаба ўплываюць на павышэнне вынікаў вытворчасці. А станоўчыя паказчыкі забяспечваюцца пераважна за кошт паўднёвай часткі Аршаншчыны.
— Сельская гаспадарка патрабуе пастаяннай, сістэмнай працы, — рэзюмаваў Мікалай Шарстнёў. — Толькі пры такім падыходзе будзем мець станоўчы вынік.
Аляксандр ПУКШАНСКІ.
pukshanskі@zvіazda.by
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
