На спецыяльнасці “Кіраванне ў рэальным сектары эканомікі” будуць рыхтаваць прафесіяналаў з інжынернымі ведамі, крэатыўным мысленнем і выдатным валоданнем дзелавой англійскай мовай.
Адукацыйная праграма, якая адпавядае самым высокім еўрапейскім стандартам якасці, распрацавана Беларускім дзяржаўным універсітэтам сумесна з універсітэтам прыкладных навук г.Мітвайда (Германія).
-- Магістратура мае практыка-арыентаваны характар. Вучэбны працэс будзе грунтавацца на абсалютна новым падыходзе да навучання, -- тлумачыць кіраўнік праграмы, прарэктар па вучэбнай рабоце, доктар эканамічных навук Аляксей ДАНІЛЬЧАНКА. -- Магістрантам прадастаўляецца магчымасць самастойна фарміраваць сваю траекторыю навучання, якое складаецца з эканамічнага, тэхнічнага і прыродазнаўча-навуковага модуляў. А, дзякуючы фінансавай падтрымцы Германскай службы акадэмічных абменаў, магістранты БДУ змогуць прайсці навучанне ў Германіі і атрымаць акрамя беларускага яшчэ і нямецкі дыплом.
Паступіць у магістратуру могуць асобы, якія атрымалі вышэйшую адукацыю першай ступені па любой спецыяльнасці і валодаюць англійскай мовай. Залічэнне праходзіць па выніках здачы ўступнага іспыту па асновах менеджменту і, пры неабходнасці, дадатковага іспыту па эканамічнай тэорыі. Для вызначэння гатоўнасці навучання на англійскай мове з прэтэндэнтамі праводзіцца гутарка. Навучанне будзе ажыццяўляцца як на бюджэтнай, так і на платнай форме. Прыём дакументаў з 27 чэрвеня па 4 ліпеня.
Яшчэ адна новая спецыяльнасць “Кіраванне банкаўскім бізнесам” адкрыецца ў магістратуры Інстытута бізнесу і менеджменту тэхналогій БДУ.
Адукацыйная праграма дасць магчымасць павысіць узровень падрыхтоўкі спецыялістаў вышэйшай кваліфікацыі. У прыватнасці, тут будзе ажыццяўляцца навучанне інавацыйным метадам і тэхналогіям кіравання банкаўскім бізнесам. У спіс вывучаемых дысцыплін уключаны: грашова-крэдытнае рэгуляванне, арганізацыя дзейнасці банкаў, міжнародныя стандарты ўліку і фінансавай справаздачнасці ў банках і іншыя.
Мяркуецца, што выпускнікі спецыяльнасці “Кіраванне банкаўскім бізнесам” будуць запатрабаваныя ў банкаўскім сектары ў якасці кіраўнікоў упраўленняў планавання і развіцця банка, крэдытных, дэпазітных структурах, улікова-аперацыйных аддзелах, а таксама змогуць стаць кіраўнікамі іншых функцыянальных падраздзяленняў і службаў банкаў.
Прыём дакументаў на новую спецыяльнасць -- з 1 чэрвеня да 24 жніўня ўключна. Тэрмін навучання на дзённай і завочнай формах складае 1,5 года.
Надзея НІКАЛАЕВА
Што за таемнымі дзвярыма?
