Тэракт, які адбыўся ў ноч на 12 чэрвеня, калі амерыканец афганскага паходжання Амар Мацін напаў на начны гей-клуб "Pulse" у Арланда, забраў жыцці 50 чалавек. Адказнасць паспяшалася ўзяць на сябе тэрарыстычная групоўка "Ісламская дзяржава", што надало тэракту значны знешнепалітычны імпульс.
Гэтае злачынства, несумненна, акажа ўплыў на палітычнае жыццё Амерыкі. Яго ўжо выкарыстаў у сваіх мэтах кандыдат ад рэспубліканскай партыі на прэзідэнцкіх выбарах Дональд Трамп, заклікаўшы прэзідэнта Барака Абаму сысці ў адстаўку, а канкурэнта ад дэмакратаў Хілары Клінтан адмовіцца ад удзелу ў выбарах за іх нежаданне выкарыстоўваць паняцце "радыкальны іслам" і гатоўнасць прымаць больш імігрантаў з Блізкага Усходу.
Несумненна, што ажывіцца і дыскусія з нагоды свабоднага продажу агнястрэльнай зброі ў ЗША. Тэракт, які стаў самым крывавым у выніку страляніны аднаго чалавека па суграмадзянах на тэрыторыі ЗША за ўсю гісторыю краіны, несумненна, акажа ўплыў і на знешнюю палітыку ЗША. Выбаршчыкі будуць патрабаваць ад уладаў больш энергічнай барацьбы з "Ісламскай дзяржавай". Варта чакаць развіцця дыскусіі і па правілах прыняцця імігрантаў, паколькі, хоць сам тэрарыст і нарадзіўся на тэрыторыі ЗША, бацькі яго прыбылі ў краіну.
У нядзелю спецслужбы Казахстана зрабілі справаздачу аб тым, што ўсе ўдзельнікі нападу на казахскі горад Актабэ, які адбыўся 5 чэрвеня, затрыманыя. Нічога падобнага да гэтай нечаканай атакі не было на тэрыторыі краіны шмат гадоў, яна забрала жыцці сямі грамадзян. Усяго па выніках барацьбы з удзельнікамі крывавай акцыі было абясшкоджана 17 баевікоў. Несумненна, што падобныя падзеі выклічуць сур'ёзную дыскусію ў краінах СНД аб формах і метадах прэвентыўных дзеянняў па папярэджанні тэрарыстычных актаў.
Парадак дня жыцця Германіі ў плане тэрарыстычных пагроз на мінулым тыдні мала адрозніваўся ад казахстанскага і амерыканскага. Уся краіна абмяркоўвала пагрозы ў інтэрнэце ад інтэрнэт-карыстальнікаў з Турцыі дэпутатам бундэстага турэцкага паходжання, якія прагаласавалі 2 чэрвеня за рэзалюцыю, у адпаведнасці з якой масавае забойства армян у Асманскай імперыі ў 1915 годзе было прызнана генацыдам. Паліцыя выдзеліла ўсім 11 дэпутатам ахову. Ім таксама было рэкамендавана ў мэтах бяспекі не наведваць Турцыю ў бліжэйшы час.
У самой Турцыі таксама адбыўся маштабны тэракт. 7 чэрвеня ў гістарычным цэнтры Стамбула быў узарваны начынены выбухоўкай аўтамабіль у момант, калі міма праязджаў грузавік з супрацоўнікамі паліцыі. Усяго загінула 11 чалавек. Акрамя палітычнага рэзанансу (адказнасць за тэракт узялі на сябе "Ястрабы свабоды Курдыстана", якія прэтэндуюць на вылучэнне Курдыстана са складу краіны) чарговы тэракт, несумненна, акажа негатыўны ўплыў на развіццё турызму, які і без гэтага перажывае складаныя часы з-за ўзрослай рызыкі тэрарыстычных нападаў і сваркі з Расіяй.
Нафта на мінулым тыдні пратэсціравала новы цэнавы максімум за гэты год — 52 долары за бараль, пасля чаго яе кошт зноў пайшоў на спад. Мяжу ў 50 долараў эксперты называюць мінімальна неабходнай для найбуйнейшых нафтаздабыўных кампаній свету, каб захаваць рэнтабельнасць здабычы. Вядома ж, новая вяршыня ў цане зараз жа надала аптымізму рознага роду прадказальнікам, якія паспяшаліся выступіць з заявамі, што нафта будзе паступальна расці да 100 долараў за бараль у найбліжэйшыя гады.
У Мінску з размахам прайшоў ІІІ Форум рэгіёнаў Беларусі і Расіі. Яго значнасць для абедзвюх краін падкрэсліў удзел прэзідэнтаў у мерапрыемствах Форуму. Беларускі Прэзідэнт, выступаючы на ??мерапрыемстве, зрабіў акцэнт на неабходнасці сумесных намаганняў у пераадоленні крызісных з'яў у рэгіёне: "Зняцце бар'ераў, фарміраванне адзінай прамысловай палітыкі і адзінага рынку — у нашых агульных інтарэсах". Уладзімір Пуцін падчас візіту прытрымліваўся падобных пазіцый, пры гэтым адзначыўшы важнасць супрацоўніцтва не толькі ў эканоміцы, але і ў вырашэнні сацыяльных пытанняў. Па выніках Форуму было заключана кантрактаў на 230 мільёнаў долараў.
Важнай падзеяй у знешняй палітыцы Беларусі стала прыняцце 6 чэрвеня даверчых грамат беларускім Прэзідэнтам у 13 паслоў — Аўстраліі, Ганы, Гвінеі, Зімбабвэ, Рэспублікі Карэя, Нікарагуа, Аб'яднаных Арабскіх Эміратаў, Польшчы, Славакіі, Судана, Філіпін, Эфіопіі і Японіі. Несумненна, калі меркаваць па ўзроўні тавараабароту, найбольшае значэнне для беларускай эканомікі ў дадзены момант з усіх гэтых краін мае Польшча. Але ў перспектыве беларускі экспарт неабходна нарошчваць па ўсіх напрамках. Акрамя гэтага, тры краіны са спіса — Японія, Паўднёвая Карэя і Аўстралія — ??з'яўляюцца важнымі тэхналагічнымі цэнтрамі свету, што мае значэнне з пункту гледжання неабходнасці мадэрнізацыі беларускай эканомікі з прыцягненнем сучасных тэхналогій.
Сяргей КІЗІМА, доктар палітычных навук
Што за таемнымі дзвярыма?
