Першы маладзёжны экіпаж камбайнераў-тысячнікаў на Гомельшчыне ўшаноўвалі 27 ліпеня непасрэдна на полі. Камбайнерам Аляксандру Кашыцкаму і Дзмітрыю Вараб'ёву, якія працуюць у філіяле «Савецкая Беларусь» Рэчыцкага камбіната хлебапрадуктаў дыпломы і падарункі ўручыў першы сакратар Гомельскага абласнога камітэта БРСМ Ігар ЗАВАЛЕЙ.
Маладыя механізатары намалацілі больш за адну тысячу тон збожжа. Як расказалі ў прэс-службе абласнога камітэта БРСМ, хлебаробы працуюць на айчынным камбайне КЗС-1218. З пачатку жніва яны ўбралі больш як 250 га збожжа. У гэты дзень шанавалі і дзвюх дзяўчын: Наталлю Бракарэнку і Ірыну Склімянок. Яны ўваходзяць у склад экіпажаў гаспадаркі «Абарона краіны» Рэчыцкага раёна. Падарунак ад БРСМ атрымаў і Аляксандр Сыс — малады кіроўца гэтай гаспадаркі, які з пачатку жніва перавёз звыш 1 тысячы тон збожжа.
Дарэчы, падобныя акцыі па ўшаноўванні маладых аграрыяў, якія цяпер убіраюць хлеб, пройдуць ва ўсіх раёнах Гомельшчыны. Агульны намалот збожжа ў вобласці на сённяшні дзень дасягнуў 427 тыс. т. Сярэдняя ўраджайнасць вышэйшая за леташнюю на 20% і складае 30 ц з гектара.
Ірына АСТАШКЕВІЧ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
