Вы тут

У Нясвіжы адкрыўся трэці сезон фотавыставы «Праекты ў асобах»


Яна расказвае пра праекты, рэалізаваныя пры падтрымцы Прадстаўніцтва Еўрапейскага саюза ў Беларусі.


На Ратушнай плошчы гэтага старажытнага беларускага горада размясціліся каля 30 стэндаў. Кожны з іх прысвечаны аднаму з праектаў, што былі рэалізаваныя ці яшчэ рэалізуюцца ў нашай краіне пры падтрымцы Еўрапейскага саюза. Яны закранаюць важныя экалагічныя, эканамічныя і сацыяльныя пытанні, такія як ахова навакольнага асяроддзя; рацыянальнае выкарыстанне прыродных рэсурсаў; укараненне энергазберагальных і “зялёных” тэхналогій; развіццё сельскіх тэрыторый і падтрымка прадпрымальніцтва; дапамога падапечным Беларускага дзіцячага хоспісу і жанчынам, якія пацярпелі ад хатняга насілля; прасоўванне еўрапейскага падыходу ў адукацыі і навуцы; захаванне гістарычных і культурных традыцый.

У 2015 годзе “Праекты ў асобах” убачылі жыхары і госці абласных цэнтраў краіны, у 2016-м – Барысава, Бабруйска, Пінска, Мазыра і Ліды. Сёлета выставу ўжо прынялі Маладзечна, Орша, Горкі, Рэчыца, Светлагорск, Жлобін і Салігорск. У Нясвіжы яна прабудзе да 9 верасня, а потым адправіцца па маршруце Кобрын – Баранавічы – Столін.

Акрамя інфармацыі пра праекты (тэрміны, геаграфія, выдаткі і вынікі іх рэалізацыі), на стэндах таксама можна ўбачыць фотаздымкі людзей, якія дапамагалі ўвасобіць іх у жыццё. Сярод іх – валанцёры і прадстаўнікі грамадскіх арганізацый, вучоныя, выкладчыкі, фермеры, а таксама асуджаныя, людзі з інваліднасцю. Каб зняць усіх герояў, аўтару выставы, вядомаму фотамастаку Юліі Мацкевіч давялося пераадолець больш за 4000 км.

– За кожным праектам, які мы дэманструем на выставе, стаіць чалавек, – адзначыла каардынатар па пытаннях прэсы і інфармацыі аддзела праектаў Прадстаўніцтва Еўрапейскага саюза ў Беларусі Таццяна Аляксеева. – Ідэя заўсёды сыходзіць ад нейкага чалавека, які аднойчы нешта прыдумаў, каб змяніць штосьці ў сваім асяроддзі. Еўрасаюз падтрымлівае такіх ініцыятыўных людзей. Усё магчыма, галоўнае – пачаць.

Перашкоды – крокі да поспеху

Аляксандр Шаўчук, рэгіянальны каардынатар па Мінскай вобласці праекта “Садзейнічанне развіццю на мясцовым узроўні ў Рэспубліцы Беларусь” (2014-2018 гг.), упэўнены – толькі неабыякавыя людзі, якія не спыняюцца перад перашкодамі ў вырашэнні хвалюючай праблемы, здольныя заразіць сваім натхненнем іншых, дасягаюць поспехаў. Такіх герояў у межах праекту назбіралася шмат – сёння ў краіне рэалізуецца больш за 200 ініцыятыў, накіраваных на вырашэнне задач мясцовага развіцця. Мэты іх самыя розныя: развіццё турызму, прадпрымальніцтва, паляпшэнне экалагічнай сітуацыі, асветніцкая і папулярызатарская праца ў сферы культуры і экалогіі. У Нясвіжы можна ўбачыць фотаздымак Аляксандра Варыкіша – аўтара ініцыятывы, “Стварэнне парка мініяцюр “Краіна замкаў”, рэалізаванай у межах праекта.

На выставе “Праекты ў асобах” таксама прадстаўлены тры праекты, партнёрам якіх з’яўляецца МГА “Экапартнёрства”. Па словах PR-менеджэра арганізацыі Алесі Чумаковай, разам з героямі праектаў члены грамадскай арганізацыі дапамагаюць беларускім гарадам скараціць выкіды парніковых газаў (“Падтрымка ініцыятывы “Пагадненне мэраў” у Беларусі”), стварыць сістэму абыходжання з адходамі ў Пухавіцкім раёне і ўдасканаліць працу жыллёва-камунальнай гаспадаркі ў Іўеўскім і Вілейскім раёнах дзякуючы ўкараненню механізму сацыяльнай падсправаздачнасці.

Начальнік Галоўнага ўпраўлення статыстыкі паслуг і ўнутранага гандлю Нацыянальнага статыстычнага камітэту Рэспублікі Беларусь Ірына Чыгірова – гераіня праекту “Падтрымка ўстойлівага развіцця турызму ў Беларусі” (2015-2018 гг.). Разам з калегамі Ірына вывучала сусветны вопыт у сферы статыстыкі турызму. Укараненне ў практыку міжнародных рэкамендацый дапамагло беларускім спецыялістам пабудаваць дапаможны рахунак турызму – гэта значыць ацаніць унёсак турызму ў валавы ўнутраны прадукт Беларусі.

– Эксперыментальны разлік паказаў, што доля турызму складае 1,8% – гэта прыкладна ўзровень нашых суседзяў, – расказала Ірына Чыгірова. – Разлік унёску турызму ў эканоміку робяць толькі краіны, маючыя магутную статыстычную сістэму. Дзякуючы рэалізацыі праекту, у Беларусі гэтыя разлікі будуць ажыццяўляцца раз у два гады на пастаяннай аснове.

Астравок культуры і зялёнага транспарту

Нясвіж, які стаў восьмым горадам чарговага сезону фотавыставы “Праекты ў асобах”, таксама можа пахваліцца цікавымі ініцыятывамі, якія дапамагаюць павысіць дабрабыт мясцовых жыхароў. Асаблівую ўвагу тут надаюць пытанням развіцця турызму і захавання культурнай і прыроднай спадчыны.

– Нясвіж не стаіць у баку ад тых працэсаў, якія адбываюцца ў Еўрасаюзе і краінах ЕАЭС, – падкрэсліў намеснік начальніка аддзела ідэалагічнай работы, культуры і па справах моладзі Нясвіжскага райвыканкама Міхаіл Мацэль. – Каля 20 гадоў мы займаемся вырашэннем экалагічных пытанняў, праводзім экалагічныя форумы, у тым ліку і на абласным узроўні. А не так даўно атрымалі падтрымку ў гэтым кірунку і ад Прадстаўніцтва Еўрапейскага саюза. З дапамогай апошняга сёння турысты могуць праехацца па тэрыторыі Нясвіжскага палацава-паркавага комплексу на электрааўтобусе, веласіпедах ці веламабілях.

Зялёны транспарт запрацаваў тут дзякуючы рэалізацыі праекта “Садзейнічанне пераходу Рэспублікі Беларусь да “зялёнай” эканомікі”. Па словах кіраўніка праекту Вольгі Чаброўскай, усяго ў Нясвіж паставілі 49 веласіпедаў, турыстычны аўтобус і 5 веламабіляў. Усе гэтыя віды транспарту прыйшліся даспадобы як турыстам, так і жыхарам горада. Напрыклад, адзін з веламабіляў, а яны з’явіліся толькі ў чэрвені 2017 года, ужо амаль акупіўся (яго кошт – каля 3 тыс. еўра).

– Прыемна бачыць, што тут усё рэальна працуе і развіваецца, – адзначыла Вольга Чаброўская. – Так, мясцовыя партнёры праекту ўстанавілі ў экскурсійным электробусе аўдыёгід на трох мовах. Магчыма, у хуткім часе аўдыёгіды з’явяцца і на веламабілях. Гэты ўдалы вопыт могуць узяць на ўзбраенне і іншыя турыстычныя цэнтры, тым больш, што ўвесь транспарт, які выкарыстоўваецца тут, сертыфікаваны ў Беларусі.

Еўрапейскі саюз – найбуйнейшы ў свеце донар праграм супрацоўніцтва. У Беларусі ЕС фінансуе праекты і праграмы каля 29 млн еўра ў год.

Вераніка КОЛАСАВА

kolasava@zviazda.by

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.