Вы тут

Папярэднія вынікі года на рынку сталічных новабудоўляў


Прайшоў чарговы год. Чым ён запомніўся для пакупнікоў, ці сталі новабудоўлі Мінска больш даступнымі і чаго чакаць у наступным годзе — на гэтыя пытанні мы паспрабуем адшукаць адказы.


Прапанова без класа люкс

У якаснай структуры прапанаваных на продаж новабудоўляў зменаў за мінулы год не адбылося. Як і раней, асноўная доля дамоў належыць да класа стандарт. Але цікава, што на другім месцы па колькасці знаходзіцца не клас эканом, а клас камфорт. Замыкае спіс самы малы з прысутных на рынку класаў — прэстыж. Новабудоўляў класа люкс у прапанове на рынку Мінска так і не з'явілася.

— Нягледзячы на тое, што колькасць праектаў у параўнанні з канцом 2016 года ў цяперашні час паменшылася прыкладна на 13%, падстаў для хваляванняў няма, — адзначае кіраўнік аддзела агенцтва нерухомасці «Твая сталіца» Наталля Радзеня. — Ува многім гэта абумоўлена тым, што павялічваецца колькасць аб'ектаў, якія ўзводзяцца не як асобныя дамы, а ў складзе жылых комплексаў.

Пераважная большасць новабудоўляў — каркасна-блокавыя (85%), у той час як доля панэльных дамоў усяго толькі 14%. Цаглянае домабудаванне паступова спыняецца. Калі год таму ў продажы было восем цагляных праектаў, то ў канцы 2017-га ў Мінску засталося толькі два: жылыя комплексы «Прэстыжына» і «Vоguе». Яшчэ дзве цагляныя новабудоўлі размяшчаюцца ў найбліжэйшым прыгарадзе Мінска — у аграгарадку Ратамка і ў Смалявічах.

Пачаўся рост цэн

Эканамічная стабільнасць, якая назіралася на працягу ўсяго мінулага года, а таксама і патанненне крэдытаў прывялі да таго, што ў параўнанні са снежнем 2016-га цэны ў сярэднім выраслі на 2—13%.

— Найбольшае павелічэнне цэн адзначана па класе камфорт і толькі за кошт таго, што ў апошнім квартале мінулага года ў продажы з'явіўся дом з цэнамі істотна вышэйшымі за рынкавыя. Калі б не ён, то па класе камфорт статыстыка была б істотна ніжэйшай, — каментуе Наталля Радзеня. Сярэднія цэны квадратнага метра жылля класа эканом у новабудоўлях сталіцы прыплюсавалі за год 45 долараў. Метр класа стандарт стаў даражэйшы на 25 долараў, а «квадрат» «камфорта» прапануецца па цане ажно на 220 долараў большай, чым год таму.

Сярэдняя цана квадратнага метра ў новабудоўлях Мінска, снежань 2017 г.

Клас якасці

 

1-пакаёвыя

 

2-пакаёвыя

 

3-пакаёвыя

 

эканом

 

$1050

 

$1000

 

$945

 

стандарт

 

$1210

 

$1160

 

$1120

 

камфорт

 

$1545

 

$1470

 

$1400

 

прэстыж

 

$1665

 

$1660

 

$1770

 

 

Забудоўшчык павялічвае рэнтабельнасць

У 2017 годзе можна было назіраць сітуацыю, якая характарызуецца рэцэсіяй у эканоміцы. Аб рэальным росце даходаў гаварыць не даводзілася, затое ў людзей з'явілася фінансавая дапамога з боку банкаў — патаннелі крэдыты.

Бачачы пастаяннае зніжэнне стаўкі рэфінансавання (за мінулы год яна зніжалася восем разоў), пакупнікі перасталі сябе абмяжоўваць толькі мінімальнымі патрабаваннямі да жылля і пачалі разглядаць магчымасці паляпшэння жыллёвых умоў і нават набыццё больш прасторных і камфортных апартаментаў. Рэнтабельнасць забудоўшчыкаў знаходзілася на досыць нізкім узроўні, аднак стабільнасць попыту выклікала аптымізм. У гэтай сітуацыі арганізатары будаўніцтва імкнуліся патроху павялічваць рэнтабельнасць за кошт падняцця цэн, пры гэтым не дапускаючы зніжэння аб'ёмаў продажаў.

Пакупнікі і іх «памочнікі»

Колькасць пакупнікоў з крэдытамі на працягу мінулага года пастаянна расла з прыкметным паскарэннем у другім паўгоддзі. У пачатку года недавер да крэдытаў быў значны. Ды і стаўкі яшчэ толькі пачыналі сваё зніжэнне. Але штомесячнае за студзень — красавік зніжэнне стаўкі рэфінансавання, да якой прывязаныя стаўкі па крэдытах, і прыход вясны актывавалі тых пакупнікоў, якія яшчэ сумняваліся.

У наступныя месяцы колькасць пакупнікоў, што адважыліся на прыцягненне крэдытных сродкаў, расла вельмі хутка. Адзначаліся нават выпадкі, калі банкі не паспявалі разглядаць звароты ва ўстаноўленыя тэрміны. Ды і пакупнікам было цяжка разабрацца з усёй разнастайнасцю крэдытных праграм і іх умоў.

Бачачы падобныя складанасці, асобныя агенцтвы нерухомасці пайшлі насустрач пакупнікам і навучылі ўласных спецыялістаў па крэдытаванні, а таксама заключылі партнёрскія дагаворы з большасцю банкаў. Дзякуючы гэтаму пакупнікі змаглі разлічваць на асаблівыя ўмовы крэдытавання па асобных праектах, а спецыялісты па крэдытаванні не толькі кансультавалі кліентаў, але і працавалі па прынцыпе «адно акно»: ад падбору індывідуальнай праграмы крэдытавання і збору неабходных дакументаў да падачы дакументаў у банк. «Таму цяпер кліентам стала дастаткова толькі аднаго звароту да спецыяліста. У выніку за лістапад 2017 года доля «крэдытных» пакупнікоў па нашых здзелках перавысіла 50%», — растлумачыла Наталля Радзеня.

Сярэдняя сума крэдыту сёлета складала 55—60 тысяч рублёў або 28—30 тысяч долараў. Мінімальныя сумы пачыналіся ад 17,5 тысячы рублёў або 9 тысяч долараў, максімальныя дасягалі 103 тысяч рублёў або 53 тысяч долараў.

Але сітуацыя пачала мяняцца ў лістападзе, калі стаўкі па крэдытах пачалі расці.

— Пад'ём ставак па крэдытах адчувальна знізіў попыт па ўсіх сегментах новабудоўляў. Па нейкіх праектах больш, па іншых менш. У прыватнасці, на тых праектах, па якіх дзейнічаюць спецыяльныя праграмы крэдытавання, зніжэнне попыту не адбілася.

Адназначна параіць, браць або не браць крэдыт, — нельга. Кожны для сябе вырашае сам, зыходзячы з матэрыяльных магчымасцяў. Па заяве прадстаўнікоў Нацбанка, у 2018 годзе крэдыты не скончацца. Але пытанне іх кошту пакуль застаецца адкрытае.

Нават пры захаванні ставак па крэдытах на цяперашнім узроўні эксперты лічаць падняцце цэн у цэлым па рынку новабудоўляў неабгрунтаваным, хіба што па асобных праектах, зыходзячы з іх запатрабаванасці і іншых фактараў. Але асноўны попыт налета будзе працягваць канцэнтравацца на мінімальных па кошце кватэрах, а значыць, падняцце цэн будзе ў большасці выпадкаў цягнуць за сабой памяншэнне колькасці продажаў.

Сяргей КУРКАЧ

kurkасh@zvіаzdа.bу

Выбар рэдакцыі

Грамадства

Так цёпла, як у першым паўгоддзі, бывае адзін раз у 30 год

Так цёпла, як у першым паўгоддзі, бывае адзін раз у 30 год

За апошнія 30 гадоў у нас у краіне ў параўнанні з нормай 1961—1990 гадоў, якая ўжываецца як апорная пры ацэнцы значэнняў змены клімату, пацяплела на 1,3 градуса.

Грамадства

Ці прапаноўвае прыдарожны сэрвіс беларускую кухню?

Ці прапаноўвае прыдарожны сэрвіс беларускую кухню?

Міністэрства транспарту і камунікацый цяпер распрацоўвае генеральную схему развіцця прыдарожнага сэрвісу да 2025 года.

Грамадства

Гісторыя пра тое, як партызаны пайшлі па соль, а выратавалі дзевяць чалавек

Гісторыя пра тое, як партызаны пайшлі па соль, а выратавалі дзевяць чалавек

Гэты аповед даслаў нам у рэдакцыю наш даўні чытач з Вялікай Бераставіцы Міхаіл Маскальчук.

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.