Створаны па даручэнні кіраўніка дзяржавы дзеля папулярызацыі і захавання беларускай культурнай спадчыны, ён пачаў сваё вяшчанне ў пачатку лютага 2013-га. А ўжо сёння штодзень канал у эфіры глядзіць звыш мільёна беларусаў. У яго сотні падпісчыкаў у сацыяльных сетках, праграмы маюць больш за паўтара мільёна праглядаў на YоuTubе.
Аснову канала складае тэлевізійная і кінематаграфічная прадукцыя айчыннай вытворчасці. Візітнымі карткамі сталі такія любімыя гледачамі перадачы, як «Калыханка», «Дабраранак», «Размаўляем па-беларуску», «Навукаманія», «Святло далёкай зоркі», «Наперад у мінулае», «Музеі Беларусі», «Камертон», «Святыні Беларусі», «Навіны культуры».
Як адзначыла ў прывітальным адрасе кіраўнік Адміністрацыі Прэзідэнта Рэспублікі Беларусь Наталля Качанава, тэлеканал здолеў заняць асаблівую нішу і забяспечыў сабе пастаянную аўдыторыю. Яна ўхваліла прафесіяналізм і кампетэнтнасць калектыву і пажадала «Беларусь 3» доўгай і цікавай тэлевізійнай гісторыі. Намеснік міністра інфармацыі Павел Лёгкі заўважыў, што і сам з'яўляецца пастаянным гледачом сацыякультурнага канала:
— Кожную раніцу ўключаю «Беларусь 3», так што я таксама ў ліку той мільённай аўдыторыі гледачоў.
Адметна, што вялікая ўвага на тэлеканале ўдзяляецца папулярызацыі роднай мовы — беларускамоўныя праекты ўласнай вытворчасці складаюць 75 %. Як падкрэсліў стваральнік канала кіраўнік РГА «Белая Русь» Генадзь Давыдзька, Белтэлерадыёкампанія — велізарная нацыянальная каштоўнасць, а «Беларусь 3» — адзін з яе дыяментаў. На яго погляд, у тэлеканала вялікая будучыня, улічваючы дынаміку яго развіцця.
«Беларусь 3» і надалей працягне здзіўляць і радаваць свайго гледача. У эфіры з'явяцца тэлеверсіі ўсіх значных культурных мерапрыемстваў, міжнародных і рэспубліканскіх фестываляў, конкурсаў, форумаў, святаў і пленэраў, канцэртаў, найлепшых спектакляў беларускіх тэатраў, творчых сустрэч з вядомымі дзеячамі культуры і мастацтва.
У новым сезоне 2018/2019 чакаецца і шэраг прэм'ер: цыклы праграм аб прадметах культуры і мастацтва «Артэфакты», пра асаблівасці архітэктуры «Архітэктура Беларусі» і пра нематэрыяльную культурную спадчыну «Жывая культура». Але ўсе сакрэты раскрываць не будзем — глядзіце «Беларусь 3» і ўсё пабачыце самі.
Алена КРАВЕЦ
Фота Ганны ЗАНКАВІЧ
Як мы бярозавік куплялі на гандлёвай пляцоўцы лясгаса і ў лясніцтве
Творчая вечарына народнага артыста Беларусі прайшла ў адной з мінскіх гімназій.