Вы тут

Дэпутаты прынялі ў першым чытанні змяненні ў закон аб СМІ


Дэпутаты Палаты прадстаўнікоў прынялі сёння ў першым чытанні законапраект "Аб унясенні змяненняў і дапаўненняў у некаторыя законы Беларусі", які накіраваны на ўдасканаленне праваадносін у сферы масавай інфармацыі.


Законапраект прадугледжвае карэкціроўку закона аб СМІ, Падатковага кодэкса, КоАП і ПВКоАП. Прадстаўляючы законапраект парламентарыям, міністр інфармацыі Аляксандр Карлюкевіч расказаў аб асноўных новаўвядзеннях. 

Сярод іх - пашырэнне паняційнага апарату закона аб СМІ (ён дапаўняецца тэрмінамі "сеткавае выданне", "уладальнік інтэрнэт-рэсурсу", "інтэрнэт-рэсурс" і іншымі), распаўсюджванне яго дзеяння на інтэрнэт-рэсурсы, якія займаюцца распаўсюджваннем масавай інфармацыі. Яны атрымаюць магчымасць праходзіць дзяржаўную рэгістрацыю для таго, каб стаць сеткавым выданнем, супрацоўнікі якога будуць карыстацца такімі ж правамі, як і журналісты традыцыйных СМІ. "Інтэрнэт-рэсурс, які не прайшоў дзяржаўную рэгістрацыю ў Мінінфарме, не будзе мець статусу СМІ, а таму яго супрацоўнікі не будуць з'яўляцца журналістамі. Пры гэтым дзяржаўная рэгістрацыя будзе мець добраахвотны характар. Аналагічны падыход рэалізаваны ў Расіі", - расказаў міністр.

Ён звярнуў увагу, што сеткавыя выданні будуць мець прававыя і статусныя перавагі ў параўнанні з інтэрнэт-рэсурсамі, якія рэгістрацыю не прайшлі. "Напрыклад, рашэнне аб абмежаванні доступу да сеткавага выдання можа быць прынята Мінінфармам у выпадку вынясення ўладальніку двух і больш пісьмовых папярэджанняў, а да незарэгістраванага інтэрнэт-рэсурсу - у выпадку аднаразовага невыканання законнага патрабавання міністэрства аб устараненні парушэнняў заканадаўства аб СМІ", - адзначыў Аляксандр Карлюкевіч.

Упершыню ў законе аб СМІ ўстанаўліваюцца правы і абавязкі ўладальніка інтэрнэт-рэсурсаў. У ліку абавязкаў - ідэнтыфікацыя карыстальнікаў. "Акрамя таго, прапануецца абавязаць уладальнікаў інтэрнэт-рэсурсаў аналізаваць іх змест, не дапускаць размяшчэння інфармацыі, распаўсюджванне якой забаронена, абмежавана, а таксама матэрыялаў, якія змяшчаюць нецэнзурныя словы і выразы", - растлумачыў кіраўнік Мінінфарма.

Праектам закона пашыраны пералік відаў інфармацыі, распаўсюджванне якой забаронена. "Да такой дадаткова аднесена інфармацыя, якая стымулюе да самазабойства, неналежная рэклама", - растлумачыў міністр. Размова таксама ідзе аб інфармацыі аб спосабах вырабу ўзрыўных устройстваў і выбуховых рэчываў. Пад абаронай будуць персанальныя даныя непаўналетніх, якія пацярпелі ў выніку проціпраўных дзеянняў: прозвішча, імя, імя па бацьку, дата нараджэння, месца жыхарства і вучобы, фота і відэапаказ дзіцяці, яго бацькоў.

Акрамя таго, у дакуменце ўстанаўліваюцца абмежаванні для замежнага ўдзелу ў фарміраванні беларускай медыяпрасторы. У гэтай частцы законапраект прадугледжвае, што функцыі рэдакцыі СМІ зможа выконваць толькі юрыдычная асоба - рэзідэнт Беларусі, а функцыі галоўнага рэдактара - толькі яе грамадзянін. Калі доля замежнага капіталу ў фондзе юрыдычнай асобы складае 20 працэнтаў і больш, то такая арганізацыя не зможа выступаць заснавальнікам СМІ ў Беларусі. Законапраект змяшчае таксама забарону на распаўсюджванне прадукцыі замежных СМІ без дазволу.

Усяго на сённяшнім пасяджэнні Палаты прадстаўнікоў было разгледжана дзесяць пытанняў. У першым чытанні прыняты папраўкі ў законы аб рэгістры насельніцтва, аб электронным дакуменце і электронным лічбавым подпісе, а таксама ў некаторыя законы па пытаннях бяспекі генна-інжынернай дзейнасці. У другім чытанні разгледжаны праект закона "Аб унясенні змяненняў і дапаўненняў у Закон "Аб міжнародных дагаворах Рэспублікі Беларусь". Пералікам пытанняў была прадугледжана таксама ратыфікацыя некаторых міжнародных дагавораў. У іх ліку беларуска-грузінскае міжурадавае пагадненне аб сістэме садзейнічання ўзаемнаму гандлю, канвенцыя паміж урадамі Беларусі і Вялікабрытаніі аб устараненні двайнога падаткаабкладання адносна падаткаў на даходы і капітал і папярэджанні ўхілення ад выплаты падаткаў, пагадненне аб абарачэнні насення сельскагаспадарчых раслін у Еўразійскім эканамічным саюзе.

БЕЛТА

Дадаць каментар

Выбар рэдакцыі

Грамадства

Што адбываецца ў Юравічах?

Што адбываецца ў Юравічах?

Пасля трагедыі людзі размаўляюць з журналістамі на ўмовах ананімнасці

Грамадства

На чым Ветка трымаецца

На чым Ветка трымаецца

Формула поспеху мясцовага музея простая: шануй сваё, тым і будзеш цікавы.

Грамадства

Зміцер Жылуновіч. Таварыш пясняр

Зміцер Жылуновіч. Таварыш пясняр

Ён быў аўтарам Маніфеста аб абвяшчэнні Савецкай Беларусі, першым прэм'ер-міністрам рэспублікі, яго двойчы выключалі з партыі, ён мог стаць першым народным паэтам...