Дзяржорганы і мясцовыя ўлады праводзяць суботнік на працоўных месцах або добраўпарадкоўваюць і прыводзяць у парадак гісторыка-культурныя каштоўнасці, тэрыторыі населеных пунктаў, рыхтуюць дзіцячыя аздараўленчыя і спартыўна-аздараўленчыя лагеры да летняга сезона.
Кіраўнікі дзяржорганаў працавалі на суботніку на сваёй малой радзіме.
Палова грашовых сродкаў, заробленых на суботніку, застанецца ў распараджэнні аблвыканкамаў і Мінскага гарвыканкама. Яны пойдуць на добраўпарадкаванне і прывядзенне ў належны стан населеных пунктаў, у тым ліку аграгарадкоў, мемарыяльных комплексаў, месцаў баявой і воінскай славы, пахаванні воінаў і партызан Вялікай Айчыннай вайны, а таксама на падрыхтоўку дзіцячых аздараўленчых і спартыўна-аздараўленчых лагераў да летняга сезона.
Яшчэ 50% сродкаў пералічваюцца Мінфіну. Гэтыя грошы накіроўваюцца на закупку медыцынскага абсталявання для Гарадской клінічнай бальніцы хуткай медыцынскай дапамогі - для арганізацыі дадатковых кругласутачных пастоў для аказання медыцынскай дапамогі, а таксама рэзервовых ложкаў на выпадак экстранай шпіталізацыі ўдзельнікаў і гасцей II Еўрапейскіх гульняў 2019 года.
Пры ўдзеле ў рэспубліканскім суботніку некамерцыйных арганізацый грашовыя сродкі могуць пералічвацца ў памерах, вызначаных добраахвотна самімі калектывамі.
Пра гэта паведаміў сёння журналістам намеснік прэм'ер-міністра, кіраўнік рабочай групы па падрыхтоўцы і правядзенні суботніка Міхаіл Русы.
"Павінен адзначыць, што з вельмі вялікім энтузіязмам людзі прынялі прапанову правесці суботнік. Па папярэдніх дадзеных, сёння на суботніку працуюць каля 3 млн чалавек. Па прагнозах, каля Br7,5 млн будзе зароблена", - расказаў Міхаіл Русы.
Паводле папярэдняй інфармацыі, найбольшая колькасць людзей удзельнічаюць у суботніку ў Мінску - больш за 600 тыс., па 430-450 тыс. - у Гомельскай і Брэсцкай абласцях. Мінск у лідарах і па заробленых грошах - каля Br2 млн.
Фота БЕЛТА
Парламентарыі прыбіралі лісце, саджалі ёлкі на тэрыторыі Мемарыяльнага комплексу “Трасцянец” у мікрараёне Шабаны. Помнік пабудаваны на месцы аднайменнага, чацвёртага па колькасці знішчаных вязняў, канцэнтрацыйнага лагера. Ахвярамі злачынстваў у “Трасцянцы” сталі звыш 206 тысяч чалавек.
- Гэта знакавае месца не толькі для Заводскага раёна, горада Мінска, краіны, але і для ўсёй міжнароднай грамадскасці. Гэта першая лінія гісторыка-культурных каштоўнасцей Мемарыяльнага комплексу “Трасцянец”. Актыўна ідзе праца па ўзвяденню другой лініі комплексу — урочышча “Благаўшчына”, дзе адбываліся растрэлы і знаходзіліся месцы пахавання вязняў канцэнтрацыйнага лагера, — расказала Аксана Няхайчык, дэпутат Палаты прадстаўнікоў па Шабаноўскай выбарчай акрузе № 91.
Па словах дэпутата, адкрыццё другой чаргі комплексу запланавана ў ліпені 2018 года. Першая лінія мемарыяла поўнасцю была пабудавана на сродкі бюджэту, фондаў суботнікаў, уласныя ўзносы грамадзян, аб’яднанняў.
- Калі была першая чарга адкрыта, сюды прыязджалі прадстаўнікі Германіі, Англіі, Ізраіля і іншых краін. У гэтым месцы знішчалі не толькі савецкіх палонных. Міжнародныя фонды таксама вырашылі ахвяраваць грошы для далейшага будаўніцтва комплексу, — адзначыла Аксана Няхайчык.
На тэрыторыі комплексу працавала толькі частка дэпутатаў. Большасць парламентарыяў у Год малой радзімы вырашыла прыняць удзел у суботніках у сваіх рэгіёнах.
Па традыцыі, частка сродкаў, заробленых на рэспубліканскай акцыі, пойдзе на падрыхтоўку дзіцячых аздараўленчых лагераў і на ўладкаванне гісторыка-культурных каштоўнасцей.
Марыя ДАДАЛКА
Фота прадастаўлена прэс-службай Палаты прадстаўнікоў
У галоўным упраўленні ідэалагічнай работы, культуры і па справах моладзі аблвыканкама паведамілі, што ў ходзе суботніка праведзены вялікі аб’ём работ па добраўпарадкаванні, навядзенні парадку на тэрыторыі мемарыяльных комплексаў, у памятных мясцінах, праведзена ўборка тэрыторый. У дзень суботніка кіраўніцтва аблвыканкама, супрацоўнікі аддзелаў і службаў абласнога выканаўчага камітэта працавалі на будоўлі падстанцыі хуткай дапамогі па вуліцы Суворава ў Брэсце. Служачыя апарата гарвыканкама дапамагалі будаўнікам дзіцячага садка ў новым мікрараёне. Спецыялісты галоўнага ўпраўлення ідэалагічнай работы разам з актывістамі БРСМ па традыцыі працавалі ў Брэсцкай крэпасці. Яны наводзілі чысціню вакол новага маладзёжнага патрыятычнага цэнтра.
У Пінску разгарнуліся вялікія мерапрыемствы па ўборцы горада з удзелам інтэрнэт-супольнасці. Так было ўжо летась. Заклікі размясцілі ў віртуальнай прасторы, а на суботнік хлопцы і дзяўчаты выйшлі з рэальнымі граблямі і мяхамі для смецця ды зрабілі горад крышачку прыгажэйшым. У мінулым годзе знайшлося 30 такіх добраахвотнікаў, цяпер было значна больш. У сталіцу Палесся, на малую радзіму, папрацаваць прыехаў і старшыня СК рэспублікі Іван Наскевіч. Іван Данілавіч узяў удзел у добраўпарадкаванні адной з гарадскіх тэрыторый разам з калегамі з міжраённага следчага камітэта.
У Драгічынскім раёне праведзены комплекс работ па ўборцы месцаў баявой і вайсковай славы, мемарыяльных комплексаў, брацкіх магіл. Прыняў удзел у добрай справе віцэ-прэм’ер краіны Васіль Жарко, ураджэнец Драгічыншчыны.
Цэлы шэраг вядомых землякоў прыехалі на суботніку на Століншчыну: старшыня Нацыянальнага банка РБ Павел Калаур і яго намеснік Пётр Мамановіч, генеральны дырэктар СТБ Ігар Луцкі, дэпутаты парламента, ганаровыя грамадзяне Столінскага раёна.
Многія арганізацыі, установы, грамадзяне да суботніка прымеркавалі цікавыя ўласныя ініцыятывы. Напрыклад, Брэсцкі вяслярны канал у гэты дзень высадзіў сімвалічную “Алею добрых намераў”. Дзесяць пірамідальных дубкоў на зямлі абласнога цэнтра алімпійскага рэзерву па веславанні будуць нагадваць людзям пра гуманную, міратворчую місію спорту, -- заявілі перад пачаткам арганізатары акцыі.
Святлана ЯСКЕВІЧ
Фота БЕЛТА
Адной з асноўных пляцовак рэспубліканскага суботніка ў Магілёве стаў парк Падміколле і месца будаўніцтва галоўнай лесвіцы, якая будзе весці ў парк. Існуе даручэнне Главы дзяржавы менавіта гэтую мясцовасць давесці да ўзорнага ўзроўню, каб яна стала адной з візітак горада і зручным месцам для адпачынку магіляўчан. На гэтым стратэгічна важным аб'екце працавалі губернатар вобласці Уладзімір Даманеўскі, намеснік главы Адміністрацыі Прэзідэнта Мікалай Снапкоў, міністр па архітэктуры і будаўніцтву Анатоль Чорны, старшыня камісіі Палаты Прадстаўнікоў Нацыянальнага Сходу Рэспублікі Беларусь Ігар Марзалюк.
- У Год малой радзімы сімвалічна наводзіць парадак менавіта на тых месцах, дзе нарадзіўся і жыў чалавек, - паведаміў старшыня Магілёўскага аблвыканкама Уладзімір Даманеўскі. - І вельмі прыемна, што сёння шмат ураджэнцаў Магілёўскай вобласці, якія працуюць за яе межамі, прыехалі і разам з намі ўдзельнічаюць у рэспубліканскім суботніку.
Удзел у добраўпарадкаванні Падмікольскага парку прыняў і мэр Магілёва Уладзімір Цумараў.
- З 29 сакавіка ў Магілёве аб'яўлены месячнік па навядзенні парадку ў горадзе, але сёння праводзяцца самыя масавыя работы па добраўпарадкаванню гарадскіх тэрыторый, - адзначыў ён. - Мы заканчваем бетанаваць парадную лесвіцу Падміколля і бярэмся за яе аздабленне. Дарэчы, на будаўніцтва лесвіцы пайшло болей 5600 кубоў бетону. А наогул парк будзе цалкам падрыхтаваны да V Форума рэгіёнаў Беларусі і Расіі. На завяршэнне работ па яго добраўпарадкаванню сёлета запланавана каля 2 мільёнаў рублёў.
- Прыемна заўсёды прыязджаць у горад, якому аддаў шмат сваіх сіл, і зрабіць яшчэ нешта, - адзначыў міністр па архітэктуры і будаўніцтву Анатоль Чорны. - Гэта будзе цудоўны парк адпачынку і, спадзяюся, самым улюблёным месцам для магіляўчан. Прыемна зрабіць унёсак у рэалізацыю той канцэпцыі, распрацоўкай якой займаўся.
"Магілёўзеленбуд" падрыхтаваў для высадкі ў Падмікольскім парку 700 дрэў. Некалькі з іх пасадзіў намеснік главы Адміністрацыі Прэзідэнта Мікалай Снапкоў. Міністр па падатках і зборах Сяргей Налівайка працаваў у Бабруйску разам з кіраўніцтвам горада на будаўніцтве сярэдняй школы ў мікрараёне Заходні. А міністр сувязі і інфарматызацыі Сяргей Папкоў разам з работнікамі Дрыбінскага райвыканкама саджаў дрэвы ў Раснянскім лясніцтве. У Слаўгарадскім і Асіповіцкім раёнах саджалі дрэвы і прыводзілі ў парадак тэрыторыі дэпутаты Палаты Прадстаўнікоў Нацыянальнага сходу Рэспублікі Беларусь Таццяна Кананчук і Аляксандр Багдановіч. А старшыня праўлення Беларускага рэспубліканскага саюза спажывецкіх таварыстваў Валерый Іваноў разам з адміністрацыяй Клімавіцкага раёна прымаў удзел у закладцы сквера на тэрыторыі тутэйшага аграрнага каледжа.
Удзел у рэспубліканскім суботніку прыняла болей 320 тысяч жыхароў Магілёўшчыны. Шмат увагі надавалася пасадцы дрэў, добраўпарадкаванню месцаў адпачынку гараджан і прыдарожных палос, месцаў пахавання воінаў Вялікай Айчыннай вайны. Запрацаваныя на суботніку сродкі плануецца накіраваць на добраўпарадкаванне месцаў баявой і воінскай славы, пахаванняў часоў Вялікай Айчыннай вайны, прывядзенне ў належны стан населеных пунктаў, а таксама падрыхтоўку аздараўленчых лагераў да летняга сезону.
Нэлі ЗІГУЛЯ
Старшыня Віцебскага аблвыканкама Мікалай Шарснёў, памочнік Прэзідэнта - інспектар па Віцебскай вобласці Аляксандр Субоцін, старшыня аблсавета Уладзімір Цярэнцьеў падчас суботніка бралі ўдзел у добраўпарадкаванні мемарыяльнага комплексу ў Расонскім раёне.
Гэта месца памяці занесена ў Дзяржаўны спіс гісторыка-культурных каштоўнасцяў Рэспублікі Беларусь.
Працавалі разам з імі і адказныя асобы, якія ўзначальваюць структуры аблвыканкама, кіраўнікі абласнога ўзроўню праваахоўных органаў, ведамстваў...
Удзельнікі суботніка выканалі работы па падсыпцы дарожак (пад кладку тратуарнай пліткі), займаліся добраўпарадкаваннем...
Комплекс пабудаваны ў 1965-м годзе на месцы пахавання больш за 2,5 тысяч савецкіх воінаў і партызан. Там пахаваныя і члены падпольнай групы, расстраляныя фашыстамі 16 верасня 1942 года. Сярод іх -- маці П. М. Машэрава, Дар'я Пятроўна.
Дарэчы, ініцыятарам будаўніцтва комплексу быў Машэраў. Таму не выпадкова памятны знак Пятру Міронавічу размешчаны ў ганаровым месцы Алеі Славы, якая “аб'яднала” герояў розных часоў. Там можна прычытаць імёны і прозвішчы партызан, ваенных, а таксама тых, хто праславіў расонскую зямлю сваёй працай у пасляваенныя гады. Дарэчы, Алея Славы была створана за кошт сродкаў, сабраных пры правядзенні раённага суботніка. Знамянальна, што адкрыццё Алеі Славы было прымеркавана да 100-годдзя з дня нараджэння Пятра Машэрава…
Удзельнікі суботніка ўсклалі кветкі ў знак даніны памяці усіх, хто ўвайшоў у летапіс Расоншчыны.
У размове з прадстаўнікамі сродкаў масавай інфармацыі губернатар заклікаў жыхароў вобласці наводзіць парадак на зямлі, пастарацца ўнесці сваю лепты ў добраўпарадкаванне. Тым больш гэта актуальна ў Год малой Радзімы…
Дарэчы, Машэраў, які нарадзіўся на Сенненшчыне, ніколі не забываў і пра Расоншчыну. Ён часта прыязджаў сюды, бо лічыў яе таксама сваёй малой радзімай.
Мікалай Шарснёў, адказваючы на пытанні журналістаў, згадаў пра іншыя памятныя месцы ў Віцебскай вобласці, дзе вяліся, ажыццяўляюцца і плануецца праводзіць працы па добраўпарадкаванню, мадэрнізацыі. У прыватнасці, пра мемарыяльныя комплексы: “Рыленкі” ў Дубровенскім раёне, “Прарыў” - ва Ўшацкім...
Наконт мемарыяла ў Расоншчыне, дзе праходзіў дзень дабравольнай працы, плануецца, што ён поўнасцю будзе прыведзены ў парадак да 9 мая. На сёння гатоўнасць каля 80% (з улікам суботніка). Для завяршэння ўсіх работ на аб'екце неабходна яшчэ каля 150 тысяч рублёў.
Аляксандр ПУКШАНСКІ
У мерапрыемстве дзяржаўнай важнасці прынялі ўдзел прадстаўнікі мясцовай улады, грамадскіх арганізацый, прадпрыемстваў, моладзь, ветэраны. Хтосьці працаваў на сваім рабочым месцы, а нехта добраўпарадкаваў тэрыторыі населеных пунктаў, прыводзіў ў належны стан помнікі культуры, гісторыі, архітэктуры, месцы пахавання воінаў і мірных жыхароў у гады Вялікай Айчыннай вайны . У прыватнасці, старшыня Мінаблвыканкама Анатоль Ісачанка разам з памочнікам Прэзідэнта –інспектарам па Мінскай вобласці Ігарам Яўсеевым і прадстаўнікамі Мінаблвыканкама пасадзілі ліпавую алею на малой радзіме беларускага песняра Якуба Коласа ў вёсцы Акінчыцы Стаўбцоўскага раёна.
Як адзначыў кіраўнік цэнтральнага рэгіёна, у гэты светлы цудоўны дзень у суботніку прыняло ўдзел шмат жыхароў Мінскай вобласці. Сапраўды, па папярэдніх падліках, гэта 382 тыс. чалавек. Плануецца пералічыць каля 800 тыс. рублёў.
Падчас суботніка ў парадак прывялі таксама ўрочышча Курапаты, Курган Славы. Міністр інфармацыі Аляксандр Карлюкевіч добраўпарадкаваў месца пахавання і саджаў дрэвы на сваёй малой радзіме ў аграгарадку Пухавічы. А галоўны рэдактар выдавецтва “Мастацкая літаратура” Віктар Шніп працаваў на добраўпарадкаванні сядзібы Дуніна-Марцінкевіча ў Валожынскім раёне.
Таццяна ЛАЗОЎСКАЯ
Фота Васіля ЗЯНЬКО
На адным з самых знакавых аб’ектаў – палацава-паркавым комплексе ў Свяцку – працавалі работнікі аблвыканкама на чале з губернатарам Уладзімірам Краўцовым. Таксама сваю лепту ў аднаўленне гістарычнага комплекса ўнеслі памочнік Прэзідэнта-інспектар па Гродзенскай вобласці Сяргей Раўнейка, міністр юстыці Алег Сліжэўскі.
Асноўныя работы ў гэты дзень вяліся на адным з будынкаў комплекса, дзе ў будучым размесціцца адміністрацыйны комплекс і піваварны рэстаран. Чыноўнікам прыйшлося папрацаваць на заліўцы і сцяжцы бетона. Гэтыя работы патрабуюць значных фізічных намаганняў. Уладзімір Краўцоў працуе на суботніку ўжо другі год запар і можа ацаніць дынаміку работ. Па яго словах, да канца года першы пускавы комплекс аб’екта будзе здадзены.
- Нам пашцасціла, што такі цудоўны палац дайшоў да нашых дзён у амаль што першасным выглядзе, - падкрэсліў Краўцоў, - Думаю, што ў бліжэйшы час турысты, у тым ліку замежныя, змогуць наведаць і адпачыць у гэтым цудоўным месцы. Комплекс знаходзіцца ў самым цэнтры турыстычна -рэкрацыйнага парка “Агустоўскі канал”. І мы адчуваем, што да гэтага аб’екта ёсць шырокі інтарэс.
Губернатар адзначыў, што падчас суботніка актыўныя работы вядуцца на шэрагу іншых гістарычных аб’ектах вобласці. Гэта і музей –сядзіба Агінскіх у Смаргніскім раёне, і замкі ў Гродне, Лідзе, Навагрудку, Гальшанах, Крэва.
Прыняць удзел у суботніку прыехаў на сваю малую Радзіму міністр юстыцыі Алег Сліжэўскі, ураджэнец Гродна. І хоць праца на бетонных работах не з лёгкіх, яна і карысная, і эмоцый прыбаўляе.
- Я з задавальненнем сення далучыўся да гэтай працы на аб’екце, які будзе вельмі прывабным для турыстаў, і часцінка маёй працы паспрыяе росту турыстычнга патэнцыял. Нам важна, каб людзі з іншых краін убачылі прыгажосць, гістарычную каштоўнасць гэтага края, усёй Беларусі.
Па словах міністра, вельмі важна, што менавіта ў год малой Радзімы такая ўвага надаецца гістарычным аб’ектам. Але гэта работа павінна весціся пастаянна. Трэба зрабіць усе, каб такія аб’екты аднаўляліся, з прыцягненнем шырока кола удзельнікаў. Гэта наша гістарычная спадчына, і яе трэба зберагчы, падкрэсліў Алег Сліжэўскі.
Падчас суботніка гродзенцы прыводзілі ў парадак памятныя мясціны сваіх населеных пунктаў, расчышчалі тэрыторыю, рыхтавалі да адпачынку дзіцячыя летнікі. Мяркуецца, што ў гэты дзень на працу выйші каля 300 тысяч жыхароў рэгіёна.
У гэты дзень вобласць плануе зарабіць каля 700 тысяч рублёў, якія будуць накіраваны на культурна- гісторычныя аб’екты, памятнікі, ваенныя мемарыялы, дзіцячыя летнікі. Частка сродкаў будзе пералічана на падрыхтоўку да ІІ еўрапейскіх гульняў, якія ў будучым годзе пройдуць у Беларусі.
Маргарыта УШКЕВІЧ
Кіраўніцтва Гродна сёння працавала на добраўпарадкаванні тэрыторыі вакол дзіцячага садка, які будуецца ў маладым мікрараёне Альшанка.
Аб’ект, дарэчы, павінен быць уведзены ў эксплуатацыю сёлета 1 верасня. Асноўныя будаўнічыя работы ў ім ужо скончаны, наперадзе – вонкавыя і ўнутраныя працы. Па меркаванні мэра горада Мечыслава Гоя, дзіцячы садок можа быць здадзены датэрмінова, паколькі яго вельмі чакаюць жыхары навабудаў.
Вольга АНУФРЫЕВА
Многія з іх працавалі на сваіх рабочых месцах. Жыхары наводзілі парадак у дварах, добраўпарадкоўвалі тэрыторыі ў населеных пунктах. Дэпутаты ўсіх узроўняў улады выйшлі на добраўпарадкаванне тэрыторый, дзе жывуць і працуюць.
Намеснік кіраўніка Адміністрацыі Прэзідэнта Рэспублікі Беларусь Уладзімір Жаўняк прыехаў на сваю малую радзіму ў Хойніцкі раён, каб разам з дэпутатамі Палаты Прадстаўнікоў Святланай Чэкан і Людзмілай Макарынай-Кібак, якія таксама маюць палескія карані, пасадзіць лес у Хойніцкім лясгасе. Тут жа працаваў і памочнік Прэзідэнта Беларусі - інспектар па Гомельскай вобласці Юрый Шулейка. Суменымі намаганнямі было высаджана каля 5 тысяч хвой на дзялянцы, дзе летась насаджэнні пашкодзіў жук-караед.
- Рэспубліканскі суботнік кансалідуе жыхароў краіны для добрых спраў, - адзначыў намеснік кіраўніка Адміністрацыі Прэзідэнта Беларусі Уладзімір Жаўняк. - Дзякуючы сіле калектыўнай працы можна не толькі давесці да ладу тэрыторыю, але і рабіць вялікія справы на карысць краіны. Упэўнены, што ў справе навядзення парадку ў сваім родным населеным пункце важны ўнёсак кожнага жыхара.
У дзень суботніка прыведзены ў парадак населеныя пункты і зялёныя зоны, добраўпарадкавана больш за тысячу мемарыяльных комплексаў, месцаў баявой славы, пахаванняў воінаў і партызан Вялікай Айчыннай вайны. Дэпутаты Гомельскага абласнога савета дэпутатаў і Гомельскага гарадскога савета дэпутатаў прынялі ўдзел у добраўпарадкаванні лясной тэрыторыі ў Навабеліцкім раёне. Як раз там, дзе знаходзяцца новыя 94 і 96 мікрараёны, дзіцячыя дамы сямейнага тыпа і Гомельскі дзіцячы дом. 70 яго выхаванцах разам з прадстаўнікамі ўлады выйшлі прыбіраць смецце. Дарэчы, дзецям пашанцавала двойчы: яны ганарацца, што працавалі разам з уплывовымі людзьмі і ад іх жа яны атрымалі падарункі: спартыўную форму і інвентар, цукеркі. Мікалай Кавалевіч, які ўзначальвае дэпутацкі корпус Гомеля і адначасова з’яўляецца дэпутатам аблсавета, гаворыць, што ва ўсіх раёнах сумесна з адміністрацыямі створаны штабы па правядзенні суботнікаў:
- Дэпутаты ў гэты дзень выйшлі ў двары, якія патрабуюць дабраўпарадкавання ў самую першую чаргу. Мы імкнуліся ўлічыць пажаданні выбаршчыкаў – ахапіць самыя праблемныя месцы. Тут было шмат смецця. Разам атрымалася прыбраць. Акрамя таго, імкнуліся стварыць дзецям радасны настрой. Тройчы Гомель прызнаваўся самым чыстым абласным цэнтрам. Гэта вялікі гонар і вялікая адказнасцыць. Імідж трэба падтрымліваць штодзённа, у тым ліку вось такімі акцыямі.
У сувязі з няпростай зімой шмат намаганняў прыкладзена на прывядзення ў парадак дарог. У Гомелі на працягу некалькіх гадзін у станоўчы бок змянілася зона адпачынку на скрыжаванні вуліц Барадзіна і Каменшчыкава. Бераг невялікага вадаёма насупраць Валатаўскога пляжу ўпрыгожылі 60 жоўтых верб. У адным са двароў на Речыцкім праспекце ўстаноўлена новае абсталяванне для гульні дзяцей. Там жа пасаджана дэпутацкая алея. Міністр ЖКГ Беларусі Аляксандр Церахаў сумесна з працаўнікамі ЖКГ горада Гомелю пасадзіў дрэвы ўздоўж галоўнай дарогі новага мікрараёна “Шведская горка”.
На суботніку ў Чыгуначным раёне Гомеля ўсталявалі помнік у СШ № 25, дзе вучыўся Герой Савецкага Саюза Барыс Царыкаў. Скульптурная кампазіцыя прысвечана подзвігу моладзі ў гады Вялікай Айчыннай вайны. Гарадская арганізацыя кампартыі Беларусі добраўпарадкоўвала манументы Леніну. Для ўборкі, дарэчы, ёсць яшчэ адна нагода - 22 красавіка спащняецца 148 гадоў з дня нараджэння пралетарскага правадыра.
Грашовыя сродкі, сабраныя падчас суботніка, пойдуць на падтрыманне інфраструктуры раёнаў Гомельшчыны: у сферу аховы здароўя, адукацыі, падрыхтоўку дзіцячых аздараўленчых устаноў да летняга сезону… Гомельская вобласць падчас суботніка плануе зарабіць звыш Br1 млн 180 тыс.
Ірына АСТАШКЕВІЧ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
