Беларуска-ўкраінскі фестываль малых рэк правядуць у Пінскім раёне

У Пінскім раёне 22 жніўня адбудзецца трансгранічны фестываль малых рэк, паведамілі ў мясцовым фондзе садзейнічання развіццю міжнароднага дыялогу і супрацоўніцтва "Інтэракцыя".

Прадстаўнікі Пінскага раёна сумесна з аднадумцамі з украінскага Любешоўскага раёна рэалізуюць праект па маніторынгу малых рэк "Трансгранічныя водныя інспектары". Ініцыятыва накіравана на ўсебаковую абарону вадаёмаў басейна Прыпяці. Адзін з этапаў прадугледжвае правядзенне фестывалю малых рэк. Сямейнае свята адбудзецца ў вёсцы Пінкавічы. На тэрыторыі мясцовага стадыёна размесцяцца некалькі тэматычных пляцовак. У прыватнасці, разам з вулічным мастаком госці створаць экаінсталяцыю. Падчас майстар-класаў жадаючыя навучацца рабіць ўпрыгажэнні з травы і сена, створаць экасумку унікальнага дызайну. Забаўляць публіку ў гэты дзень будуць украінскія і беларускія гурты.

"У першую чаргу мы хочам прыцягнуць увагу насельніцтва да праблем малых рэк, прышчапіць культуру экалагічных паводзінаў. Падобныя мерапрыемствы - адзін са спосабаў падштурхнуць людзей задумацца, што стан навакольнага асяроддзя залежыць ад нас саміх, адказных адносін да прыроды", - адзначылі арганізатары.

Падчас фестывалю будуць падведзены вынікі трансгранічнага летняга лагера, які арганізуюць 16-21 жніўня ў вёсцы Калаўровічы. Яго ўдзельнікамі стануць 200 школьнікаў з Пінскага і Любешоўскага раёнаў. Менавіта яны будуць сачыць за станам малых рэк у сваіх населеных пунктах, дзе з'явяцца 20 грамадскіх экалагічных пастоў. Эксперты навучаць дзяцей карыстацца кампактнай хімічнай лабараторыяй і праводзіць маніторынгавыя кампаніі, рабіць самаробныя фільтры для вады. Запланаваны заняткі па правільнай сартаванні смецця, вывучэнню флоры і фауны рэк.

Праект "Трансгранічныя водныя інспектары" сафінансуецца Еўрапейскім саюзам па праграме тэрытарыяльнага супрацоўніцтва краін "Усходняга партнёрства" "Беларусь - Украіна". Агульны бюджэт ініцыятывы складзе каля 278 тыс. еўра, 90% гэтай сумы - уклад ЕС. З беларускага боку праект рэалізуюць Пінскі райвыканкам і фонд "Інтэракцыя". Іх партнёрамі выступаюць аддзел адукацыі, моладзі і спорту Любешоўскай раённай адміністрацыі і грамадская экалагічная арганізацыя "Свет вакол нас".

БЕЛТА