У канцы кастрычніка ў сталіцы адкрыецца самы сучасны ў краіне комплекс метэаралагічных і аэралагічных назіранняў «Мінск». Напярэдадні яго ўводу ў эксплуатацыю Мінпрыроды праводзіць суботнік па ўборцы і добраўпарадкаванні гэтага аб'екта.
— Адкрыццё комплексу — значная падзея для метэаролагаў, у тым ліку і ў межах выканання даручэння кіраўніка дзяржавы па ўдасканаленні метэапрагнозаў і самой гідраметэаралагічнай службы, — адзначыла прэс-сакратар Мінпрыроды Алена МЕЛЯШКОВА. — Найноўшае метэаралагічнае і тэхналагічнае абсталяванне, якое запрацуе ў раёне ваеннага гарадка «Уручча», дазволіць забяспечыць поўны цыкл гідраметэаралагічных назіранняў (прыземных метэаралагічных, аэралагічных, актынаметрычных, гідралагічных, радыёметрычных).
Цырымонія ўводу комплексу ў эксплуатацыю прымеркавана да 25-годдзя Нацыянальнай сістэмы маніторынгу навакольнага асяроддзя (святочныя мерапрыемствы пройдуць 30—31 кастрычніка).
Сёння, 20 кастрычніка, эколагі і метэаролагі, супрацоўнікі сістэмы Мінпрыроды на чале з міністрам Андрэем ХУДЫКОМ праводзяць завяршальныя работы па падрыхтоўцы комплексу да ўрачыстага адкрыцця: добраўпарадкоўваюць тэрыторыю, высаджваюць туі, праводзяць уборку памяшканняў і г. д.
Суботнік праводзіцца пад знакам экалагічнай кампаніі «Уладкуем малую радзіму», прысвечанай Году малой радзімы.
* * *
Прыземныя метэаралагічныя назіранні будуць ажыццяўляцца з дапамогай аўтаматызаванай метэаралагічнай сістэмы вытворчасці ААТ «Пеленг». Яна дазволіць у аўтаматызаваным рэжыме вымяраць 12 метэаралагічных параметраў і характарыстык, у тым ліку тэмпературу і параметры вільготнасці паветра, атмасферныя ападкі, напрамак і хуткасць ветру, тэмпературу глебы на розных глыбінях, працягласць сонечнага ззяння, вышыню снежнага покрыва і інш.
Вераніка КОЛАСАВА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?