Тэатральная вечарына, кангрэс «MamaPro», вечар хорар-чытак і VI Адкрыты фестываль-конкурс джазавай музыкі «Чысць — 2018» — афіша «Звязды» з 19 па 25 лістапада.
Дзе: Дзяржаўны літаратурны музей Янкі Купалы, вул. Я. Купалы, 4
Калі: 22 лістапада ў 17:00
Колькі каштуе: бясплатна
22 лістапада а 17 гадзіне Купалаў дом, які ашчадна захоўвае спадчыну народнага паэта Беларусі, збірае аматараў высокай паэзіі Адама Міцкевіча з нагоды 220-годдзя з Дня яго нараджэнння. Імя Адама Міцкевіча, жыццёвы і творчы шлях якога пачаўся на беларускай зямлі, стала духоўным сімвалам Польшчы, а яго літаратурная дзейнасць — неад’емнай часткай агульнаеўрапейскай культурнай спадчыны.
Адам Міцкевіч аказаў моцны ўплыў на фарміраванне і развіццё таленту Янкі Купалы, які пазней звярнуўся да твораў улюблёнага аўтара як перакладчык. Урыўкі з паэтычнага рамана Адама Міцкевіча «Конрад Валенрод» падчас імпрэзы прагучаць на мове арыгінала і ў перакладзе. Госці Купалавага дому ўбачаць фрагменты спектакля «Дзяды» па аднаіменным творы Адама Міцкевіча ў выкананні акцёраў «Тутэйшага тэатра» і «Тэатра Ч» у перакладзе на беларускую мову Сержа Мінскевіча.
Дзе: Вікторыя Алімп Гатэль, пр-т Пераможцаў, 103
Калі: 24 лістапада ў 10:00
Колькі каштуе: бясплатна, але неабходная рэгістрацыя
У гэтым годзе кангрэс захавае традыцыйны фармат адкрытага дыялогу мам і тат з урачамі — вядучымі спецыялістамі ў галіне мацярынства і дзяцінства. Праграма ўключае тры тэматычныя блокі: планаванне і ход цяжарнасці, роды і паслярадавое аднаўленне, педыятрыя і здароўе дзіцяці. Так, у лекцыйным блоку пра роды на сцэне з'явіцца імправізаваная радзільная зала з крэслам і лекарамі. Будучыя мамы змогуць у тэорыі прайсці паэтапна увесь працэс родаў і навучыцца рэчам, якія звычайна выклікаюць цяжкасці. На рэспубліканскім кангрэсе выступяць вядомыя ўрачы — вядучыя акушэры-гінеколагі, педыятры, псіхолагі, імунолагі і гэтак далей. На спецыяльнай зоне гутаркі з лекарамі тэт-а-тэт мамы змогуць пагаварыць з топавымі вузкімі спецыялістамі акушэрства, гінекалогіі, педыятрыі.
У рамках кангрэса будзе працаваць мама-маркет, дзе ўсе бацькі змогуць даведацца пра навінкі, якія палягчаюць штодзённыя клопаты маладой сям'і, а таксама абавязкова атрымаюць падарункі (адразу пры рэгістрацыі) ад брэндаў-партнёраў праекта, якія клапоцяцца пра здароўе і камфорт маладых сем'яў.
Дзе: Палац культурны Мінскага трактарнага завода, вул. Даўгабродская, 24
Калі: 21 лістапада ў 19:00
Колькі каштуе: ад 15 руб.
Раз у два гады ў музычнае жыццё Мінска вяртаецца самы важны конкурс барабаншчыкаў Беларусі. Аматары ўдарнай устаноўкі сустрэнуцца на гала-канцэрце з пераможцамі конкурсу «Барабанны бiт 2018» і барабаншчыкамі вядомых гуртоў. У рамках праекта выступяць лаўрэаты конкурсу «Барабанны бiт 2018», а таксама госці фестывалю. Хэдлайнер канцэрту — вядомы маскоўскі барабаншчык, артыст кампаніі «Yamaha» — Міхаіл Казадаеў.
Сваю гісторыю «Барабанны бiт» вядзе з 2005 года, калі адбыўся першы конкурс беларускіх барабаншчыкаў, арганізаваны з мэтай падтрымкі маладых талентаў і папулярызацыі ўдарнай устаноўкі. Ідэйным натхняльнікам і дырэктарам фестывалю з'яўляецца адзін з лепшых барабаншчыкаў Беларусі Аляксандр Сапега. За дванаццаць гадоў узровень выканаўцаў нязменна павышаўся, а геаграфія ўдзельнікаў пашыралася. Сёння лаўрэаты «Барабаннага бiта» радуюць сваім мастацтвам удзячных слухачоў у ЗША, Германіі, Малайзіі, Марока, Расіі, Украіне і Італіі.
Дзе: культурны хаб Ok16, вул. Кастрычніцкая, 16
Калі: 23 лістапада ў 20:00
Колькі каштуе: бясплатна, але неабходна зарэгістравацца
У адным цёмным-цёмным... Менавіта так пачынаюцца ўсе класічныя страшныя гісторыі, фінал якіх практычна заўсёды прадказальны. А калі паспрабаваць так: у адзін змрочны лістападаўскі вечар у сценах старога завода сустрэліся электронная музыка, сучасная драматургія і гатовы да эксперыментаў глядач. Які фінал будзе ў гэтай гісторыі?
У руінах бара культурнага хаба Ok16 адбудуцца сцэнічныя чытанні трох п'ес беларускага драматурга Канстанціна Сцешыка, які даследуе ў сваіх тэкстах цёмны бок чалавечага жыцця.
Канстанцін Сцешык — драматург, п'есы якога траплялі ў шорт- і лонг-лісты розных драматургічных конкурсаў, у тым ліку ў пазаконкурсную праграму фестывалю маладой драматургіі «Любимовка» (Масква). Па тэкстах Канстанціна пастаўлены спектаклі ў Маскве, Мінску, Растове-на-Доне, Екацярынбургу, Варонежы, Гомелі, Ніжнім Ноўгарадзе.
Дзе: Нацыянальны мастацкі музей, вул. Леніна, 20
Калі: 25 лістапада ў 16:00
Колькі каштуе: удакладняць у касе
Пачынаецца новы лекцыйны цыкл у рамках выставачнага праекта «Гадзіна цішыні» (Дзяржаўная Траццякоўская галерэя і Нацыянальны мастацкі музей Рэспублікі Беларусь). На гэты раз цыкл будзе прысвечаны рускаму пейзажу канца XIX — пачатку ХХ стагоддзя.
Рускае мастацтва мяжы стагоддзяў адлюстроўвае даволі складаную сістэму развіцця на аснове рэалістычнай школы, якая пачалася з дэманстратыўна строгіх правілаў і канонаў адлюстравання рэчаіснасці. Пазней яна прыйшла да пленэру, шырокага напластавання мазкоў і «выпадковага кадравання» у кампазіцыі. У першую чаргу гэта тычыцца такога жанру, як пейзаж, дзе, нягледзячы на ўяўную часам беднасць сюжэту ў адлюстраванні няхітрай прыгажосці роднай прыроды, работы рускіх майстроў бясконца разнастайныя. Гэта вечная прыгажосць, якую жывапісцы адлюстроўвалі кожны па-свойму — то ўрачыстай і яркай, ва ўладзе стыхіі і ціхамірнасці, то лірычнай, поўнай цішыні і спакою. Даведацца пра тое, як Ісаак Левітан, Вітольд Каэтанавіч Бялыніцкі-Біруля, Ігар Грабар, Канстанцін Каровін, Станіслаў Жукоўскі і іншыя жывапісцы мянялі ўяўленне аб пейзажы мяжы стагоддзяў, можна 18, 25 лістапада і 2 снежня.
25 лістапада адбудзецца лекцыя «Рускія мастакі на Удомлі». Чытае Дар'я Барташук, навуковы супрацоўнік НММ РБ.
Дзе: г. Маладзечна, пл. Цэнтральная, 7
Калі: 24—25 лістапада
Колькі каштуе: бясплатна
Фестываль-конкурс джазавай музыкі «Чысць — 2018» стартаваў у 2012 годзе па ініцыятыве Нацыянальнага акадэмічнага канцэртнага аркестра Рэспублікі Беларусь як фэст «Міншчына сустракае джаз». У фестывалі-конкурсе прымаюць удзел аматарскія ансамблі, аркестры і салісты устаноў культуры, незалежна ад ведамаснай прыналежнасці, а таксама калектывы і салісты навучальных устаноў, школ мастацтваў, каледжаў і г.д., без абмежавання ўзросту ўдзельнікаў, якiя выконваюць джазавую музыкі любых напрамкаў.
У праграме фестывалю: урачыстае адкрыццё, майстар-клас, канцэрт прафесійнага калектыву, джэм-сэйшн удзельнікаў і журы. Таксама ў рамках фестывалю-конкурсу будзе працаваць Арт-майстэрня «Садружнасць» па праграме Рэспубліканскай акцыі «Год малой радзімы 2018 — 2020».
Дзе: Нацыянальны мастацкі музей Рэспублікі Беларусь, вул. Леніна, 20
Калі: па 9 снежня
Колькі каштуе: 8 рублёў
Творчасці Рыгора Сітніцы ўласцівы спалучэнне супрэматычных і канструктывісцкіх прынцыпаў у пабудове кампазіцыі, гіперрэалістычная трактоўка формы, сімвалічнасць мастацкай мовы. Таксама ёй характэрна пільная ўвага да беларускіх нацыянальных каштоўнасцей — гісторыі, этнаграфіі, фальклору — як неад’емных частак агульнаеўрапейскага культурнага кантэксту. Стылістычная манера мастака надае канкрэтным аб’ектам яго твораў грунтоўную сутнасць сімвалаў, знакаў і выводзіць іх на памежжа, дзе форма, не губляючы сваёй рэалістычнасці, захоўвае рысы абстрактнага вобраза. Ён паказвае рэчаіснасць фрагментарна і выводзіць яе пры гэтым са звычайнага прасторавага кантынуума.
Рыгор Сямёнавіч Сітніца — беларускі мастак-графік, паэт. Лаўрэат літаратурнай прэміі «Полымя» (2001). Лаўрэат літаратурнай прэміі «Залаты апостраф» (2007). Лаўрэат Рэспубліканскіх біенале жывапісу, графікі, скульптуры (2008, 2010, 2013). Узнагароджаны медалём Францыска Скарыны (2012). Ганаровы акадэмік Расійскай акадэміі мастацтваў (2015). Лаўрэат Нацыянальнай прэміі ў галіне выяўленчага мастацтва (2017).
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
