Вы тут

Актыўна будуецца жыллё і развіваецца вытворчасць


Карэспандэнт «Звязды» пацікавіўся ў старшыні Лёзненскага райвыканкама Івана Лаўрыновіча, якія навіны ў раёне, што мяжуе з Расіяй.


— Нядаўна ў раёне адсвяткавалі 75-ю гадавіну вызвалення ад нямецка-фашысцкіх захопнікаў, адкрылі пасля рэканструкцыі мемарыял у райцэнтры. Калі ласка, нагадайце пра гэту падзею.

— 10 кастрычніка мы першымі ў вобласці адсвяткавалі 75-ю гадавіну вызвалення. Памятнай і сумнай вяхой увайшлі ў гісторыю раёна гады Вялікай Айчыннай. За час акупацыі было спалена 196 вёсак, разрабаваныя ўсе прадпрыемствы, калгасы і саўгасы, цалкам разбураны гарадскі пасёлак. Самымі цяжкімі былі людскія страты. Калі да вайны ў раёне пражывала каля 60 тысяч чалавек, то пасля вызвалення раёна — амаль 15,5 тысячы.

Доўгія дзевяць месяцаў кровапралітных баёў за Лёзненшчыну былі аплачаны коштам жыццяў больш як 32 тысяч воінаў Чырвонай Арміі і партызан. І сведчанне таму — 88 воінскіх пахаванняў, больш за 600 помнікаў і абеліскаў, устаноўленых на месцах баявой славы і гібелі воінаў-вызваліцеляў, мірных жыхароў.

У час святкавання юбілею адбыліся два значныя мерапрыемствы. І ў першую чаргу гэта адкрыццё пасля маштабнай рэканструкцыі мемарыяльнага комплексу «Адаменская горка». Мемарыял пабудавалі ў 1984-м. Тут спачываюць байцы Чырвонай Арміі, якія загінулі падчас вызвалення ў 1943—1944 гадах, а таксама памерлыя ад ран пацыенты ваенных шпіталяў, якія размяшчаліся ў ваколіцах. За вельмі кароткі тэрмін, дзякуючы спонсарскай дапамозе жыхаркі Масквы Марыны Фраловай, сваячкі малодшага лейтэнанта Мікалая Лашкова, які загінуў пры вызваленні і пахаваны тут, удалося зрабіць рэканструкцыю. А менавіта — правесці падрыхтоўчыя работы і ўсталяваць стэлы з ордэнам Айчыннай вайны, паміж якімі знаходзяцца мемарыяльныя пліты з прозвішчамі загінулых. Раней іх было вядома толькі 500. Да 75-гадавіны вызвалення была праведзена сур'ёзная пошукавая работа і ўстаноўлена яшчэ 320 імёнаў загінулых вызваліцеляў.

Са свайго боку мы аказалі ўсю неабходную дапамогу. Былі праведзены суботнікі па добраўпарадкаванні тэрыторыі.

— Калі не памыляюся, у гонар юбілею вызвалення ў райцэнтры быў здадзены фізкультурна-аздараўленчы комплекс?

— Так. Яшчэ адзін знакавы момант святкавання — гэта адкрыццё другой чаргі фізкультурна-аздараўленчага комплексу. Да гэтага ў 2016 годзе былі адкрыты ў адным будынку бібліятэка, Дом рамёстваў і некалькі спартыўных памяшканняў.

А да 75-годдзя вызвалення пачалі працаваць басейн з трыма дарожкамі, трэнажорная і гульнявая залы. Пра тое, што Лёзну патрэбны басейн, тутэйшыя казалі даўно. Ды многія нават не марылі, што калі-небудзь гэта стане явай. Але прынялі рашэнне — басейну быць! Ідэю падтрымалі і старшыня аблвыканкама Мікалай Шарснёў, старшыня Палаты прадстаўнікоў Нацыянальнага сходу Рэспублікі Беларусь Уладзімір Андрэйчанка. Сёння няпроста знаходзіць грошы на стварэнне такіх аб'ектаў, але мы гэта робім. Таму што і ў маленькіх рэгіёнах людзі розных узростаў павінны мець магчымасць займацца фізічнай культурай і клапаціцца пра здароўе.

— У раёне актыўна будуецца жыллё і развіваецца вытворчасць. Скажыце некалькі слоў пра гэтыя кірункі.

— У раёне праводзіцца эфектыўная і планавая жыллёвая палітыка. Практычна штогод будуюцца шматкватэрныя жылыя дамы ў гарадскім пасёлку. На 2018-ы раёну было даведзена заданне па ўводзе жылля агульнай плошчай 3700 квадратных метраў. Для выканання гэтага задання ў эксплуатацыю ўводзяцца адразу два дамы: 8-кватэрны па вуліцы Дабрамыслінскай і 40-кватэрны жылы дом — на Лынькова. Плюс — індывідуальнае жыллёвае будаўніцтва (агульнай плошчай 1245 «квадратаў»).

Дарэчы, 8-кватэрны дом — гэта эксперыментальны будынак у нашым рэгіёне з выкарыстаннем электрычнай энергіі для ацяплення, гарачага водазабеспячэння і прыгатавання ежы. У двухпакаёвыя кватэры заселяцца спецыялісты, якія маюць патрэбу ў жыллі.

На 2019 год запланавана будаўніцтва 40-кватэрнага жылога дома па вуліцы Марыі Акцябрскай і індывідуальных жылых дамоў — агульнай плошчай тысяча квадратных метраў.

Наконт вытворчасці. Будзе весціся будаўніцтва свінагадоўчага рэпрадуктара (на 5000 галоў свінаматак у год) паблізу аграгарадка Пушкі. Фінансуе гэты праект Міжнародны банк развіцця сумесна з беларуска-ізраільскай фірмай АGRІGО Рrоjесts ltd. Адкрыццё запланавана на 2020 год.

А налета плануецца завяршэнне будаўніцтва цэха племяннога маладняку ААТ «Віцебская бройлерная птушкафабрыка» — недалёка ад населенага пункта Перамонт.

Аляксандр ПУКШАНСКІ

Выбар рэдакцыі

Грамадства

Асваенне адчужэння. Што паглядзець падчас экскурсіі ў радыяцыйнай зоне?

Асваенне адчужэння. Што паглядзець падчас экскурсіі ў радыяцыйнай зоне?

Ці небяспечныя такія «вылазкі» і колькі яны каштуюць?

Грамадства

Мітрапаліт Павел: Я ўдзячны, што Гасподзь павёў мяне па гэтым шляху

Мітрапаліт Павел: Я ўдзячны, што Гасподзь павёў мяне па гэтым шляху

Уладыка расказаў, чаму з асцярогай упершыню ехаў у Мінск у якасці мітрапаліта.

Калейдаскоп

Вясёлыя гісторыі чытачоў

Вясёлыя гісторыі чытачоў

Добрая жонка і дома рай, а благая — хоць цягу дай

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.