Квяцістая капуста з'яўляецца каштоўным дыетычным прадуктам у харчаванні дарослых і дзяцей. Большасць агароднікаў вырошчваюць яе на сваіх зямельных участках толькі адзін раз на працягу пасяўнога сезона. А можна ласавацца гэтым далікатным пажыўным прадуктам з чэрвеня па кастрычнік.
Арганізаваць канвеер па вырошчванні галовак квяцістай капусты зусім не складана. Для гэтага трэба набыць насенне сартоў або гібрыдаў розных тэрмінаў паспявання. Важна, каб насенне мела выдатныя пасяўныя якасці.
Квяцістую капусту прынята вырошчваць праз расаду, бо расце яна даволі доўгі час — ад 80 дзён і больш. І калі пасеяць насенне скораспелых (ультраранніх) сартоў у другой палове сакавіка, а затым высадзіць 30—45-дзённую расаду ў канцы красавіка (пачатку мая) у грунт пад укрыццё, то першы ўраджай каляровых галовак можна падаць на стол у пачатку чэрвеня.
Да другога абароту прыступаюць у першай дэкадзе красавіка. Для сеяння бяруць таксама раннія (сярэдняраннія) сарты або гібрыды. Расаду лепш вырасціць на ўчастку ў цяплічцы. На градку падрошчаныя сеянцы рассаджваюць у лункі ў канцы мая. Галоўкі квяцістай капусты спеюць ужо ў сярэдзіне ліпеня.
Трэці, летне-восеньскі ўраджай паспее ў жніўні, у разгар дачных нарыхтовак. Насенне на расаду сеюць у канцы красавіка — сярэдзіне мая, а на градкі 25—30-дзённую расаду высаджваюць у сярэдзіне чэрвеня. Для сеяння падыходзяць сярэдняраннія і сярэдняспелыя сарты. Пры выкарыстанні сярэдняпозніх сартоў ураджай здымаюць пазней, у верасні і пачатку кастрычніка.
Акрамя правільна падабраных сартоў і сеяння насення на расаду ў розныя тэрміны, важнымі фактарамі з'яўляюцца вырошчванне жыццяздольнай моцнай расады і выкананне правілаў агратэхнікі вырошчвання гэтай культуры.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
