Вы тут

Выключна на «выдатна», або магія лічбаў у залікоўцы


Летам студэнтам не трэба думаць, як выконваць складаныя падлікі ці разбірацца ў філасофіі Гегеля, рабіць бясконцыя, няхай і цікавыя, даследаванні... Здаў усе экзамены — гуляй, як вецер у чыстым полі. Асабліва калі заслужыў, калі ў тваёй залікоўцы добрыя адзнакі: напрыклад, красуецца хоць бы адна дзясятка. Ты з гонарам пазіраеш на яе, хвалішся знаёмым...


У студэнтак Беларускага дзяржаўнага ўніверсітэта інфарматыкі і радыёэлектронікі Карыны Мікалуць, Ганны Шандрохі, Алесі Палулех такіх «прыгажунь» у залікоўках аж па пяць, за кожную сесійную дысцыпліну. І ніякага сакрэту тут няма: у атрыманні дзяўчатамі найвышэйшых адзнак сваю ролю адыгралі стараннасць, руплівая праца і ўпэўненасць у сабе.

Адразу ж улілася ў вучобу і дасягнула поспеху першакурсніца інжынерна-эканамічнага факультэта (спецыяльнасць «электронны маркетынг») Карына Мікалуць.

— У БДУІР вырашыла паступаць даўно, ён заўсёды мяне вабіў, — кажа дзяўчына. — Як вядома, ІT-спецыяльнасці сёння — адны з самых запатрабаваных і прэстыжных на рынку працы. Разам з тым эканамічны складнік таксама даўно прыцягваў увагу, таму выбар зрабіла на карысць інжынерна-эканамічнага факультэта. Лічу, што ў нас шмат пераваг у параўнанні з падобнымі спецыяльнасцямі ў іншых ВНУ.

Карыне давялося здаваць падчас зімовай сесіі такія новыя для яе прадметы, як «вышэйшая матэматыка», «асновы эканомікі», «асновы алгарытмізацыі і праграмавання» і «філасофія».

— Да іспытаў рыхтавалася, натуральна, не ў апошні момант, — канстатуе выдатніца. — Спрабавала не прапускаць заняткі, асабліва практычныя. Імкнулася выконваць усё, што патрабуюць выкладчыкі: калі яны бачаць, што студэнты стараюцца, стаўленне да іх змяняецца. Таксама даволі шмат часу прысвячала самаадукацыі.

І хоць, здаецца, адказнай першакурсніцы не было пра што турбавацца, усё адно перажывала, а ў ноч перад некаторымі экзаменамі нават штосьці давучвала.

З лёгкасцю пераходзіць на чацвёрты курс таго ж факультэта студэнтка спецыяльнасці «эканоміка электроннага бізнесу» Ганна Шандроха. З самага пачатку семестра яна хацела атрымаць максімум пры здачы сесіі, упарта вучыла кожны прадмет, таму была ўпэўнена: усё атрымаецца. Магчыма, дапамог і даўні рытуал — пакласці канспект пад падушку. А перад сном выпіць чай з мятай, каб супакоіцца. Цяпер Ганна паралельна з вучобай працуе бізнес-аналітыкам у кампаніі. Там ёй вельмі падабаецца калектыў. Ці пойдзе туды пасля ўніверсітэта, дзяўчына пакуль не хоча загадваць.

Алеся Палулех таксама закончыла трэці курс факультэта інфармацыйных тэхналогій і кіравання (спецыяльнасць «прамысловая электроніка»). У БДУІР вырашыла паступаць пасля Мінскага радыётэхнічнага каледжа, каб працягнуць навучанне. Спачатку нават і не думала, што атрымае «дзясяткі», але, калі большая частка прадметаў была здадзена, захацелася, каб усё было ідэальна. На саміх іспытах студэнтка, хоць і мандражыравала, але і падбадзёрвала астатніх, тых, хто баяўся і галасіў: «Я не здам».

Па-за заняткамі выдатніца захапляецца дызайнам інтэр'ераў. Свае веды яна скарыстоўвае на практыцы, але пакуль што толькі дома.

— Планую, як павінна выглядаць памяшканне, якімі маюць быць асвятленне, расстаноўка мэблі, аздабленне сцен і столяў, — тлумачыць Алеся. — Мне падабаецца, калі дома робіцца прыгажэй.

...Цяпер дзяўчаты адпачываюць, радуюцца яркаму і непаўторнаму лету. За гэты час яны, безумоўна, набяруцца сіл, каб зноў змагацца і перамагаць. А «дзясяткі» стануць для іх выдатным стымулам на будучыню.

Юлія АДАМОВІЧ

Выбар рэдакцыі

Культура

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Беларускаму складніку Тахелеса прысвечаны арт-фестываль «Міфалагема тысячагоддзя», што адкрыўся ў прасторы Ок16 15 жніўня.

У свеце

Як развіваецца глабальнае супрацьстаянне ЗША і Кітая?

Як развіваецца глабальнае супрацьстаянне ЗША і Кітая?

Супярэчнасці ў адносінах паміж Вашынгтонам і Пекінам абвастраюцца, і іх можна смела называць гандлёвай вайной.

Грамадства

Якім павінен быць вучэбны дапаможнік у ХХІ стагоддзі?

Якім павінен быць вучэбны дапаможнік у ХХІ стагоддзі?

З 50 выданняў, якія павінны з'явіцца на школьных партах да 1 верасня, 48 ужо надрукаваныя.

Здароўе

Якія аперацыі беларускія афтальмолагі робяць пры катаракце, глаўкоме і іншых хваробах вачэй

Якія аперацыі беларускія афтальмолагі робяць пры катаракце, глаўкоме і іншых хваробах вачэй

Экзапратэзаванне арбіты не робіцца больш ні ў адной з краін СНД.