Вы тут

Заведзена крымінальная справа па факце выкрадання дзяўчыны


У Брэсце здзейснена дзёрзкае злачынства, якое Крымінальны кодэкс кваліфікуе як выкраданне чалавека. Сваю былую дзяўчыну 29-гадовы мужчына сілком зацягнуў у багажнік машыны, а потым яшчэ і збіў драўлянай бітай.


Гэта крымінальная драма пачалася а палове дзявятай раніцы. Выкрадальнік чакаў сваю ахвяру каля пад'езда яе дома. І як толькі яна выйшла на ганак, адразу схапіў яе, скруціў, запхнуў у багажнік машыны. Відавочцам нападу стаў дворнік, які працуе ў тым раёне, але ўмяшацца не паспеў. Зламыснік вельмі хутка з'ехаў з месца здарэння, але дворнік запомніў нумар машыны і пазваніў у міліцыю. Крыху пазней сама выкрадзеная здолела патэлефанаваць з багажніка на лінію 102 і сказаць, хто яе выкраў. Праўда паведаміць, куды вязе яе былы кавалер, не магла, бо не ведала.

Арыентуючыся на тыя звесткі, якія паведаміла ахвяра пра свайго выкрадальніка, міліцыянеры ўвялі план «Перахват» на тэрыторыі Жабінкаўскага, Кобрынскага, Бярозаўскага раёнаў.

— Затрымаць зламысніка ўдалося ў вёсцы Бусні Жабінкаўскага раёна, — пракаментавала прэс-сакратар МУС краіны Вольга Чамаданава. — Выкрадальнікам аказаўся былы хлопец 21-гадовай дзяўчыны, супрацоўніцы аднаго з банкаў Брэста.

Як стала вядома пазней, жыхары вёскі Бусні дапамаглі затрымаць зламысніка. Там ён з нейкай прычыны спыніў машыну, дзяўчыне ўдалося выбрацца з багажніка, яна кінулася наўцёкі, але ён дагнаў і ўдарыў некалькі разоў бітой па галаве. Мясцовы трактарыст умяшаўся ў канфлікт, тым часам пад'ехала міліцыя, і хулігана звязалі.

Дзяўчыну адвезлі ў Жабінкаўскую раённую бальніцу і пасля неабходных абследаванняў шпіталізавалі.

Як высветлілася пазней, дзёрзкі выкрадальнік — жыхар вёскі Дзівін Кобрынскага раёна. Ён рос сіратой, бацькі загінулі ў аўтакатастрофе. Раней ездзіў на заробкі ў Маскву, зараз нідзе не працуе, з законам да гэтага праблем не меў. Дзяўчына таксама з гэтай вёскі. Пасля заканчэння ўніверсітэта выйшла на работу ў адну з фінансавых устаноў абласнога цэнтра. Яны раней сустракаліся, але потым адносіны разладзіліся.

За выкраданне чалавека фігуранту справы пагражае пазбаўленне волі да сямі гадоў. Як паведамілі ў Брэсцкім міжраённым аддзеле СК, праводзяцца ўсе неабходныя следчыя дзеянні.

Святлана ЯСКЕВІЧ

Загаловак у газеце: Няўдачлівы дзівінскі Атэла

Выбар рэдакцыі

Эканоміка

У Мінску прадаецца больш за 10 тысяч кватэр

У Мінску прадаецца больш за 10 тысяч кватэр

На другасным рынку жыллё працягвае таннець (у глабальным плане без перапынкаў) ужо з верасня мінулага года.

Грамадства

Падмануць Альцгеймера. Як захаваць ясны розум да глыбокай старасці?

Падмануць Альцгеймера. Як захаваць ясны розум да глыбокай старасці?

Няўжо гэтую цяжкую хваробу так лёгка абвесці вакол пальца?

Калейдаскоп

Разбіраем модныя мастхэвы надыходзячага сезона: чым папоўніць гардэроб?

Разбіраем модныя мастхэвы надыходзячага сезона: чым папоўніць гардэроб?

Мода вясны — 2021 прапануе некалькі глабальных кірункаў: мінімалізм, унісекс і 1990-я.