Вы тут

Эпiдэмii прыходзяць i сыходзяць, а iнфекцыянiстам заўсёды трэба быць напагатове


Цяперашняя пандэмiя яшчэ раз нагадала i медыкам, i ўладным структурам, i нам усiм, як важна супрацоўнiчаць дзяржавамi не толькi ў галiне эканомiкi, але i ў галiне аховы здароўя. Свет цяпер надзвычай рухомы, людзi перасоўваюцца, а з iмi перамяшчаюцца iнфекцыi i вiрусы, для якiх гранiцы не iснуюць наогул. Таму вельмi важным бачыцца стан здароўя насельнiцтва ў пагранiччы. А ён залежыць ад многiх фактараў. Сярод iх можна назваць аснашчанасць устаноў аховы здароўя, падрыхтаванасць медыцынскага персаналу, абмен iнфармацыяй i шмат iншых.


Пра асаблiвасцi дыягностыкi i лячэння гепатыту С, ВIЧ/СНIД, iншых вiрусных iнфекцый iшла гаворка на семiнары-трэнiнгу, якi правяла Брэсцкая абласная клiнiчная бальнiца ў рамках праграмы беларуска-польскага супрацоўнiцтва. Канферэнцыя вызначылася тым, што яе не адмянiлi, як многiя мерапрыемствы, а правялi ў раней прызначаны дзень. Пры рэгiстрацыi ўдзельнiкам прапаноўвалi скарыстацца антысептыкам, а крэслы ў зале пасяджэння стаялi не шчыльна, а на пэўнай адлегласцi. У астатнiм семiнар праходзiў як звычайна. Урачы абласной бальнiцы дзялiлiся ведамi са сваiмi калегамi з раённых цэнтраў, гарадскiх бальнiц i палiклiнiк.

Гэтая канферэнцыя праводзiлася ў рамках праграмы трансгранiчнага супрацоўнiцтва Польшча—Беларусь—Украiна, якое ажыццяўляецца пры падтрымцы Еўрапейскага саюза з 2013 года. Менавiта сем гадоў таму Брэсцкая абласная бальнiца разам са шпiталем з Бяла-Падляскi выйграла грант на праграму паляпшэння кардыялагiчнай дапамогi насельнiцтву польскага i беларускага пагранiчча. Тады ў нашай аблбальнiцы правялi рэканструкцыю аддзялення эндаваскулярнай хiрургii i набылi ангiяграфiчны комплекс. Урачы асвоiлi новыя методыкi лячэння перыферычных захворванняў артэрый, сталi на новым узроўнi працаваць з сасудамi галаўнога мозга. Усё гэта, несумненна, паспрыяла паляпшэнню якасцi медыцынскiх паслуг.

— Наступны кiрунак супрацоўнiцтва, якi мы абралi пасля кансультацый з польскiмi калегамi ў 2016 годзе, датычыўся паляпшэння эпiдэмiялагiчнай бяспекi, — расказаў галоўны ўрач Брэсцкай абласной клiнiчнай бальнiцы Аляксандр КАРПIЦКI (на фота). — Праграма разлiчана на адрэзак часу, што ўключае 2020 год, яна прадугледжвае набыццё абсталявання для лабараторнай дыягностыкi iнфекцыйных захворванняў, а таксама вялiкую работу па навучаннi медыцынскага персаналу. Вучоба вядзецца асобна з абодвух бакоў гранiцы з наступнымi сумеснымi вучэннямi медыкаў. Калi мы выбiралi тэму, мы не маглi прадугледзець цяперашняй пандэмii, выбiралi кiрунак па агульнай актуальнасцi. А цяпер атрымлiваецца, нiбы ў ваду глядзелi, — працягвае Аляксандр Сяргеевiч. — Лiтаральна на гэтым тыднi працягваем атрымлiваць закупленыя па праграме касцюмы шматразовага выкарыстання для медыцынскага персаналу i боксы для транспарцiроўкi iнфекцыйных хворых.

Пра важнасць праекта для ранняга выяўлення гепатыту С карэспандэнту газеты расказаў загадчык 2-га iнфекцыйнага аддзялення Брэсцкай абласной бальнiцы, галоўны пазаштатны iнфекцыянiст вобласцi Мiкалай СУЛЕЎСКI:

— Вiрусны гепатыт С па-ранейшаму з'яўляецца вялiкай праблемай. I калi ў апошнi час колькасць захворванняў у вострай форме крыху памяншаецца, то нязменна расце колькасць хранiчных формаў гэтай паталогii. Па праграме супрацоўнiцтва мы ўжо атрымалi тэст-сiстэмы для выяўлення гепатыту С, таксама набылi апарат для вызначэння ступенi фiброзу печанi. Важна адразу выявiць, на якой стадыi хвароба, каб мы не страцiлi час ад выяўлення праблемы ў пацыента да моманту прызначэння тэрапii, бо наша максiмальная задача заключаецца ў тым, каб не дапусцiць развiцця цырозу i яго ўскладнення.

Па гэтай праграме будзе абследавана больш за 3000 грамадзян. Ужо прайшлi тэсты 498 чалавек, у 22 з iх дыягнаставаны гепатыт С. Гэта значыць, чалавек жыў i нават не падазраваў, што мае ў арганiзме такую iнфекцыю i з'яўляецца яе носьбiтам.

Мiкалай Iванавiч таксама звярнуў увагу на адказнасць кожнага чалавека за сваё здароўе. У гэтым кантэксце ён прывёў прыклад, калi гепатыт выявiлi ў клiенткi прыватнага майстра манiкюру. Цяпер многiя ажыццяўляюць паслугi цырульнiка, робяць манiкюр, педыкюр дома, без рэгiстрацыi, без патэнцыйных праверак з боку санiтарных службаў. Таму кожны павiнен выбiраць, дзе абслугоўвацца: у афiцыйнай установе, дзе даражэй, цi нелегальна — танней, але без усякiх гарантый бяспекi.

Не магла не скарыстаць нагоду i не спытаць пра каранавiрус: у iнфекцыйным аддзяленнi шпiталiзаваныя людзi з групы рызыкi, якiя прыехалi з-за мяжы альбо кантактавалi з хворымi.

— На сённяшнi дзень (20 сакавiка. — Аўт.) фактаў каранавiруса ў Брэсцкай вобласцi зарэгiстравана не было, — паведамiў загадчык аддзялення. — Хачу папрасiць, каб людзi не паддавалiся панiцы, да таго ж вельмi адказна i асцярожна ставiлiся да iнфармацыi, якую распаўсюджваюць: яна можа нашкодзiць часам не менш за няправiльнае лячэнне.

На канферэнцыi размова iшла пра яшчэ адну каварную iнфекцыю сучаснасцi — ВIЧ-iнфекцыю. Загадчыца кабiнета кансультацыі і дыспансерызацыi хворых на ВIЧ/СНIД абласной бальнiцы Людмiла КАСЦЮКЕВIЧ адзначыла, што ў 25 працэнтаў выпадкаў ВIЧ спалучаецца з гепатытам С:

— Нашы пацыенты атрымлiваюць лячэнне ад гепатыту ў прыярытэтным парадку. Важнасць праграмы, пра якую iдзе гаворка, вядома, у своечасовым выяўленнi iнфекцыi, не меншая важнасць i ў асветнiцкай рабоце. Сёння, напрыклад, я гаварыла з калегамi пра тое, як агульнымi намаганнямi дасягнуць пастаяннага стану заклапочанасцi i насцярожанасцi. Вы, мабыць, заўважалi, што, тэматыка ВIЧ у СМI, у грамадстве агучваецца ў выглядзе кампанiй. Скажам, 1 снежня, а таксама ў дзень памяцi ахвяр СНIДу пра каварную хваробу гавораць актыўна, потым iнфармацыйная хваля сцiхае. Страчваюць насцярожанасць не толькi, умоўна кажучы, абывацелi, але нават медыкi, якiя, здараецца, своечасова не накiроўваюць людзей з групы рызыкi на абследаванне. У вынiку да нас трапляе чалавек на апошнiх стадыях хваробы, якому ўжо немагчыма дапамагчы. Летась такiх было 18 працэнтаў ад агульнай колькасцi.

Яшчэ суразмоўнiца засяродзiла ўвагу на тым, што з выяўленых летась ВIЧ-станоўчых пацыентаў 86 працэнтаў атрымалi вiрус пры палавых кантактах. «Так што мараль па-ранейшаму мае значэнне для грамадства ў цэлым i кожнага чалавека ў прыватнасцi. Бо заразiцца пры беспарадкавых альбо выпадковых сувязях можна не толькi ВIЧ, але i фактычна любой iнфекцыяй», — падсумавала Людмiла Баляславаўна.

Работа па праграме супрацоўнiцтва працягваецца. У найблiжэйшы час запланаваны семiнар-вучоба для медсясцёр, за iм другiя мерапрыемствы.

— Хачу падкрэслiць канструктыўнасць нашага супрацоўнiцтва з польскiмi калегамi, — заўважыў галоўны ўрач Брэсцкай аблбальнiцы, член Пастаяннай камiсii па мiжнародных справах i нацыянальнай бяспецы Савета Рэспублiкi Аляксандр Карпiцкi. — Напрыклад, пры вызначэннi аб'ёмаў фiнансавання менавiта нашы калегi пераканалi ўласнае ведамства аховы здароўя, што нам неабходная большая частка выдзеленых грошай. I мы яе атрымалi. Цяпер сродкi паспяхова асвойваюцца.

Святлана ЯСКЕВIЧ

Загаловак у газеце: Як ведалі...

Выбар рэдакцыі

Грамадства

«Антыдэпрэсанты не выклiкаюць прывыкання i залежнасцi». Як перамагчы трывогу i дэпрэсiўны настрой?

«Антыдэпрэсанты не выклiкаюць прывыкання i залежнасцi». Як перамагчы трывогу i дэпрэсiўны настрой?

Расказаў урач-псiхiятр-нарколаг мiнскага гарадскога клiнiчнага псiхiятрычнага дыспансера Iгар Сарокiн.

Грамадства

Прыехаць за 30 хвiлiн. Як у аварыйных выпадках павiнны рэагаваць камунальнiкi

Прыехаць за 30 хвiлiн. Як у аварыйных выпадках павiнны рэагаваць камунальнiкi

У Беларусi дзейнiчае такi дакумент, як «Тэхнiчная эксплуатацыя жыллёвых i грамадскiх будынкаў i збудаванняў. Парадак правядзення».