Пра іх паведамляе Дзяржаўная інспекцыя па ахове жывёльнага і расліннага свету.
Позна ноччу ў вёсцы Варганы Докшыцкага раёна інспектары Глыбоцкай міжрайінспекцыі і супрацоўнікі міліцыі спынілі аўтамабіль «Ніва», на якім мясцовы жыхар перавозіў больш за 200 кілаграмаў мяса незаконна здабытага ім лася, а таксама трафейныя рогі з сямю атожылкамі. Мужчына быў паляўнічым, у яго канфіскавалі зарэгістраваную стрэльбу.
У той жа дзень у Магілёўскім раёне разгарнулася пагоня за паляўнічымі-нелегаламі. Істотную дапамогу ў іх затрыманні аказаў законапаслухмяны прадстаўнік паляўнічай супольнасці. Рэйдавая група інспектараў працавала ва ўгоддзях каля вёскі Вендарож, дзе сустрэла егера і паляўнічага. Праз некаторы час егер па тэлефоне паведаміў, што чуў падазроныя стрэлы ў лесе, а яго кампаньён прапанаваў інспектарам сваю дапамогу.
Праваахоўнікі занялі пазіцыю каля дзвюх дарог, па якіх маглі б выязджаць меркаваныя браканьеры. Неўзабаве з лесу на вялікай хуткасці выскачыў аўтамабіль «Рэно», за ім рушыў услед на сваім аўто паляўнічы і падсеўшы да яго інспектар. Спярша парушальнікі нават не здагадваліся пра пераслед, але калі на пад’ездзе быў другі экіпаж, ім перагарадзілі дарогу.
У «Рэно» двое мужчын перавозілі часткова разрабраныя тушы ласіхі і ласёнка-сяголетка. Як высветлілася, жывёл здабыў кіроўца аўто. Ён паляўнічы, аднак у той дзень выходзіў ва ўгоддзі з пуцёўкай на птушак, а, значыць, не меў права страляць па капытных. Усведамляючы наступствы свайго ўчынку, мужчына схаваў стрэльбу на дачы ў знаёмага, які і дапамог яму з разборам ласёў. Абодвум парушальнікам пагражае крымінальнае пакаранне, а жадання пакаштаваць дзічыны абыдзецца ў 16,2 тысячы рублёў.
У Валожынскім раёне інспектары Маладзечанскай міжрайінспекцыі адпрацоўвалі атрыманую імі інфармацыю: мясцовыя жыхары не раз бачылі ва ўгоддзях каля вёскі Есьманоўцы белы мікрааўтобус, на якім, на іх думку, маглі перасоўвацца браканьеры. У той дзень ён зноў з’явіўся — позна ўвечары яго заўважыў і спыніў экіпаж ДАІ. Як толькі патрульныя зазірнулі ўнутр і ўбачылі падбітых казуль, двое пасажыраў кінуліся ва ўцёкі.
Затрыманы кіроўца ўзяў віну за незаконнае паляванне на сябе. Нягледзячы на гэта, зараз устанаўліваюцца асобы ўцекачоў, якія праявілі на паляванні асаблівую жорсткасць. Адна з двух здабытых імі казуль была яшчэ жывая і моцна мучалася — жывёле прастрэлілі хрыбетнік. На жаль, выратаваць казулю не ўдалося.
Сяргей РАСОЛЬКА
Фота з сайта Дзяржінспекцыі
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
