Пракурор Мінска: У сталіцы за ўвесь перыяд пратэстных паслявыбарчых акцый да адміністрацыйнай адказнасці прыцягнута каля 3 тысяч чалавек, устаноўлена 275 датычных да здзяйснення злачынстваў

У Мінску за ўвесь перыяд пратэстных паслявыбарчых акцый да адміністрацыйнай адказнасці прыцягнута каля 3 тыс. чалавек, устаноўлена 275 датычных да здзяйснення злачынстваў. Пра гэта заявіў пракурор горада Мінска Алег Лаўрухін ў эфіры тэлеканала СТБ.

Прадстаўнік пракуратуры нагадаў, што арт. 23.34 — парушэнне парадку арганізацыі або правядзення масавых мерапрыемстваў — прадугледжвае розныя віды адказнасці: ад штрафу да адміністрацыйнага арышту. Прычым абвінавачванне па гэтым артыкуле прад’яўляецца, калі «не было актыўнасці або грамадскай небяспекі ў дзеяннях правапарушальніка». Пакарання за грамадска небяспечныя дзеяннi прадугледжаны ўжо Крымінальным кодэксам.

Ён дадаў, што прапрацоўваецца магчымасць ўзмацнення жорсткасці санкцый па ўказаным артыкуле, «каб мінімізаваць рызыкі выхаду людзей на незаконныя масавыя мерапрыемствы».

Адносна лічбаў затрыманняў ён запэўніў, што ўсе дадзеныя аб’ектыўныя. «Калі казаць, што нешта хаваецца ад людзей: былі масавыя затрыманні ў перыяд пікавых падзей — ноч 9-10 жніўня, 11, 12 жніўня і наступныя дні. І калі некалькі тысяч затрымліваліся, то гэтыя некалькі тысяч і фіксаваліся. У дачыненні да асабліва актыўных адразу ж складаліся пратаколы альбо ўзбуджаліся крымінальныя справы. На сённяшні дзень толькі па Мінску да адміністрацыйнай адказнасці за ўвесь гэты перыяд прыцягнута каля 3 тыс. чалавек. З іх недзе дзве траціны — як правіла, пакарання ў выглядзе арышту. Астатнія — больш за 1 тыс. — адміністрацыйныя штрафы па арт. 23.34».

На сённяшні дзень у вытворчасці органаў папярэдняга следства Мінска знаходзіцца каля 250 крымінальных спраў, звязаных як з удзелам у масавых беспарадках (арт. 293 КК), так і спадарожных (звязаныя з непадпарадкаваннем, аказаннем супраціву работнікам міліцыі, пагрозай прымянення гвалту ў адносінах да работніка міліцыі; звязаныя з прыпынкам руху грамадскага транспарту). «Устаноўлена 275 асоб, якія датычныя да здзяйснення гэтых злачынстваў. Агульная шкода па гэтых крымінальных справах склала каля Br260 тыс. — гэта тое, што ўсталявана цяпер. Працэс працягваецца, сума, хутчэй за ўсё, будзе павялічвацца», — дадаў Алег Лаўрухін.

Прэв’ю: СТБ