Вы тут

Беларускія вытворцы будуць прадстаўлены на буйных выстаўках у Турцыі і ААЭ


Экспазіцыі беларускіх вытворцаў прадуктаў харчавання і напіткаў Belarus. The Taste of Nature (Беларусь. Смак прыроды) будуць прадстаўлены на буйных вытворчых выстаўках Турцыі і ААЭ CNR Food Istanbul у Стамбуле і Gulfood у Дубаі. Аб гэтым паведамілі БЕЛТА ва УП «Белінтэрэкспа» Беларускай гандлёва-прамысловай палаты.


Выстаўка CNR Food Istanbul пройдзе ў Стамбуле 25-28 лістапада. У мінулым годзе ў ёй прынялі ўдзел больш за 650 кампаній з 17 краін свету, у ліку якіх Чэхія, Індыя, Іарданія, Іран, Польшча, Сербія, Малайзія, Беларусь. Колькасць прафесійных наведвальнікаў дасягнула 51 278 са 117 краін, акрамя таго выстаўку наведалі больш за 240 афіцыйных асоб і дэлегацый. Было праведзена больш за 600 дзелавых сустрэч.

«Інтарэс да выстаўкі тлумачыцца тым, што сёння Турцыя — гэта не толькі значны спажывецкі рынак, які налічвае больш за 83 млн чалавек насельніцтва і амаль 52 млн турыстаў, паводле даных за 2019 год, але і гандлёвыя вароты ў краіны Блізкага і Сярэдняга Усходу, а таксама Паўночнай Афрыкі. За апошнія 15 гадоў Турцыя штогод імпартавала харчовай прадукцыі на суму ад $12 млрд да $15 млрд. Міжнародныя спецыялісты ў галіне сельскай гаспадаркі прагназуюць далейшы рост турэцкага імпарту прадуктаў харчавання ў бліжэйшыя пяць гадоў, звязаны з павелічэннем насельніцтва краіны, няхваткай прадуктаў харчавання і пагаршэннем стану сельскагаспадарчай вытворчасці ўнутры дзяржавы», — адзначылі ў «Белінтэрэкспа». На прадпрыемстве дадалі, што, паводле інфармацыі беларускага пасольства ў Турцыі, узрастаючы кошт вытворчасці харчовай прадукцыі ўнутры краіны прымушае турэцкі ўрад ісці на кампрамісы ў імпарце сельгаставараў, зніжаючы ўвазныя пошліны.

«Апошнім часам важным напрамкам экспарту становяцца і краіны Блізкага Усходу. Засушлівы клімат робіць дзяржавы Персідскага заліва буйнымі імпарцёрамі прадуктаў харчавання. У шэрагу краін попыт на прадукты харчавання штогод павялічваецца на 30 працэнтаў. Урады блізкаўсходніх краін прымаюць удзел у адборы і закупках прадукцыі, у тым ліку з дапамогай спецыялізаваных выставак», — падкрэслілі ў выставачнай кампаніі.

Буйнейшая ў свеце штогадовая выстаўка харчовых тавараў Gulfood пройдзе ў Дубаі 21-25 лютага. Штогод яна збірае больш за 5 тыс. удзельнікаў і каля 100 тыс. прафесійных наведвальнікаў больш як са 190 краін. У «Белінтэрэкспа» адзначылі, што высокі кошт уваходных білетаў змяншае колькасць выпадковых наведвальнікаў, таму ўдзельнікі выстаўкі маюць справу непасрэдна з прафесійнай аўдыторыяй.

Як растлумачылі на прадпрыемстве, сёння ААЭ — гэта трэці ў свеце рээкспартны рынак пасля Ганконга і Сінгапура. ААЭ з’яўляюцца ключавым вузлом рээкспарту харчовай прадукцыі ў рэгіёне Персідскага заліва. Менавіта праз ААЭ імпартуецца звыш 90 працэнтаў харчовай прадукцыі ў рэгіёне, у які таксама ўваходзяць Бахрэйн, Катар, Кувейт, Аман, Саудаўская Аравія. У спісе асноўных імпартуемых прадуктаў гэтага рэгіёна на першых пазіцыях — мяса і малако. Калі гаварыць аб імпарце мясной прадукцыі, то ў прадуктовай карзіне ААЭ ялавічына складае 21 працэнт ад агульных затрат на харчаванне. Важным таварам таксама з’яўляюцца курыныя яйкі.

Начальнік галоўнага ўпраўлення знешнеэканамічнай дзейнасці Мінсельгасхарча Беларусі Аляксей Багданаў лічыць, што рынак ААЭ прэміяльны і дастаткова імпартаёмісты адносна такіх відаў прадукцыі, як мяса птушкі і ялавічына, з добрымі перспектывамі для беларускіх экспарцёраў. Намеснік міністра сельскай гаспадаркі і харчавання Ігар Брыло ў сваю чаргу паведаміў, што Беларусь плануе пастаўляць у ААЭ малочную прадукцыю, ялавічыну і мяса птушкі.

Экспазіцыя беларускіх вытворцаў на выстаўцы Gulfood стала ўжо традыцыйнай — мерапрыемства будзе праводзіцца шосты год запар. Таксама будуць праходзіць такія дзелавыя мерапрыемствы, як семінары, канферэнцыі і перагаворы, якія прадаставяць удзельнікам дадатковую магчымасць наладзіць дзелавыя кантакты.

Арганізатарам экспазіцый выступае выставачнае УП «Белінтэрэкспа» Беларускай гандлёва-прамысловай палаты пры падтрымцы пасольстваў Беларусі ў Турцыі і ў Аб’яднаных Арабскіх Эміратах, Мінсельгасхарча і канцэрна «Белдзяржхарчпрам».

Выбар рэдакцыі

Грамадства

Якiя нашы звычкi шкодзяць здароўю i знiшчаюць iмунiтэт?

Якiя нашы звычкi шкодзяць здароўю i знiшчаюць iмунiтэт?

Мы ў жыццi шмат чаго робiм, што пагаршае наша здароўе — або адразу, або ў аддаленай перспектыве.

Грамадства

Рэктар Магілёўскага дзяржуніверсітэта Дзянiс Дук: У нас свае асаблiвасцi i шлях развiцця ў сусветнай гiсторыi

Рэктар Магілёўскага дзяржуніверсітэта Дзянiс Дук: У нас свае асаблiвасцi i шлях развiцця ў сусветнай гiсторыi

Тры гады таму Дзянiс Дук пераехаў у Магiлёў, каб узначалiць вядучую ВНУ вобласцi па падрыхтоўцы педагагiчных кадраў.

Эканоміка

Прадукты для эфектыўнай энергіі: аксіяльны ветрагенератар, анодныя зазямляльнікі, керамзітапенабетон, паліўныя брыкеты

Прадукты для эфектыўнай энергіі: аксіяльны ветрагенератар, анодныя зазямляльнікі, керамзітапенабетон, паліўныя брыкеты

Пераможцы шостага конкурсу «Лідар энергаэфектыўнасці — 2020» сёлета ўдзельнічалі ў спаборніцтвах анлайн і гэтак жа атрымлівалі віншаванні.