Вы тут

«Лепшы цюнінг для машын — правільны пратэктар шын»


Менавіта пад такім слоганам будзе праводзіцца Рэспубліканская прафілактычная акцыя, якая ініцыяваная на нашых дарогах Дзяржаўтаінспекцыяй краіны. Яна пройдзе з 25 лістапада да 4 снежня. Пра гэта паведаміў старшы інспектар па асобых даручэннях аддзялення арганізацыі міжведамаснага ўзаемадзеяння і прапаганды бяспекі дарожнага руху ДАІ МУС Рэспублікі Беларусь Аляксандр Бруй.


Прадстаўнік ДАІ таксама адзначыў, што з 2015 года на заканадаўчым узроўні замацавана абавязковае выкарыстанне зімовых шын на транспартным сродку ў перыяд з 1 снежня да 1 сакавіка. Падрыхтоўку да зімовых умоў павінен прайсці кожны аўтамабіль. Патрабаванне да зімовых шын аўтамабіляў: вышыня рэльефа пратэктара павінна быць не менш за 4 мм.

Аляксандр Бруй дадаў, што з надыходам зімы, калі выпадае снег, хуткасць патоку таксама падае. Адказныя кіроўцы рыхтуюць свае аўтамабілі да зімы, мяняюць манеру язды — зніжаюць хуткасць, пазбягаюць лішніх перастраенняў. Але, на жаль, «дзень бляхара» гэта не адмяняе. Пры гэтым адзначаецца рост дробных дарожных здарэнняў, у якіх пакутуюць толькі аўтамабілі. У той жа час сур'ёзна зніжаецца колькасць ДТЗ, у якіх церпяць людзі. Але зноў жа гэта ўсё актуальна ў пэўныя дні.

План «Надвор'е» і нумар 125

Старшы інспектар па асобых даручэннях аддзела арганізацыі дарожнага руху і дарожнай інспекцыі ДАІ МУС Вадзім Філончык адзначыў, што перад пачаткам зімовага сезона ажыццяўляецца маніторынг гатоўнасці арганізацый камунальнай гаспадаркі да работы ў складаны перыяд. У гэты час вывучаюцца пытанні аднаўлення дарожнага пакрыцця, правяраецца нарыхтоўка процігалалёдных матэрыялаў, гатоўнасць дарожнай тэхнікі, устаноўка папераджальных дарожных знакаў і іншыя.

У цэлым, работа арганізацый дарожна-камунальнай гаспадаркі па падрыхтоўцы да зімовага сезона выканана. У тэрытарыяльных падраздзяленнях ДАІ штогод распрацоўваецца комплекс неадкладных мерапрыемстваў і дзеянняў у складаных умовах надвор'я (План «Надвор'е»). Вызначаны супрацоўнікі, якія адказваюць за канкрэтныя ўчасткі аўтамабільных дарог, кантактныя тэлефоны дыспетчарскіх службаў.

Прадстаўнік аўтаінспекцыі заявіў, што ў выпадках узнікнення непрадбачаных абставін, звязаных з пагаршэннем дарожнага пакрыцця, якія павышаюць аварыйнасць, рэкамендуецца паведамляць інфармацыю па нумарах тэлефонаў 125 альбо 102. Спецыяльныя службы аператыўна рэагуюць на інфармацыю, якая паступае ад удзельнікаў дарожнага руху, і прымаюць неабходныя меры.

Ён, у прыватнасці, адзначыў, што колькасць дарожна-транспартных здарэнняў з прычыны няспраўнасці аўтамабіляў невысокая. Тым не менш наяўнасць зімовых шын і іх стан у зімовы перыяд правяраецца з асаблівай увагай падчас тэхагляду. Там жа правяраецца і работа шклоачышчальнікаў і шклоамывальнікаў, працаздольнасць якіх зімой мае важнае значэнне для бяспекі.

Тэхніка, пясок і соль

Міністэрствам транспарту і камунікацый распрацаваны комплекс арганізацыйна-тэхнічных мерапрыемстваў па падрыхтоўцы аўтамабільных дарог і арганізацый да работы ў асенне-зімовы перыяд. Пра гэта паведаміў намеснік начальніка галоўнага ўпраўлення аўтадарог Міністэрства транспарту і камунікацый Рыгор Глазко.

У кожнай эксплуатацыйнай арганізацыі рэспубліканскіх аўтамабільных дарог праведзена адпаведная інжынерная падрыхтоўка. У прыватнасці, падрыхтавана і запланавана работа 60 адзінак ротарнай тэхнікі, 653 адзінак пясчана-размеркавальнай тэхнікі, 945 адзінак снегаачышчальнай тэхнікі, у тым ліку 150 аўтагрэйдараў і 592 трактары. Для якаснай работы ў асенне-зімовы перыяд штогод арганізацыі міністэрства нарыхтоўваюць 387 тысяч тон пясчана-салявой сумесі, 182 тысячы тон тэхнічнай солі, 186 тысяч тон чыстай солі.

Вываз снегу ў Мінску — на 9 пляцовак

Намеснік гендырэктара ДВА «Гаррамаўтадар» Мінгарвыканкама Уладзімір Латушкін упэўнены ў тым, што ўсе гарадскія службы, якія забяспечваюць якасны стан вулічна-дарожнай сеткі горада Мінска ў зімовы перыяд, знаходзяцца ў рабочым стане. Тэхніка ў колькасці 763 адзінак падрыхтавана да работы ў поўным аб'ёме: праведзена тэхабслугоўванне і атэстацыя на нормы размеркавання.

Таксама заключаныя дагаворы з іншымі арганізацыямі на выкарыстанне спецтэхнікі, у прыватнасці на вываз снегу. Вываз снегу ў Мінску будзе ажыццяўляцца на 9 асноўных і рэзервовых пляцовак. Таксама будзе ажыццяўляцца ўтылізацыя снегу на снегаплавільным пункце. Па стане на 20 лістапада ў Мінску нарыхтавана 32 тысячы тон пясчана-салявых сумесяў (60 % ад агульнай патрэбы). Увогуле на зіму Мінску патрэбна 48,5 тысячы тон чыстай солі і 54 тысячы тон пясчана-салявой сумесі.

Сяргей КУРКАЧ

Фота Яна ХВЕДЧЫНА

Выбар рэдакцыі

Грамадства

Як кадравыя агенцтвы падманваюць даверлівых грамадзян

Як кадравыя агенцтвы падманваюць даверлівых грамадзян

Калі ў кадравым агенцтве вам прапануюць заплаціць грошы і гарантуюць стапрацэнтнае працаўладкаванне, смела разварочвайцеся і сыходзьце: перад вамі, напэўна, ашуканцы.

Грамадства

Прыродныя антыбіётыкі: Лекі, якія дапамагаюць перамагчы інфекцыю і ўмацоўваюць ахоўныя ўласцівасці арганізма

Прыродныя антыбіётыкі: Лекі, якія дапамагаюць перамагчы інфекцыю і ўмацоўваюць ахоўныя ўласцівасці арганізма

У адрозненне ад «хімічных антыбіётыкаў», прыродныя лекі не толькі дапамагаюць перамагчы інфекцыю, але і ўмацоўваюць ахоўныя ўласцівасці арганізма.

Калейдаскоп

Усходні гараскоп на наступны тыдзень

Усходні гараскоп на наступны тыдзень

СКАРПІЁН. На гэтым тыдні традыцыйны падыход да вырашэння праблем не заўсёды будзе ўдалы.

Грамадства

Як дзейнічалі партызаны ва Усакінскім лесе на Клічаўшчыне

Як дзейнічалі партызаны ва Усакінскім лесе на Клічаўшчыне

Піша сын аднаго з партызан Генадзь Сахрай.