Учора з'явіліся паведамленні, што ў гэтым месяцы некаторыя людзі атрымалі пенсіі на пару дзён пазней. Міністэрства працы і сацыяльнай абароны пракаменціравала сітуацыю.
— Пенсіі штомесяц выплачваюцца ў перыяд з 5 да 26 чысла ўключна, — адзначылі ў ім. — Для выплаты кожнаму пенсіянеру ўстаноўлена пэўная дата, калі пенсія павінна быць выплачана абавязкова. Дата выплаты вызначаецца падчас прызначэння пенсіі і можа быць скарэкціравана пры змене спосабу выплаты пенсіі — праз арганізацыі паштовай сувязі, банкаўскія ўстановы і арганізацыі па дастаўцы пенсій.
Для забеспячэння выплаты пенсій ва ўстаноўленыя тэрміны фінансаванне іх выплаты ажыццяўляецца загадзя. Праз банкі сродкі пералічваюцца, як правіла, за два дні. Пасля паступлення ў банк яны залічваюцца на рахунак пенсіянера і становяцца даступнымі для атрымання. Разам з тым гэты парадак не мяняе ўстаноўленую пенсіянеру дату выплаты пенсіі — тэрмін, не пазней за які пенсія павінна быць выплачана абавязкова, патлумачылі спецыялісты.
— Многія пенсіянеры памылкова лічаць, што дзень залічэння сродкаў на іх рахунак з'яўляецца ўстаноўленай для іх датай выплаты пенсіі. Часта менавіта гэтая акалічнасць з'яўляецца прычынай непаразуменняў і адпаведных паведамленняў. Так, 20 красавіка ў асобных тэлеграм-каналах з'явілася інфармацыя аб парушэнні тэрмінаў выплаты пенсій. Устаноўленая дата выплаты пенсіянерам — 21-е чысло кожнага месяца, — звярнулі ўвагу ў міністэрстве. — З улікам апераджальнага фінансавання сродкі на рахунак у банку залічваліся і былі даступны загадзя, як правіла, за два дні, а ў асобных месяцах — яшчэ і ў больш раннія тэрміны з улікам выхадных і святочных дзён.
У красавіку гэтага года сродкі для забеспячэння выплаты пенсіі 21-га чысла асобным пенсіянерам былі пералічаны ў банкі 20-га — за дзень да ўстаноўленай даты выплаты пенсіі, што і выклікала негатыўную рэакцыю. Разам з тым тэрміны выплаты пенсіі не парушаны, растлумачылі ў ведамстве.
— Звяртаем увагу, што рашэнне аб змене тэрмінаў выплаты пенсій не прымалася. Пенсіі выплачваюцца і будуць выплачвацца своечасова, не пазней за дату выплаты пенсіі, устаноўленую канкрэтнаму пенсіянеру. Інфармацыю пра ўстаноўленую дату выплаты пенсіі можна ўдакладніць ва ўпраўленні сацыяльнай абароны па месцы жыхарства.
Алена КРАВЕЦ
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?