Лепшыя кнігі прыедуць да нас

З 16 па 22 лютага ў сталіцы Беларусі пройдзе XXIX Мінская міжнародная выстава ­кірмаш, і Краінай-­Ганаровым госцем на ёй будзе Азербайджан

Па традыцыі ладзіцца выстава па адрасе: Мінск, праспект Пераможцаў, 14. І ўдзел у прэстыжным на прасторах Усходняй Еўропы кніжным форуме прымуць выдаўцы, паліграфісты, пісьменнікі з дзясяткаў краін.

Краінай-Ганаровым госцем чарговай Мінскай выставы-кірмашу стане Азербайджан. На тое ёсць усе падставы. У Беларусі з Азербайджанам добрыя гуманітарныя, культурныя й выдавецкія стасункі. У тым ліку – і на ніве перакладаў твораў беларускіх пісьменнікаў на азербайджанскую мову ды наадварот. У Мінску некаторы час назад пабачыла свет анталогія сучаснай азербайджанскай паэзіі на беларускай мове, выйшла кніга вершаў Лейлы Аліевай у перакладах Таццяны Сівец, казачная кніга Севіндж Нурукызы, адрасаваная дзецям. Выдадзены зборнік вершаў Чынгіза Алі аглу “Знічкай цябе я пакіну” на беларускай мове.

У Баку шмат зрабілі для прадстаўлення беларускай літаратуры на азербайджанскай мове доктар філалагічных навук Флора Наджы, літаратуразнаўца Ірада Мусаева, празаік, драматург, перакладчык Камран Назірлі, пісьменніца Севіндж Нурукызы, публіцыстка і перакладчыца Салатын Мірзоева. Летась у Азербайджане пабачыла свет анталогія беларускай дзіцячай літаратуры на азербайджанскай мове.

Сяргей Шычко

Нумар у фармаце PDF