Будаўніцтва новага музея ў дзяржаўным мемарыяльным комплексе «Хатынь» пачнецца адразу пасля 9 мая. Пра гэта журналістам распавёў старшыня Мінаблвыканкама Аляксандр Турчын, перадае БелТА.
У мемарыяльным комплексе «Хатынь» 29 красавіка арганізаваны рабочы штаб Мінаблвыканкама. Аляксандр Турчын абмеркаваў з адміністрацыяй мемарыяльнага комплексу і арганізацыяй «Белдзяржпраект» будаўніцтва новага музея і царквы, а таксама рэканструкцыю існуючых будынкаў. Старшыні Мінаблвыканкама прадставілі візуалізацыю чатырох магчымых праектаў новага музейнага будынка.
«Літаральна ўчора кіраўнік дзяржавы падтрымаў нашы прапановы па практычнай рэалізацыі будаўніцтва музея. Акрамя таго, вядуцца работы па маштабнай рэканструкцыі і капітальным рамонце мемарыяльнага комплексу „Хатынь“. Гэта спрашчае многія аспекты і дае магчымасць прымаць аператыўныя рашэнні», — сказаў Аляксандр Турчын.
Паводле яго слоў, сённяшні працоўны штаб стаў своеасаблівай кантрольнай праверкай. «На наступным тыдні плануецца закласці фундамент новага музейнага будынка. У бліжэйшы час пачнецца будаўніцтва царквы. Пазней мы яшчэ раз ацэнім той аб’ём работ па капітальным рамонце існуючых збудаванняў, які нам трэба будзе. Праз працяглы час эксплуатацыі многія рэчы патрабуюць рамонту», — адзначыў губернатар.
Падобныя працоўныя штабы будуць збірацца на рэгулярнай аснове. «Мы будзем падводзіць вынікі і глядзець, што нам яшчэ трэба зрабіць. Каб да наступнай гадавіны трагедыі ў Хатыні мы завяршылі ўсе работы. Я не сумняваюся, што мы гэта зробім», — падкрэсліў Аляксандр Турчын.
Удзельнікі працоўнага штаба абмеркавалі размяшчэнне ў непасрэднай блізкасці ад мемарыяльнага комплексу памятнага знака ахвярам генацыду беларускага народа. «Плануецца размясціць тут капсулы з зямлёй з месц нацысцкіх злачынстваў, якія былі знойдзены ў ходзе расследавання па справе аб генацыдзе нашага народа. У бліжэйшы час мы разгледзім гэту прапанову», — канстатаваў старшыня Мінаблвыканкама.
Ён пракаментаваў чатыры праекты новага музейнага будынка, прадэманстраваных супрацоўнікамі «Белдзяржпраекта». «На мой погляд, усе яны падыходзяць для гэтага месца. Тым не менш, на працягу двух тыдняў мы плануем спыніцца на нейкім канкрэтным варыянце. Акрамя таго, па даручэнню кіраўніка дзяржавы мы адрамантуем трасу М3 і сам пад’езд да „Хатыні“. Верагодна, прыступім да рэканструкцыі дарог пасля завяршэння будаўніча-мантажных работ у мемарыяльным комплексе», — сказаў на заканчэнне старшыня Мінаблвыканкама.
Сумесныя праекты ядзерных тэхналогій.
