Пра шлях да ўз’яднання. Пабывалі на здымках новай кінастужкі «Беларусьфільма» — «Мы адзіныя»

На кінастудыі «Беларусьфільм» стартавалі здымкі новага нацыянальнага праекта пад рабочай назвай «Мы адзіныя». Над стужкай працуе беларуска-расійская творчая група. Падзеі поўнаметражнага фільма адбываюцца ў 1925-м годзе, калі Беларусь была падзелена на Усходнюю і Заходнюю. Галоўныя героі, браты Павел і Антон апынаюцца ў віры гістарычных падзей: партызанская барацьба, польская акупацыя і прыгнёт. Што чакае братоў, і якія выпрабаванні выпадуць на іх долю? Аб гэтым можна будзе даведацца пасля таго, як стужка пабачыць свет. А пакуль «Звязда» распавядае аб першым здымачным дні.

Натурная пляцоўка студыі знаходзіцца пад Смалявічамі. Месца, асабліва ў восеньскія дні, выглядае сапраўды кінематаграфічна: пажоўклае лісце кантрастуе з зялёнымі галінкамі яловага лесу. Чуваць фырканне коней — жывёлы іграюць далёка не апошнюю ролю ў фільме. Згодна з сюжэтам, падзеі стужкі адбываюцца ў лістападзе. Надвор’е спрыяе задумцы сцэнарыстаў: ідзе невялікі дождж, а неба зацягнута хмарамі. На пляцоўку завітаў генеральны дырэктар кінастудыі «Беларусьфільм» Уладзімір Карачэўскі:

— Спадзяемся, што «Мы адзіныя» стане першай часткай трылогіі аб беларусах, аб тым, як мы жылі падзеленымі, і як аб’ядноўвалі, адраджалі краіну. Эпоха закранута няпростая, раней кінастудыя да гэтай тэмы не звярталася. Уяўляеце, сем’і былі падзелены мяжой — яны не маглі не тое што жыць разам, але нават сустракацца. Ішла барацьба за вызваленне тэрыторыі, якая знаходзілася пад польскімі ўладамі. З аднаго боку, гэта драматычны час, але ў ім можна знайсці элементы рамантыкі: партызаны, пагоні, кантрабандысты. У першую чаргу ў стужцы закладзена гуманная і вельмі важная ідэя: Беларусь павінна быць адзінай, а родныя людзі — разам. Тэма актуальная як ніколі: у час, калі сціраюцца паняцці патрыятызму, любові да Радзімы, трэба захоўваць свае традыцыі і культуру.

Каб дакладана адлюстраваць час, разам са стваральнікамі працуюць гістарычныя кансультанты. Захаваць гістарычную дакладнасць дапамагаюць загадчык аддзела навейшай гісторыі Інстытута гісторыі НАН Сяргей Траццяк, а таксама член Саюза пісьменнікаў Беларусі, аўтар гістарычных кніг Вячаслаў Бандарэнка. 

На першы дзень у каманды шмат планаў. Трэба настроіць абсталяванне, зняць пачатковыя сцэны, а пасля абавязкова разбіць талерку, каб фільм атрымаўся. Рэжысёр-пастаноўшчык Андрэй Хрулёў распавёў, што цэнтрам гісторыі стануць лёсы звычайных хлопцаў са Стоўбцаў.

— Для мяне гэта гісторыя аб тым, як у няпростых абставінах застацца чалавекам. У стужцы адлюстравана, як галоўны герой робіць выбар, і якія падзеі гэтаму спрыяюць. У нас запланавана дастаткова дынамічных сцэн, звязаных з конямі. Відовішчная і масавая сцэна суда, на якім беларускія падпольшчыкі будуць вызваляць сваіх таварышаў, павінна здымацца ў Снове 

Здымачны працэс тым часам працягваецца: акцёры рэпеціруюць сцэну, спецыяльнымі ўстаноўкамі распыляецца дым, памочнікі перадаюць каманды па рацыях. Непадалёк свайго часу чакаюць грымёры, піратэхнікі і механікі — яны павінны быць побач, бо зусім хутка аператар дасць старт здымкам. 

Данііл Чуп выконвае ролю Паўла. Менавіта яго герою давядзецца вырашаць, на чый бок стаць. А пакуль у акцёра ёсць некалькі хвілін, каб распавесці аб атмасферы, якая пануе на пляцоўцы:

— Мой герой хоча проста жыць: працаваць, кахаць, сталець. Таму на пачатку фільма ён не зацікаўлены ў тым, што адбываецца вакол. Але абставіны ўсё ж такі вымушаюць яго пачаць дзейнічаць. Першы здымачны дзень праходзіць выдатна, пакуль не паспеў з усімі пазнаёміцца, але атмасфера ўжо сяброўская. Каскадзёры дапамагаюць справіцца з коньмі — гэта вельмі важна, таму што сыграць сцэну — гэта адно, а тэхнічна праехаць на кані — ўжо іншае. 

Плануецца, што здымкі на натурных пляцоўках працягнуцца да снежня. Потым каманда пачне працаваць у павільёнах. Работа над фільмам пачалася напрыканцы мінулага года: пасля распрацоўкі сцэнарыя праводзіўся кастынг акцёраў. Адметна, што будучых выканаўцаў падбіралі згодна з гістарычнымі фотаздымкамі, каб іх тыпажы адпавядалі вобразам людзей мінулай эпохі. Прэм’ера стужкі запланавана на май 2023 года. 

Арына КАРПОВІЧ

Фота Лізаветы ГОЛАД