БДУ прадставіў у Зімбабвэ мноства кірункаў для навукова-інавацыйнага супрацоўніцтва

Дэлегацыя Беларускага дзяржаўнага ўніверсітэта на чале з рэктарам Андрэем Каралём прыняла ўдзел у другім беларуска-зімбабвійскім бізнес-форуме «Пашыраючы гарызонты: дынамічныя рашэнні эканамічнага развіцця», а таксама шэрагу мерапрыемстваў па лініі адукацыі і навукі. 

У прыватнасці, Андрэй Кароль сустрэўся з кіраўніцтвам Міністэрства вышэйшай і сярэдняй спецыяльнай адукацыі, навукі і тэхналагічнага развіцця, правёў перагаворы з калегамі з вядучых ВНУ Зімбабвэ ў час круглых сталоў і сустрэч і агучыў свае прапановы па супрацоўніцтве. Яны датычацца галіны медыцыны, фармацэўтыкі, кіравання воднымі рэсурсамі, ачысткі вады, геалогіі, разведкі радовішчаў карысных выкапняў, біятэхналогій, экалогіі, глебазнаўства і інш. 

У прыватнасці, калегам з афрыканскай краіны расказалі аб вытворчасці лекавых прэпаратаў, ультрагукавых лічыльнікаў газу, паслугах па рашэнні прыкладных. задач горназдабыўной прамысловасці, ачыстцы забруджаных вод. У галіне сельскай гаспадаркі перспектыўнымі могуць стаць сумесныя праекты па вывучэнні ўздзеяння засалення глебаў на расліны і ўраджай, уплыву змянення клімату на навакольнае асяроддзе і інш. 

Узаемадзеянне ў галіне адукацыі можа адбывацца па лініі падрыхтоўкі грамадзян Зімбабвэ ў Інстытуце дадатковай адукацыі, навучанні іх на англійскай мове ў магістратуры, аспірантуры і па праграмах адукацыі для дарослых. Таксама афрыканскаму боку прапанаваны распрацоўка і рэалізацыя сумесных адукацыйных праграм, удзел у навуковых канферэнцыях, арганізацыя гасцявых лекцый, стажыровак выкладчыкаў і студэнтаў з Зімбабвэ. Усяго беларуская ВНУ ініцыявала больш за 20 прапаноў. 

Першым добрым вынікам для БДУ падчас візіту ў Рэспубліку Зімбабвэ стала падпісанне шасці мемарандумаў аб узаемаразуменні з Універсітэтам Зімбабвэ, Адкрытым універсітэтам Зімбабвэ, Дзяржаўным універсітэтам Лупане, Нацыянальным універсітэтам тэхналогій і навукі, Тэхналагічным інстытутам Харары і Тэхналагічным універсітэтам Чынхойі.

Надзея НІКАЛАЕВА