Беларусь паспяхова выпрабавала ўласную ракету для комплексу «Бук»

Беларусь правяла паспяховае выпрабаванне ўласнай ракеты для комплексу «Бук». Пра гэта Прэзідэнт Беларусі Аляксандр Лукашэнка заявіў на цырымоніі ўручэння дзяржаўных узнагарод і пагонаў вышэйшаму афіцэрскаму складу, перадае БелТА.

«Пазаўчора выпрабавалі ракету „Бук“ да нашага супрацьпаветранага комплексу. Паляцела куды трэба і зрабіла ўсё, што трэба. Таму ў вас з’яўляецца ўласная страшная зброя супраць лятальных апаратаў», — сказаў кіраўнік дзяржавы.

Прэзідэнт падкрэсліў, што за апошні час многае зроблена для таго, каб беларуская армія і сілавы блок былі ўзброены сапраўднай зброяй і годна абаранялі Радзіму.

Як паведамлялася, Дзяржаўны ваенна-прамысловы камітэт у маі 2022 года інфармаваў пра выпрабаванні новых ракет да комплексаў «Паланэз» і «Бук». «Ракетабудаванне на сённяшні момант — адзін з ключавых кірункаў Дзяржкамваенпрама. У маі ў нас чарговы этап выпрабаванняў, у жніўні — наступны. Думаю, на працягу гэтага года мы па аналогіі мінулага правядзём некалькі этапаў і ў канцы года будзем дакладваць кіраўніку дзяржавы аб выкананні тых задач, якія стаяць у гэтым ключавым напрамку Дзяржкамваенпрама», — распавядаў старшыня ДВПК Дзмітрый Пантус.

Да гэтага былі дасягнуты дамоўленасці паміж Расіяй і Беларуссю аб дапамозе ў сферы ракетнай вытворчасці. Прэзідэнт Беларусі Аляксандр Лукашэнка на нарадзе па пытанні дзяржабаронзаказу ў маі 2022 года заяўляў: «Я прэм’ер-міністру ставіў адпаведную задачу пасля апошняй сустрэчы на Далёкім Усходзе з Прэзідэнтам Расіі. Мы дамовіліся адназначна: Пуцін, Рагозін (на той момант кіраўнік «Раскосмасу» Дзмітрый Рагозін. — Заўв. БелТА), Лукашэнка, хто там яшчэ былі — людзі, якія займаюцца ракетнай вытворчасцю ў Расіі, каб яны паглядзелі на нашы распрацоўкі. Мы ж ствараем новую ракету. Ракету вельмі эфектыўную ўзору «Іскандэр» (Расійскі ракетны комплекс. — Заўв. БелТА). І поўная была падтрымка, — заявіў кіраўнік дзяржавы. — Пры мне Прэзідэнт паставіў задачу Дзмітрыю Рагозіну неадкладна аказаць падтрымку, каб мы не стваралі веласіпед, каб мы маглі задзейнічаць вопыт распрацоўшчыкаў, ракетчыкаў Расійскай Федэрацыі, якія рабілі «Іскандэр».