Папярэдне Мінгарвыканкамам было прынятае рашэнне адключыць ацяпленне кватэр у Мінску з 17 красавіка, калі сярэднесутачная тэмпература паветра за акном цягам трох дзён ужо трымалася +8 °С і вышэй. Аднак паколькі надвор’е змянілася, каб пазбегнуць дыскамфорту для жыхароў, вырашана адкласці канчатковае спыненне ацяплення ў будынках другой чаргі: жылых дамах, інтэрнатах, лазнях, тэатрах, ВНУ, сярэдне-спецыяльных і прафесійна-тэхнічных установах адукацыі.
Як паведамілі ў Мінгарвыканкаме, батарэі будуць працаваць у рэжыме прапальвання як мінімум да канца тыдня (сіноптыкі абяцаюць пацяпленне), то-бок цепланосьбіт у іх будзе паступаць, аднак тэмпература ацяпляльных прылад будзе меншай, у тым ліку і навобмацак. У прынцыпе, як і ў апошнія тыдні паўтара.
Нагадаем, што адключаць цяпло ў шэрагу адміністрацыйных будынкаў сталіцы пачалі яшчэ 12 красавіка. Гэта прамысловыя, адміністрацыйныя і грамадскія памяшканні, якія адносяцца да першай чаргі. А Гродзеншчына спыніла ацяпленне будынкаў першай чаргі ўжо 10 красавіка. На Гомельшчыне ж ацяпляльны сезон ужо завершаны амаль цалкам.
У трэцюю чаргу на адключэнне ацяплення ўваходзяць гасцініцы, бібліятэкі, дзяржаўныя архівы, музеі, установы сацыяльнага забеспячэння, медыцынскія, лячэбна-прафілактычныя, школьныя ўстановы і дзіцячыя садкі.
Леташні ацяпляльны сезон, дарэчы, канчаткова скончыўся амаль у сярэдзіне мая, бо надвор’е было неспрыяльным.
Ірына СІДАРОК
Фота аўтара
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
