Новыя князі таямнічага вострава Тартуга, які знаходзіцца недзе ў акіяне, былі каранаваныя на выхадных... у Мірскім замку, дзе адбылася «Бітва за Мір» — турнір, па выніках якога і вызначыліся найлепшыя правіцелі, якія цяпер будуць захоўваць незлічоныя скарбы вострава. Падобны квэст, які завяршыўся рэгатай радыёкіраваных мадэляў яхт «Адзін вецер для ўсіх» на замкавым возеры, тут ладзілі ўпершыню.
Найвышэйшая задача правіцеляў вострава — захоўваць праўдзівую гісторыю, на якую ўвесь час замахваюцца ворагі, з якімі вось ужо пяць стагоддзяў змагаюцца ў Міры. І цяпер гэта задача ляжа на плечы новых князёў — пераможцаў адмысловага квэсту, у якім удзельнічалі 14 дзяцей.
— Мы ўжо крыху стаміліся і вырашылі, што наспеў час перадаць кароны камусьці з вас, таму вы павінны прайсці выпрабаванні, каб стаць новымі правіцелямі, — такі наказ далі ўдзельнікам турніру цяпер ужо былыя князь і княгіня, распачынаючы турнір. — Вам давядзецца праявіць адвагу і мужнасць, кемлівасць і спрытнасць. А ў працэсе яшчэ і збіраць манеты, папаўняючы скарбніцу княства.
Удзельнікаў папярэдзілі, што турнір — справа сур'ёзная, таму за падказкі ад бацькоў змагары за карону будуць штрафавацца. Затое падказкі можна набыць за манеты. На шляху выпрабаванняў малых чакалі гістарычныя персанажы і галаваломкі ўнутры і звонку замка, а арыенцірам на шляху да перамогі служылі выявы карон.
11 заданняў турніру былі самыя розныя: падлічыць вежы замка, напісаць назву прадметаў па малюнках, дамаляваць карціну, прадэманстраваць меткасць і ўменне запамінаць.
Пераможцам турніру сярод хлопчыкаў стаў 13-гадовы Глеб Маркачэўскі з Оршы, які атрымаў карону і быў прызначаны першым новым князем вострава. Хлопчык расказаў, што для яго гэта хвалюючая падзея.
— Мы спецыяльна прыехалі паўдзельнічаць у турніры і паглядзець замак, дзе я ніколі не быў. Потым будуць і іншыя князі, удзельнікі квэсту, але я першы.
Новая княгіня — 9-гадовая Ульяна Ермачэнка — таксама прыехала з Оршы і ў Мірскім замку ўпершыню. Яна лічыць, што заданні турніру былі не толькі на веды, але і «на ўдачу» — пашанцуе адшукаць і здагадацца, як выканаць задачу, ці не.
— Ехалі спецыяльна на турнір, і падчас спаборніцтваў я ніводнай манеты не патраціла, усё зрабіла сама. Цяпер адчуваю, што я ўжо не звычайная дзяўчынка, а асаблівая — першая новая княгіня!
Цікава, што «князь» і «княгіня» вучацца ў адной школе, але паміж сабой да «каранацыі» не былі знаёмыя. Цяпер ім давядзецца наладжваць стасункі, каб разам упраўляць востравам да таго часу, пакуль не з'явяцца новыя правіцелі Тартугі. І першым княжацкім указам стала правядзенне рэгаты на возеры.
У плаванне адправіліся пяць адважных капітанаў — гадаванцаў мінскай дзіцяча-юнацкай спартыўнай школы па водных відах спорту. Радыёкіраваныя судны выправіліся ў воднае падарожжа пад моцным ветрам, які нахіляў мадэлі і намагаўся збіць з курсу. Адна яхта нават не здолела дайсці да фінішу — настолькі складанымі аказаліся выпрабаванні прыроды.
Аднак юныя капітаны змагаліся заўзята і імкнуліся прайсці абазначаны маршрут без памылак. Двум яхтам нават прыйшлося счапіцца на вадзе ў незапланаваным «паядынку». Самым спрытным і ўдачлівым стаў Кірыл Лук’яненка, які атрымаў кубак чэмпіёна вострава Тартуга з прысваеннем тытула найлепшага капітана 2023 года з рук князя Глеба і княгіні Ульяны.
— Я займаюся толькі пару месяцаў, і мадэлі мы робім самі. Было цяжка з-за ветру, але ж наперадзе яшчэ шмат выпрабаванняў, — падзяліўся ўражаннямі найлепшы капітан.
Пры такім моцным ветры дзеці яшчэ ні разу не запускалі яхты, таму гэта сапраўды было складана, пацвердзіў Юрый Ермакоў, трэнер-выкладчык дзіцяча-юнацкай спартыўнай школы па водных відах спорту:
— Усе сённяшнія капітаны займаюцца ўсяго некалькі месяцаў. Цяпер яны ў спартыўным лагеры штодня трэніруюцца на Камсамольскім возеры. Сёлета гэтыя мадэлі бадай што ўпершыню былі спушчаны на ваду, і гэта наш праект, які можна лічыць найлепшым на прасторы былога СССР. Да кожнага тыпу ветру трэба рыхтаваць свае ветразі. А на яхтах цяпер камплект ветразяў, які не разлічаны пад такі моцны вецер, таму дзеці ўдвая малайцы, што справіліся.
Мадэлі, якія ўдзельнічалі ў рэгаце, — міжнароднага класа RG65, і ў свеце праходзяць чэмпіянаты з гэтым класам суднаў. Хаця ў Беларусі такі кірунак пакуль не вельмі развіты, мадэлі вельмі зручныя для дзяцей, бо важаць каля кілаграма, і ім не патрэбны дадатковыя сродкі для транспарціроўкі. Да таго ж яхта мае добрыя хадавыя якасці.
Скончыліся ўрачыстасці і спаборніцтвы выступленнем удзельнікаў клуба гістарычнай рэканструкцыі «Шатландская пяхота», якія з'яўляюцца асабістай гвардыяй Мірскага замка.
Турнір «Бітва за Мір» і рэгата на возеры сталі пробным крокам на шляху далейшага ўдасканалення «разыначак» і прапануемых прыгод у Мірскім замку і развіцця сучасных тэхналогій. Налета на возера спусцяць дзевяць палепшаных копій судна «Чорная жамчужына» з фільма «Піраты Карыбскага мора». Мадэлі выраблены ў маштабе 1:36 Уладзімірам Шэндаравым, апантаным энтузіястам, які з'яўляецца таксама аўтарам праекта «Бітва за Мір». І гэта будзе ўжо сапраўдная рэгата, паабяцаў Аляксандр Лойка, дырэктар музея «Замкавы комплекс «Мір»:
— Гэтыя радыёкіруемыя караблі ўдасканаленыя ў тым сэнсе, што на іх можна выходзіць на ваду нават праз інтэрнэт (з сайта Tortuga.by) з любога пункта свету і пры тым анлайн бачыць рух карабля. Так што ў перспектыве мы, думаю, зробім і міжнародныя гонкі сусветнага ўзроўню. Наш комплекс займае 26 гектараў, кожны з якіх мы стараемся асвоіць так, каб было цікава наведвальнікам. Каб турыст заставаўся тут не на паўдня, каб бавіў час, гледзячы на мерапрыемствы, што ў нас адбываюцца. Турнір «Бітва за Мір» таксама стаў адметным спаборніцтвам на гістарычную тэму, дадаўшыся да іншых цікавінак, якія мы ладзім, каб здзіўляць і задавальняць турыстаў.
На гэтых выхадных, дарэчы, у Мірскім замку пройдзе чарговае мерапрыемства — «Музычныя вечарыны».
Ірына СІДАРОК
Фота аўтара
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
